| |
Croeso i rifyn mis Hydref o gylchlythyr ACC
Byddwn yn dod â'r wybodaeth ddiweddaraf i chi am drethi datganoledig Cymru, cofrestru llety ymwelwyr a'r Ardoll Ymwelwyr, yn ogystal â dyddiadau cau allweddol ac adnoddau defnyddiol.
Cyflwyno Bil Trethiant (Cymru) i'r Senedd
Cafodd Bil Trethiant (Cymru) ei gyflwyno i'r Senedd y mis yma. Dyma'r tro cyntaf i ACC arwain y gwaith o ddylunio deddfwriaeth dreth i Gymru. Mae'r Bil yn gam arall ar y daith i ddatganoli trethi Cymru, taith a ddechreuwyd 8 mlynedd yn ôl gyda Threth Trafodiadau Tir a Threth Gwarediadau Tirlenwi.
 |
Rydyn ni wedi bod yn crwydro
Mae ein tîm Rhanddeiliaid ac Ymgysylltu, sef Manon a Claire, wedi bod yn teithio ledled Cymru trwy gydol mis Hydref. Maen nhw wedi bod yn cwrdd â darparwyr llety, busnesau twristiaeth a gweithwyr proffesiynol cyfreithiol er mwyn sgwrsio am gofrestru llety ymwelwyr, yr Ardoll Ymwelwyr a’r Dreth Trafodiadau Tir. Dyma restr o’r digwyddiadau y buon nhw ynddynt:
-
Pedwar fforwm twristiaeth Croeso Cymru
-
Digwyddiadau Cymdeithas Broffesiynol yr Hunanarlwywyr (PASC) yng Ngogledd a Gorllewin Cymru
-
Cynhadledd Legal News Wales yng Nghaerdydd
Dyma ddywedodd ein harweinydd Ymgysylltu a Rhanddeiliaid wrth sôn am gynhadledd Newyddion Cyfreithiol Cymru: "Roedd siarad â chyfreithwyr a thrawsgludwyr yn gyfle gwych i ddangos y Dreth Trafodiadau Tir fel cyfraith Cymru ar waith. Bu’n gyfle i ni wrando ar gwestiynau pobl, eu cyfeirio at ein canllawiau a meithrin perthynas â chynulleidfa broffesiynol bwysig."
Dyma ddywedodd hi am y fforymau twristiaeth a chyfarfodydd PASC: "Diolch o galon i Croeso Cymru a PASC am ddod â ni a darparwyr llety ynghyd. Rydyn ni wedi cyrraedd carreg filltir arwyddocaol, a nawr mae angen i ni weithio gyda'n gilydd i drosi ymwybyddiaeth yn weithredoedd. Rhaid i bob darparwr llety i ymwelwyr gofrestru gyda ni erbyn 31 Mawrth 2027. Cewch gofrestru yn rhad ac am ddim, ac mae digon o gefnogaeth i'ch helpu chi i gofrestru yn hyderus."
Rydym yn ddiolchgar i'r holl sefydliadau sydd wedi ein gwahodd i'w digwyddiadau, ac yn edrych ymlaen at barhau â'r sgyrsiau hyn ar drothwy 2027.
|
 Cofrestru eich llety ymwelwyr yng Nghymru
Agorwyd y gofrestr llety i ymwelwyr yng Nghymru ar 1 Hydref 2026, ac mae pethau wedi dechrau’n dda!
Mae’r darparwyr sydd eisoes wedi cofrestru wedi dweud bod y gwasanaeth yn gyflym ac yn hawdd i'w ddefnyddio. Rydym yn falch iawn o'r ymateb, a byddwn yn parhau i wella'r gwasanaeth yn seiliedig ar eich adborth.
Os ydych chi'n cymryd archebion am arosiadau dros nos yng Nghymru, rhaid i chi gofrestru erbyn 31 Mawrth 2027.
Gweminarau Treth Trafodiadau Tir ar y gweill
Ym mis Tachwedd, byddwn yn cynnal 3 gweminar rhad ac am ddim ar gyfer cyfreithwyr a thrawsgludwyr sy'n ffeilio ac yn talu Treth Trafodiadau Tir (TTT). Mae lleoedd yn brin, felly archebwch yn gynnar.
Rydym yn Recriwtio
Rydym yn chwilio am Ddylunydd Cynnwys (Cymraeg Hanfodol) i ymuno â’n tîm!
Dywedodd Ry, Dylunydd Cynnwys yn ACC:
“Yr hyn sy’n fy mhlesio fwyaf yn fy ngwaith yw gwneud ein gwasanaethau’n hawdd i bobl eu defnyddio. Rwyf wrth fy modd yn datrys problemau creadigol, ac mae pob diwrnod yn dod â rhywbeth newydd yma yn ACC. Ar yr un pryd, mae’r hyblygrwydd y mae ACC yn ei gynnig yn caniatáu cydbwysedd iach rhwng gwaith a bywyd, gyda chyfleoedd i dyfu.”
Gwnewch gais cyn 11:55pm ddydd Mawrth 3 Tachwedd 2026
Ac yna, fe aethon ni’n fyw
“Mae mynd yn fyw yn aml yn cael ei ddisgrifio fel y llinell derfyn. I ni, mae'n teimlo'n llawer mwy fel y llinell gychwyn.”
Mae Gareth, Arweinydd Cofrestru ACC, wedi siarad am y gwaith a arweiniodd at lansio cofrestru llety i ymwelwyr yng Nghymru a’r hyn a fydd yn digwydd nesaf.
 |
|
Polisi Preifatrwydd Awdurdod Cyllid Cymru
Darllenwch ein Polisi Preifatrwydd i gael gwybod sut rydym yn prosesu eich data.
|
|
|
