Pecyn £45 miliwn i hyfforddi staff a helpu busnesau bach a chanolig yng Nghymru i dyfu
Heddiw, cyhoeddodd Gweinidog yr Economi Llywodraeth Cymru, Vaughan Gething, becyn £45 miliwn o gyllid a fydd yn helpu busnesau bach ledled Cymru i dyfu a chefnogi miloedd o bobl i hyfforddi i weithio mewn sectorau allweddol.
Fel rhan o'r pecyn, bydd £35 miliwn yn helpu busnesau bach a chanolig (BBaCh) yng Nghymru i ail-ddechrau, datblygu, datgarboneiddio a thyfu i helpu i sbarduno adferiad economaidd Cymru. Bydd y cyllid yn cefnogi mwy na 1,000 o fusnesau, yn helpu i greu 2,000 o swyddi newydd ac yn diogelu 4,000 o swyddi eraill.
Mewn menter ar y cyd rhwng Gweinidog yr Economi a'r Gweinidog Addysg a'r Gymraeg, Jeremy Miles, mae £10 miliwn ychwanegol ar gael i roi hwb i Gyfrifon Dysgu Personol poblogaidd Cymru. Bydd hyn yn galluogi colegau addysg bellach i ddarparu cyrsiau a chymwysterau ychwanegol a fydd yn helpu 2,000 o bobl i fanteisio ar ystod ehangach o gyfleoedd ar gyfer swyddi ac ennill cyflog mewn sectorau â blaenoriaeth sy'n wynebu prinder llafur.
Bydd cyllid yn cael ei dargedu'n benodol at ail-gysylltu gyda ac ail-hyfforddi staff i ddychwelyd i'r gwaith yn y GIG ac ym maes gofal cymdeithasol, hyfforddi mwy o yrwyr lorïau HGV, ailsgilio unigolion i ymateb i gyfleoedd gwaith newydd cyffrous mewn adeiladu gwyrdd ac ynni adnewyddadwy, a sicrhau bod mwy o gogyddion, staff aros a staff blaen tŷ hyfforddedig i weithio yn sector lletygarwch ffyniannus Cymru.
Dywed gweinidogion y bydd y pecyn sylweddol yn helpu i gefnogi economi Cymru drwy fisoedd y gaeaf.
Y £35 miliwn ar gyfer busnesau bach a chanolig yw cam nesaf Llywodraeth Cymru o adfer yr economi ac mae'n gam pwysig tuag at ailsefydlu cydnerthedd o fewn economi Cymru a pharhau i ddatgarboneiddio sector busnes Cymru.
Yn cael ei weinyddu gan awdurdodau lleol, mae'n rhoi cyfle i roi hwb i'r economi a'i datblygu yn dilyn effaith y Coronafeirws ac ymadawiad y DU â'r UE.
Gwahoddir busnesau i nodi ffyrdd y bydd buddsoddiad yn eu helpu i ail-lansio eu busnes, ei ddatblygu mewn ffyrdd newydd arloesol, a chreu swyddi newydd.
Bydd hefyd yn cefnogi busnesau i fynd i'r afael â rhai o'r prif faterion sy'n wynebu Cymru, megis mynd i'r afael â bylchau mewn sgiliau mewn rhai sectorau, uwchsgilio'r gweithlu presennol, sicrhau gwaith teg i weithwyr a mynd i'r afael â newid yn yr hinsawdd - gyda Gweinidogion yn chwilio am gynigion a fydd yn helpu Cymru i gyrraedd ei tharged allyriadau di-garbon net sy'n gyfreithiol rwymol erbyn 2050.
Bydd disgwyl i fusnesau gyfateb i unrhyw grantiau sydd ar gael gan Lywodraeth Cymru.
Disgwylir y bydd y £35 miliwn yn cefnogi tua 1,000 o fusnesau, gan eu helpu i greu 2,000 o swyddi newydd a diogelu 4,000 o swyddi eraill. Bydd yn helpu i ysgogi gwerth £40 miliwn o fuddsoddiadau gan fusnesau eu hunain, a fydd yn helpu i gefnogi creu 50 o fentrau newydd.
Bydd y £10 miliwn ar gyfer colegau addysg bellach yn golygu ehangu Cyfrifon Dysgu Personol ymhellach, a fydd yn caniatáu i golegau lleol ddarparu cyrsiau a chymwysterau ychwanegol i gefnogi 2,000 o bobl i fanteisio ar ystod ehangach o gyfleoedd gwaith a chynyddu eu potensial i ennill cyflog mewn sectorau â blaenoriaeth.
Mae'r rhain yn cynnwys lletygarwch - gan gynnwys cogyddion, cynorthwywyr arlwyo, staff aros a staff blaen tŷ.
Ers dechrau pandemig Covid, mae Gweinidogion wedi buddsoddi mwy na £2.5 biliwn mewn cymorth busnes brys, gan helpu i ddiogelu dros 160,000 o swyddi a allai fod wedi'u colli fel arall.
Bydd y £35 miliwn o gyllid I BBaCh yn rhoi hwb pellach i grantiau cymorth busnes presennol awdurdodau lleol a bydd yn dechrau agor ar gyfer ceisiadau ym mis Tachwedd. Bydd angen gwneud ceisiadau'n uniongyrchol i awdurdodau lleol unwaith y bydd eu cynlluniau grant unigol ar agor.
Darllenwch y cyhoeddiad yn llawn ar Llyw.Cymru.
Cadarnhau'r camau nesaf i fynd i'r afael ag effaith perchnogaeth ail gartrefi ar gymunedau Cymru
Mae'r Gweinidog Newid Hinsawdd, Julie James, newydd rannu manylion cynllun peilot i fynd i'r afael â'r effaith y mae perchenogaeth ail gartrefi yn ei chael ar rai cymunedau yng Nghymru.
Wrth siarad yn y Senedd, cadarnhaodd y Gweinidog y bydd y peilot yn dwyn ynghyd amrywiaeth o gamau ar gyfer mynd i'r afael â’r effeithiau y gall niferoedd mawr o ail gartrefi a llety gwyliau tymor byr eu cael ar gymuned.
Dywedodd y Gweinidog wrth Aelodau’r Senedd fod Dwyfor wedi cael ei ddewis ar gyfer cynllun peilot a fydd yn cael ei lansio ym mis Ionawr gyda chymorth Cyngor Gwynedd.
Bydd cam cyntaf y cynllun peilot yn adeiladu ar y cymorth ymarferol y mae Llywodraeth Cymru eisoes yn ei ddarparu i fynd i'r afael â fforddiadwyedd a faint o dai sydd ar gael a bydd yn cael ei deilwra i ddiwallu anghenion pobl yr ardal. Bydd rhagor o fanylion yn cael eu cadarnhau yn dilyn y Gyllideb, ac mae’r Gweinidog yn awyddus i edrych ar gynlluniau rhannu ecwiti, opsiynau rhentu, a'r hyn a wnawn ynghylch cartrefi gwag.
Bydd dwy swydd bwrpasol yn cefnogi'r gwaith o gyflwyno'r cynllun peilot yn yr ardal i gysylltu'r ymyriadau, ymgysylltu â chymunedau a sicrhau'r effaith fwyaf bosibl.
Hefyd, lansiodd y Gweinidog ymgynghoriad ar newidiadau arfaethedig ym maes cynllunio.
Bydd hwn yn ceisio barn ar ddefnyddio 'gorchymyn dosbarthiadau' ym maes cynllunio a fyddai'n caniatáu i awdurdodau cynllunio lleol ei gwneud yn ofynnol gwneud ceisiadau cynllunio ar gyfer ail gartrefi ychwanegol a llety gwyliau tymor byr mewn ardaloedd lle maent yn achosi anawsterau sylweddol i gymunedau.
Bydd yr ymgynghoriad yn llywio ail gam y peilot a allai olygu gwneud newidiadau i systemau cynllunio, trethu a thwristiaeth.
Wrth siarad yn y Senedd, dywedodd y Gweinidog Newid Hinsawdd, Julie James:
"Rydym eisiau i bobl ifanc gael gobaith realistig o allu prynu neu rentu tai fforddiadwy yn yr ardal lle cawsant eu magu fel y gallant fyw a gweithio yn eu cymunedau lleol.
"Gall niferoedd uchel o ail gartrefi ail a chartrefi gwyliau mewn un ardal fygwth y Gymraeg yn ei chadarnleoedd ac effeithio ar gynaliadwyedd rhai ardaloedd gwledig.
"Rydym yn genedl groesawgar ac mae twristiaeth yn rhan bwysig o’n heconomi gan ddod â swyddi ac incwm i sawl rhan o Gymru. Ond dydyn ni ddim eisiau pentrefi sy’n orlawn o bobl yn y tymor gwyliau ond fel y bedd yn ystod misoedd y gaeaf am nad oes neb yn byw ynddynt.
"Mae'r rhain yn faterion cymhleth ac nid oes atebion cyflym. Efallai na fydd yr hyn a allai fod yn iawn i un gymuned yn gweithio i un arall. Bydd angen i ni gyflwyno amrywiaeth o gamau, does dim un bwled arian penodol yma!"
Yn ogystal, cyhoeddodd Gweinidog y Gymraeg ac Addysg, Jeremy Miles, lansiad ymgynghoriad ar fesurau ychwanegol wedi'u teilwra'n benodol ar gyfer y cymunedau hynny lle siaredir y Gymraeg yn helaeth.
Bydd hyn yn sail i Gynllun Tai mewn Cymunedau Cymraeg Llywodraeth Cymru, a bydd yn chwarae rhan bwysig yn y gwaith o gynnal cymunedau Cymraeg fel lleoedd y mae modd defnyddio'r iaith yn hwylus.
Darllenwch y cyhoeddiad yn llawn ar Llyw.Cymru.
Gwybodaeth ddefnyddiol ynghylch COVID-19
Gan fod pob safle yn wahanol, dylai busnesau ddarllen pob canllaw. Mae’r hyn yn parhau i gael eu diweddaru felly gwiriwch hwy yn rheolaidd am yr wybodaeth ddiweddaraf.
Mynnwch yr wybodaeth ddiweddaraf drwy newyddion y diwydiant
Rydyn ni wedi ymrwymo i ddarparu’r cymorth a’r sicrwydd sydd eu hangen ar fusnesau yn ystod y cyfnod anodd, ddigynsail hwn, ac rydyn ni wedi cyhoeddi nifer o fwletinau sy’n gysylltiedig â’r coronafeirws (COVID-19). Mae’r bwletinau ar gael ar dudalen Bwletinau Coronafeirws i’r Diwydiant Twristiaeth (COVID-19).
Mae Busnes Cymru yn rhoi cymorth a chyngor wedi'i deilwra i fusnesau ynglŷn â delio â coronafeirws, o gynllunio ariannol a chynllunio cadwyni cyflenwi i gael cyngor ar faterion staffio. Cynghorir busnesau twristiaeth a rhanddeiliaid yng Nghymru sy'n dymuno cael canllawiau penodol i ymweld â gwefan Busnes Cymru neu ffonio llinell gymorth busnes Cymru ar 03000 6 03000, ac ymweld yn rheolaidd gwefan Iechyd Cyhoeddus Cymru i gael y wybodaeth ddiweddaraf am iechyd y cyhoedd i chi, eich staff a'ch ymwelwyr.
|
