|
Croeso i'n newyddlen Diogelwch Adeiladau - a gynlluniwyd i'ch hysbysu yn rheolaidd am gynnydd y Rhaglen Diogelwch Adeiladau a materion diogelwch tân sy'n effeithio ar bobl Cymru.
 |
|
Mae Siân Gwenllian, y Gweinidog Cabinet dros Lywodraeth Leol, Tai a Chynllunio, wedi cyhoeddi creu Grant Larymau fel Mesur Interim Cymru fel rhan o Raglen Cyweirio Diogelwch Adeiladau Cymru.
Bydd hyn yn newyddion i'w groesawu i drigolion a lesddeiliaid adeiladau yn y rhaglen sy'n aml yn ysgwyddo costau mesurau interim drud tra bod gwaith i gyweirio diffygion diogelwch tân yn cael ei wneud.
|
Dywedodd y Gweinidog Cabinet, Siân Gwenllian wrth y Senedd:
"Rwyf wedi cael fy nghyffwrdd gan brofiadau lesddeiliaid sy'n talu costau gwylio a larymau drud, er mwyn eu galluogi i aros yn eu cartrefi tra bod gwaith cyweirio diogelwch tân yn digwydd. Rwy'n cyhoeddi creu Grant Larymau fel Mesur Interim Cymru, i roi llwybr i lesddeiliaid allan o'r costau cynyddol sy'n aml yn dod gyda gofynion gwylio effro ('waking watch') hirdymor, a'r pryder a'r straen a ddioddefir o ganlyniad i hynny."
Er na fydd y Grant newydd yn talu costau gwylio effro, gobeithir y bydd yn lleihau'r angen amdanynt yn sylweddol trwy sicrhau bod lesddeiliaid yn gallu gosod system larwm briodol.
Mae rhagor o wybodaeth am gymhwystra a sut i wneud cais ar gael yma. Gellir gwneud ceisiadau am y Grant o 1 Hydref ymlaen.
Data
Adroddir ar gynnydd cyweirio diogelwch tân yng Nghymru yn y Dangosfwrdd Cyweirio Diogelwch Adeiladau. Mae'r dangosfwrdd yn dwyn ynghyd wybodaeth am yr holl adeiladau yn Rhaglen Cyweirio Diogelwch Adeiladau Cymru, gan olrhain cynnydd o'r amser pan nodir yr angen i gyweirio, hyd at ei gwblhau.
Ar hyn o bryd mae'r tîm yn gweithio ar nifer o ddiweddariadau o ran ymarferoldeb a sut mae'r data yn cael eu cyflwyno ar y dangosfwrdd. Bydd y rhain yn cael eu cyflwyno yn ystod y misoedd nesaf, ond yn gryno, byddant yn cynnwys:
- Delwedd o'r cynnydd a wnaed dros y cyfnod blaenorol o 12 mis
- Y gallu i weld data ar fap o Gymru ar gyfer pob categori o adeiladau
- Manylion pellach am y mathau o waith diogelwch tân mewnol ac allanol a nodwyd.
Croesewir eich adborth ar y dangosfwrdd. E-bostiwch sylwadau ac awgrymiadau at: DiogelwchAdeiladau@llyw.cymru
Mae gwaith yn cael ei gwblhau ar ganllawiau i gefnogi endidau cyfrifol yng Nghymru i drafod contractau gwaith cyweirio. Bydd y canllawiau hyn yn cael eu cyhoeddi yr hydref hwn.
Bydd y Canllawiau yn helpu partïon i ddeall pwrpas contractau gwaith, y materion sy'n codi'n aml mewn trafodaethau, a'r egwyddorion a ddylai lywio cytundeb rhesymol a chytbwys. Bydd yn darparu cymalau safonol ar gyfer meysydd cynhwysiant cyffredinol. Fodd bynnag, nid disodli'r cyngor cyfreithiol a phroffesiynol pwrpasol sy'n ofynnol wrth drafod a chytuno ar gontractau gwaith penodol y mae'n ofynnol i'r Datblygwyr eu hariannu o dan gontract y datblygwr yw'r bwriad.
Ar 10 Awst, lansiwyd ymgynghoriad ar reoliadau arfaethedig i ddynodi awdurdodau lleol fel Awdurdodau Diogelwch Adeiladu o dan Ddeddf Diogelwch Adeiladu (Cymru) 2026.
O dan Adran 122 o'r Ddeddf, rhaid i Weinidogion Cymru ddynodi un awdurdod lleol ym mhob ardal awdurdod tân ac achub i wasanaethu fel awdurdod diogelwch adeiladau ar gyfer y rhanbarth hwnnw
Mae'r ddogfen ymgynghori hon yn gwahodd barn ar gynigion Llywodraeth Cymru ar gyfer rheoliadau fydd yn dynodi'r awdurdodau lleol a fydd yn awdurdodau diogelwch adeiladau at ddibenion Deddf Diogelwch Adeiladau (Cymru) 2026. Mae'r ymgynghoriad hefyd yn gofyn a ddylid cynnwys unrhyw ddarpariaeth bellach yn y rheoliadau ynghylch arfer swyddogaethau gan awdurdod diogelwch adeiladau.
Gallwch gyflwyno eich sylwadau erbyn 16 Hydref 2022 mewn unrhyw un o'r ffyrdd isod:
- lawrlwythwch a chwblhewch ein ffurflen ymateb a'i bostio i (dylech gynnwys y cyfeirnod WG54868):
Tîm Diwygio Diogelwch Adeiladau
Y Gyfarwyddiaeth Tai ac Adfywio
Llywodraeth Cymru
Parc Cathays
Caerdydd
CF10 3NQ
Rheoliadau newydd
Daeth rheoliadau sy'n cryfhau'r system rheoli adeiladu ar gyfer adeiladau risg uwch yng Nghymru, ochr yn ochr â diweddariadau ehangach i'r rheoliadau adeiladu presennol i rym ar 1 Gorffennaf 2026 ac maent yn cynnwys y diweddariadau allweddol canlynol:
- Cyfrifoldebau a safonau cymhwysedd clir i'r rhai sy'n ymwneud â gwaith adeiladu (rolau deiliad dyletswydd ar gyfer Cleientiaid, Dylunwyr a Chontractwyr).
- Hysbysiadau Cydymffurfio a Hysbysiadau Stop sy'n darparu pwerau gorfodi newydd i Awdurdodau Lleol o ran rheoli adeiladu
- Cyflwyno Pyrth ar gyfer prosiectau adeiladu risg uwch sy'n creu atalfeydd caled lle na all gwaith adeiladu ddechrau heb gymeradwyaeth.
- Llinyn Aur o wybodaeth adeiladu ar gyfer adeiladau risg uwch, gan sicrhau fod gwybodaeth diogelwch hanfodol o'r cam dylunio ac adeiladu yn cael ei chynnal ac yn hawdd ei chyrraedd.
- Adrodd gorfodol am unrhyw ddigwyddiadau diogelwch sylweddol yn ystod gwaith ar adeiladau risg uwch.
- Bydd cymeradwyaeth rheoli adeiladu nawr yn dod i ben yn awtomatig os nad yw'r gwaith yn dechrau o fewn tair blynedd.
Mae'r newidiadau hyn yn rhan o'n hymrwymiad parhaus i wella diogelwch adeiladu i bawb ledled Cymru. Ceir canllawiau ar y rheoliadau yn y fan hon: Rheoliadau Adeiladu | Is-bwnc | LLYW.CYMRU
|
