Y Diweddaraf i’r Diwydiant Twristiaeth
Llwybrau; Ymchwil newydd yn dangos bod mwyafrif yn meddwl y dylai twristiaid gyfrannu at gostau cynnal cyrchfannau; Sioe Deithiol Diwydiant Digwyddiadau Busnes MeetInWales - 18-20 Ebrill 2023; Gweminar Digwyddiadau Cymru – 19 Ebrill 2023; Digwyddiadau a ariennir gan Ddigwyddiadau Cymru - Pencampwriaethau Ewropeaidd Rygbi Cadair Olwyn 2023 / FOCUS Cymru 2023; Pwerau newydd yn dod i rym i awdurdodau lleol fynd i’r afael ag effaith ail gartrefi a chartrefi gwag; Coroni Brenin Charles III; Adroddiadau Ailgysylltu Defnyddwyr Croeso Cymru; Llwybr Arfordir Ceredigion yn dathlu 15 mlynedd; Parcio ar gyfer Yr Wyddfa; Digwyddiad Lansio Yr Wyddfa Ddi-Blastig 24 Ebrill 2023; Cyfle i ddweud eich dweud ynghylch Cymwysterau Lletygarwch ac Arlwyo newydd yng Nghymru – helpwch ni i ledaenu’r neges; Cyngor am Ynni i fusnesau Cymru; Cynllun Gostyngiad mewn Biliau Ynni; NODYN ATGOFFA: Awdurdodiad Teithio Electronig; Offer gwirio seiber ar gyfer BBaChau; Gwobrau Merched Cymru Mewn Busnes 2023; Gwefan 'Helpu i Dyfu' newydd ar gyfer busnesau; Pecyn Cymorth Sero Net Lleoedd; Gwasanaethau ychwanegol GWR oar gyfer Caerfyrddin; Llwybr newydd rhwng Maes Awyr Caerdydd a Paris-Orly gydag Air France/Eastern Airways; Trwydded i chwarae cerddoriaeth fyw neu gerddoriaeth wedi’i recordio.
Llwybrau.
Bydd ein hymgyrch “Llwybrau” yn parhau yn y Gwanwyn a dechrau’r Haf ac mae’n wych gweld cymaint o’n partneriaid a busnesau yn defnyddio’r logo Llwybrau ac yn rhannu cynnwys ar y cyfryngau cymdeithasol – diolch yn fawr i chi a daliwch ati dros y Pasg.
Dyma dair ffordd hawdd y gallwch chi a’ch busnes gymryd rhan yn yr ymgyrch:
- Gwnewch yn siwr eich bod wedi’ch graddio a/neu eich achredu – unwaith y byddwch wedi’ch graddio gall pob darparwr llety, gweithgaredd ac atyniad gael eu cynnwys ar croeso.cymru. Os ydych eisoes wedi’ch graddio gwnewch yn siwr fod eich tudalen yn gyfredol, a’i bod yn cynnwys lluniau a fideos newydd a diweddar a’r holl fanylion sydd eu hangen ar ymwelwyr i wybod mwy am eich busnes.
- Cadwch mewn cysylltiad â ni. Rydym mewn cysylltiad rheolaidd â newyddiadurwyr, golygyddion cylchgronau a gweithwyr yn y cyfryngau. Os oes gennych unrhyw gynigion arbennig neu os ydych yn cynnal unrhyw ddigwyddiadau arbennig yn ystod mis Mai neu fis Mehefin, rhowch wybod i ni drwy anfon e-bost at productnews@llyw.cymru a byddwn yn rhannu’r manylion gyda’n cysylltiadau o fewn y cyfryngau. Cofiwch roi gwybod i ni hefyd os ydych yn cynnig rhywbeth gwahanol neu newydd a fyddai’n apelio at ymwelwyr. Mae’n bosibl y gallen ni ddefnyddio eich manylion er mwyn sbarduno straeon positif ynghylch Cymru ym maes cysylltiadau cyhoeddus.
- Darllenwch ein ‘canllaw i’r diwydiant ar Llwybrau' i gael cyngor a syniadau ynghylch sut y gallwch elwa ar y thema Llwybrau. Gallwch lawrlwytho’r logo i’w ddefnyddio ar gyfer eich deunyddiau marchnata eich hun ac ma gennym hefyd lawer o luniau o safon uchel y gallwch eu defnyddio – maent ar gael am ddim i fusnesau sy’n hyrwyddo Cymru. Mae’r rhain ar gael yn ein “pecyn cymorth Llwybrau”. Cofiwch ddefnyddio’r hashnod #Llwybrau yn eich negeseuon ar y cyfryngau cymdeithasol fel y gallwn helpu i rannu eich cynnwys.
Ymchwil newydd yn dangos bod mwyafrif yn meddwl y dylai twristiaid gyfrannu at gostau cynnal cyrchfannau
Mae ymchwil defnyddwyr newydd wedi canfod mwyafrif o bobl o blaid yr egwyddor y dylai twristiaid gyfrannu tuag at gostau cynnal y cyrchfannau y maent yn aros ynddynt, a chostau buddsoddi yn y cyrchfannau hynny.
Darllenwch y cyhoeddiad yn llawn ar Llyw.Cymru.
Sioe Deithiol Diwydiant Digwyddiadau Busnes MeetInWales - 18-20 Ebrill 2023
Hoffech chi:
- Ydych chi yn edrych i dyfu busnes a chynyddu refeniw ar gyfer eich lleoliad neu'ch busnes twristiaeth?
- Ydych chi eisiau lleihau effeithiau tymhorol?
- Eisoes yn gweithio yn y sector digwyddiadau busnes ac eisiau dysgu sut i dyfu canran o’r farchnad, datblygu sgiliau a manteisio ar gefnogaeth a phartneriaethau gan MeetInWales a'ch Sefydliad Rheoli Cyrchfannau lleol?
Os ydych wedi ateb ydw i unrhyw un o'r cwestiynau hyn, yna mae ein gweithdai, ledled Cymru ym mis Ebrill yn ddelfrydol ichi fynychu i ddatblygu a dysgu mwy am yr opsiynau i gynyddu eich presenoldeb yn y maes.
Mae ein rhaglen o ddigwyddiadau am ddim ac yn agored i holl fusnesau yng Nghymru sydd â diddordeb mewn digwyddiadau busnes.
I gofrestru i’r sesiwn sy’n gyfleus ichi, cliciwch ar y lleoliad perthnasol:
-
Caerdydd , 18 Ebrill 2023, 1000-1300, Gwesty’r Parkgate, Caerdydd
- Aberystwyth, 19 Ebrill 2023, 1300-1600, Llyfrgell Genedlaethol Cymru, Aberystwyth
- Llandudno, 20 Ebrill 2023, 1000-1300, Dylans, Llandudno
MeetInWales yw'r rhaglen digwyddiadau busnes swyddogol, sy’n hybu Cymru fel cyrchfan ar gyfer cyfarfodydd, cymhellion, adeiladu timau, digwyddiadau a chynadleddau. Mae rhaglen 'MeetInWales' yn cael ei redeg gan Event Wales, y tîm o fewn Llywodraeth Cymru sy'n gyfrifol am ddatblygu a hyrwyddo'r digwyddiadau a'r gadwyn gyflenwi, sydd hefyd yn cefnogi'r economi ymwelwyr yng Nghymru.
Gweminar Digwyddiadau Cymru – 19 Ebrill 2023
Hoffem eich gwahodd i'n gweminar ar-lein am 11.00am – 12.00pm ddydd Mercher 19 Ebrill pan fyddwn yn rhoi diweddariad ar y gwaith rydym wedi bod yn ei wneud, mewn partneriaeth â'r diwydiant digwyddiadau, i weithredu'r Strategaeth Digwyddiadau Cenedlaethol newydd i Gymru ers iddi gael ei lansio gan Weinidog yr Economi ym mis Gorffennaf 2022.
Bydd hwn hefyd yn gyfle i fod ymhlith y cyntaf i glywed newyddion cyffrous am ein ffrydiau ariannu newydd, y Gronfa Datblygu'r Sector a’r Gronfa Arloesi Cynaliadwyedd, sy'n lansio ym mis Ebrill 2023, er mwyn helpu i fynd i'r afael â rhai o'r materion allweddol sy'n wynebu'r sector.
I gofrestru eich diddordeb i fod yn y weminar e-bostiwch digwyddiadaucymru@llyw.cymru yna byddwn yn anfon dolen Microsoft Teams atoch i ymuno ar y diwrnod.
Digwyddiadau a ariennir gan Ddigwyddiadau Cymru:
O 3 i 7 Mai, bydd y Stadiwm eiconig y Principality yng Nghaerdydd yn cynnal Pencampwriaeth Ewropeaidd Rygbi Cadair Olwyn 2023. Byddwch yn barod am bum diwrnod o gystadlu brwd wrth i wyth tîm gorau Ewrop frwydro am y fedal aur a’r cyfle i gystadlu yng Ngemau Paralympaidd Paris 2024. Mae’r gwledydd sy’n cystadlu yn cynnwys Ffrainc, Prydain Fawr, Denmarc, yr Almaen, y Swistir, yr Iseldiroedd, Israel a’r Weriniaeth Tsiec.
Gellir cael mwy o wybodaeth ar wefan Pencampwriaeth Ewropeaidd Rygbi Cadair Olwyn 2023.
FOCUS Cymru 2023 - 4-6 Mai, Wrecsam
Mae FOCUS Cymru yn ŵyl arddangos aml-leoliad rhyngwladol sy’n rhoi sylw cadarn i ddoniau newydd o fewn diwydiant cerddoriaeth Cymru er mwyn tynnu sylw’r byd atynt, ynghyd â detholiad o’r bandiau newydd gorau o bob cwr o’r byd. Bydd yr ŵyl, a gynhelir o 4 i 6 Mai, yn croesawu 20,000 o fynychwyr a bydd dros 250+ o fandiau o Gymru ac o amgylch y byd yn glanio yn Wrecsam.
Mae mwy o wybodaeth ar FOCUS Cymru 2023 » HAFAN.
Pwerau newydd yn dod i rym i awdurdodau lleol fynd i’r afael ag effaith ail gartrefi a chartrefi gwag
Daw rheolau treth lleol newydd i rym ar 1 Ebrill 2023 a fydd yn rhoi gwell cefnogaeth i gymunedau Cymru fynd i’r afael â’r lefelau uchel o ail gartrefi ac eiddo gwag.
Mae’n nodi carreg filltir arall yn y gwaith o weithredu cyfres o fesurau sy’n cael eu cyflwyno fel rhan o ymrwymiad Cytundeb Cydweithio Llywodraeth Cymru gyda Phlaid Cymru i fynd i’r afael ag effaith ail gartrefi a chartrefi gwag ar gymunedau ar hyd a lled y wlad.
Darllenwch y cyhoeddiad yn llawn ar Llyw.Cymru.
Coroni Brenin Charles III
Ydych chi'n trefnu digwyddiad dros benwythnos gŵyl y banc rhwng 6 ac 8 Mai pan fydd Brenin Charles III yn cael ei goroni?
Rhowch wybod inni er mwyn inni fedru helpu i rannu’r manylion a'u hychwanegu at y wefan. Anfonwch e-bost atom ar cronfaddata.cynyrch@llyw.cymru.
Adroddiadau Ailgysylltu Defnyddwyr Croeso Cymru
Mae Adroddiadau ailgysylltu defnyddwyr Croeso Cymru (19 Ionawr i 3 Chwefror 2023) wedi’u cyhoeddi. Mae’r adroddiadau yn berthnasol i’r DU ac Iwerddon, yr Almaen a’r UDA. Maent yn seiliedig ar waith maes a gynhaliwyd yn ystod y cyfnod rhwng 19 Ionawr a 3 Chwefror 2023, ymysg ymholwyr Croeso Cymru.
Gwnaeth 61% o ymholwyr Croeso Cymru o’r DU ac Iwerddon fynd ar wyliau neu wyliau byr yng Nghymru yn 2022. Nododd 22% o’r rhain fod y cyfathrebu gan Croeso Cymru wedi dylanwadu ar eu penderfyniad i fynd ar eu gwyliau neu wyliau byr yng Nghymru.
Mae’r casgliadau ynghylch teithiau a wnaed i Gymru yn ystod 2022 gan ymholwyr o’r Almaen a’r UDA hefyd ar gael yn yr adroddiadau.
Mae’r adroddiadau hefyd yn cynnwys casgliadau ynghylch teithiau i Gymru yn 2022, profiadau ymholwyr a ymwelodd â Chymru yn 2022, bwriadau i ymweld â Chymru yn 2023 ac effaith gwaith marchnata Croeso Cymru.
Llwybr Arfordir Ceredigion yn dathlu 15 mlynedd
Mae Llwybr Arfordir Ceredigion yn dathlu 15 mlynedd ers ei agor yn swyddogol. Agorwyd y llwybr yn 2008 a hwn oedd ond yr ail lwybr arfordirol pell yng Nghymru. Mae’n rhan annatod o Lwybr Arfordir Cymru, sy’n ymlwybro 871 o filltiroedd o amgylch ein harfordir trawiadol.
I ddathlu’r pen-blwydd, mae Cyngor Sir Ceredigion wedi creu cyfres o 26 cylchdaith gyda phob un yn manteisio ar ran o Lwybr yr Arfordir ond yn dychwelyd i’r man dechrau drwy ddilyn llwybrau mewndirol.
Gan ddechrau ym mis Ebrill hyd at fis Hydref, bydd taith gerdded newydd yn cael ei chyhoeddi bob wythnos ar lwyfannau cyfryngau cymdeithasol y Cyngor; Facebook, Twitter ac Instagram.
Bydd e-daflenni ar gael i'w lawrlwytho neu eu hargraffu o'r wefan, ynghyd â gwybodaeth ddefnyddiol megis siart milltiroedd Llwybr yr Arfordir i’ch helpu i gynllunio’r teithiau.
I gael rhagor o wybodaeth cysylltwch â swyddfarwasg@ceredigion.gov.uk.
Parcio ar gyfer Yr Wyddfa
O 1 Ebrill 2023 ymlaen, bydd angen i ymwelwyr ragarchebu lle i barcio ym Mhen y Pass.
Mae rhagor o wybodaeth ar gael yn:
Digwyddiad lansio Yr Wyddfa Ddi-Blastig 24 Ebrill 2023
Bydd Parc Cenedlaethol Eryri yn lansio Cynllun Busnes ‘Yr Wyddfa Ddi-Blastig’ yng Ngwesty’r Royal Victoria Llanberis ar 24 Ebrill (2:00pm-4:00pm).
Bydd cyfle i’r busnesau a fydd yn mynychu’r lansiad drafod â’r Awdurdod er mwyn datblygu’r weledigaeth o leihau plastigau untro a mynychu ffair fasnach fach gyda chyflenwyr lleol a fydd yn arddangos dewisiadau amgen di-blastig.
I gael rhagor o wybodaeth ewch i: Lansio: Cynllun Busnes Yr Wyddfa Ddi-blastig | Parc Cenedlaethol Eryri.
Cyfle i ddweud eich dweud ynghylch Cymwysterau Lletygarwch ac Arlwyo newydd yng Nghymru – helpwch ni i ledaenu’r neges
Dros y ddwy flynedd ddiwethaf, mae Cymwysterau Cymru wedi cwblhau adolygiad sector helaeth o gymwysterau yn y sector Teithio, Twristiaeth, Lletygarwch ac Arlwyo.
Nododd ein hadolygiad rai problemau gyda’r cymwysterau Lletygarwch ac Arlwyo sy’n cael eu cynnig yng Nghymru ar hyn o bryd. Felly, mae Cymwysterau Cymru wedi creu cynigion ar gyfer cymwysterau Lletygarwch ac Arlwyo newydd ar gyfer dysgwyr ôl-16 yng Nghymru, ac rydyn ni eisiau gwybod beth yw eich barn amdanyn nhw.
Bydd yr ymgynghoriad yn cau am hanner nôs ar 2 Mehefin 2023. I gael rhagor o fanylion ewch i dweudeichdweud.cymwysterau.cymru.
Cyngor am Ynni i fusnesau Cymru
Yn sgil cynnydd mewn prisiau ynni, mae effeithlonrwydd ynni yn cael tipyn o sylw. Mae Busnes Cymru, Cyngor Busnes Gogledd Cymru, Uchelgais Gogledd Cymru, mewn cydweithrediad â Gwasanaeth Ynni Llywodraeth Cymru, wedi crynhoi rhai atebion effeithlonrwydd ynni 'cost isel a dim cost', i helpu busnesau ac unigolion i liniaru yn erbyn costau ynni cynyddol eleni.
Ewch i wefan Busnes Cymru am fwy o fanylion.
Cynllun Gostyngiad mewn Biliau Ynni
Dysgwch am y Cynllun Gostyngiad mewn Biliau Ynni (EBDS) i gwsmeriaid annomestig.
Bydd y Cynllun Gostyngiad mewn Biliau Ynni ar gael am 12 mis o 1 Ebrill 2023 hyd 31 Mawrth 2024. Mae’r cynllun hwn yn disodli’r Cynllun Rhyddhad ar Filiau Ynni a oedd yn cefnogi busnesau a sefydliadau rhwng 1 Hydref 2022 a 31 Mawrth 2023.
Ewch i wefan Busnes Cymru am fwy o fanylion.
NODYN ATGOFFA: Awdurdodiad Teithio Electronig
Trwydded i gael mynediad i Brydain yw’r Awdurdodiad Teithio Electronig a fydd ar gael yn fuan ar-lein.
Bydd yn galluogi teithwyr o wledydd cymwys i ymweld â Phrydain Fawr am nifer o wahanol resymau heb gael visa.
Bydd yr UK ETA ar gael yn y blynyddoedd nesaf. Unwaith y caiff ei gyflwyno bydd angen caniatâd ar ymwelwyr tramor, gan gynnwys y rhai o wledydd sydd wedi’u heithrio rhag gofynion visa, i ddod i mewn i’r DU.
Offer gwirio seiber ar gyfer BBaChau
Mae'r Ganolfan Seiberddiogelwch Genedlaethol (NCSC) wedi lansio dau offeryn diogelwch newydd wedi'u hanelu at fusnesau bach, microfusnesau, sefydliadau ac unig fasnachwyr sydd heb yr adnoddau i fynd i'r afael â materion seiber. Dadorchuddiodd y Ganolfan Seiberddiogelwch Genedlaethol – sy'n rhan o Bencadlys Cyfathrebu'r Llywodraeth – y gwasanaethau i gyd-fynd â cham diweddaraf ei hymgyrch Cyber Aware.
Ewch i wefan Busnes Cymru am fwy o fanylion.
Gwobrau Merched Cymru Mewn Busnes 2023
Mae #LlaisAwards, sef Gwobrau Merched Cymru Mewn Busnes 2023 yn agored i unrhyw ferch sy'n rhedeg busnes yma yng Nghymru. Bydd y cyfnod enwebu ar agor tan 5pm ddydd Mercher, 19eg o Ebrill 2023. Ewch i wefan Busnes Cymru am fwy o fanylion.
Gwefan 'Helpu i Dyfu' newydd ar gyfer busnesau
Mae'r Adran Busnes a Masnach (DBT) wedi datgelu gwefan ganolog newydd, wedi'i thargedu at helpu 5.5 miliwn o fusnesau'r DU. Nod safle newydd 'Helpu i Dyfu' yr Adran Busnes a Masnach yw uwchsgilio busnesau mawr a bach ledled y wlad trwy eu helpu i:
- Ddysgu sgiliau newydd
- Cyrraedd mwy o gwsmeriaid
- Hybu elw busnesau
Ewch i wefan Busnes Cymru am fwy o fanylion.
Pecyn Cymorth Sero Net Lleoedd
Mae Energy Systems Catapult wedi datblygu Pecyn Cymorth Sero Net sy'n seiliedig ar Leoedd ar gyfer awdurdodau lleol, rhwydweithiau ynni, busnesau, cymunedau ac arloeswyr i gyflymu atebion di-garbon.
Mae pob lle lleol yn unigryw a bydd y strategaeth ddatgarboneiddio gywir yn dibynnu ar ddaearyddiaeth, mathau o adeiladau, seilwaith ynni, galw am ynni, adnoddau, cynlluniau twf trefol ac uchelgeisiau carbon isel y gymuned leol. Ewch i wefan Busnes Cymru am fwy o fanylion.
Gwasanaethau ychwanegol GWR oar gyfer Caerfyrddin
O 21 Mai 2023 bydd GWR yn cynyddu nifer y gwasanaethau uniongyrchol ar Brif Linell De Cymru rhwng Llundain a Chaerfyrddin. Bydd y rhain yn cynnwys gwasanaethau Abertawe sy’n cael eu hestyn i gynnwys Llanelli a Chaerfyrddin.
Mae GWR yn gweithredu un trên uniongyrchol y dydd ar hyn o bryd ond bydd y ddarpariaeth yn cynyddu i chwe gwasanaeth uniongyrchol y dydd o ddydd Llun i ddydd Sadwrn (bydd tri gwasanaeth y dydd ar ddydd Sul) yn syth o Lundain i Lanelli, Pen-bre a Phorth Tywyn a Chaerfyrddin (ac i’r gwrthwyneb) gan alw hefyd yn Reading, Swindon, Bristol Parkway, Casnewydd, Caerdydd Canolog, Pen-y-bont ar Ogwr, Port Talbot, Castell-nedd ac Abertawe.
Yn ogystal, bydd gwasanaeth Haf GWR rhwng Llundain a Doc Penfro ar ddydd Sadwrn yn ailddechrau, a hynny am y tro cyntaf ers haf 2019 cyn COVID. Bydd un gwasanaeth uniongyrchol ar ddydd Sadwrn yn unig a fydd yn gwasanaethu Sir Gaerfyrddin a Sir Benfro, gan alw hefyd yn Ninbych-y-Pysgod. Ni fydd y gwasanaeth hwn ond ar gael o 27 Mai hyd 9 Medi 2023.
Ewch i wefan GWR i gael rhagor o fanylion: Trenau i Sir Gaerfyrddin | Tocynnau Tren Rhad Sir Gaerfyrddin (gwr.com).
Llwybr newydd rhwng Maes Awyr Caerdydd a Paris-Orly gydag Air France/Eastern Airways
O 21 Ebrill 2023, bydd Air France yn ailgyflwyno teithiau dyddiol rhwng prifddinas Cymru a phrifddinas Ffrainc, gan sbarduno twf pellach ym Maes Awyr Caerdydd rhwng cyrchfannau busnes allweddol. Bydd hyn yn hwb i adfywiad y Maes Awyr, yn unol â’i gynllun adfer pum mlynedd. Caiff y gwasanaeth ei gynnal gan Eastern Airways o’r DU, a bydd modd i deithwyr archebu drwy wefan Air France – neu fel arall drwy wefan Eastern Airways.
Trwydded i chwarae cerddoriaeth fyw neu gerddoriaeth wedi’i recordio
Mae’n ofynnol i fusnesau sy’n chwarae cerddoriaeth yn gyhoeddus neu yn eu safleoedd, gan gynnwys cerddoriaeth fyw a cherddoriaeth gefndir ar CD, radio neu sianel gerddoriaeth dderbyn trwydded o’r enw ‘TheMusicLicence’.
Gallwch gael rhagor o wybodaeth, gan gynnwys ble y mae angen trwyddedau, yma : Os ydych chi’n chwarae cerddoriaeth fyw neu wedi’i recordio yn eich busnes, bydd angen trwydded arnoch chi! | Busnes Cymru (llyw.cymru)
Mynnwch yr wybodaeth ddiweddaraf drwy newyddion y diwydiant
Edrychwch ar gylchlythyron a bwletinau diweddaraf ir diwydiant gan Croeso Cymru: Cylchlythyrau/Bwletinau Twristiaeth | Drupal (llyw.cymru).
Mae'r rhain yn cynnwys newyddion diweddaraf y diwydiant twristiaeth o Gymru a gwybodaeth i'r diwydiant ar Coronafeirws (COVID-19).
Ar gyfer cymorth a chyngor penodol i fusnesau ynglŷn â delio â coronafeirws, o gynllunio ariannol a chynllunio cadwyni cyflenwi i gael cyngor ar faterion staffio, cynghorir busnesau twristiaeth a rhanddeiliaid yng Nghymru i ymweld â gwefan Busnes Cymru neu ffonio llinell gymorth busnes Cymru ar 03000 6 03000. Dylech ddarllen gwefan Iechyd Cyhoeddus Cymru yn rheolaidd i gael yr wybodaeth ddiweddaraf am iechyd y cyhoedd i chi, eich staff a'ch ymwelwyr.
|
