Rhestr wirio hunanasesu bioddiogelwch Parth Atal Ffliw Adar

Gan fod y risg o Ffliw Adar wedi’i chynyddu, Rydym wedi cynhyrchu Rhestr wirio hunanasesu bioddiogelwch Parth Atal Ffliw Adar.

Cyhoeddi rheoliadau newydd i fynd i’r afael â llygredd amaethyddol yng Nghymru

Ar 27 Ionawr cyhoeddodd Gweinidog yr Amgylchedd, Ynni a Materion Gwledig, Lesley Griffiths, reoliadau newydd i fynd i’r afael â lefelau annerbyniol parhaus llygredd amaethyddol yng Nghymru. Daw Rheoliadau Adnoddau Dŵr (Rheoli Llygredd Amaethyddol) (Cymru) 2021 i rym ar 1 Ebrill 2021 gan gynnwys cyfnodau pontio i gyflwyno rhai mesuriadau yn raddol hyd at 1 Awst 2024.
Mae'r Rheoliadau'n sefydlu safonau sylfaenol yng Nghymru, sy'n gyffelyb i'r rhai yng ngweddill y DU ac Ewrop ac maent yn gymesur, gan ganolbwyntio ar y ffermydd hynny lle mae'r risg amgylcheddol yn deillio o reoli slyri gwael ar ei uchaf.

Y wybodaeth ddiweddaraf am Reoli Tir yn Gynaliadwy

Rydym wedi cyhoeddi ymgynghoriad Papur Gwyn sy'n nodi'r cynlluniau ar gyfer cam nesaf y polisi amaethyddol yng Nghymru. Mae'r papur yn gosod y cefndir ar gyfer Bil Amaethyddiaeth (Cymru) a fydd yn cael ei gyflwyno yn nhymor nesaf y Senedd. Mae’n cymryd rhai o’r syniadau a gyflwynwyd gennym yn “Ffermio Cynaliadwy a'n Tir” ac yn adeiladu arnynt, yn dilyn yr ymatebion a gawsom.
Rydym yn croesawu eich barn ar hyn ac yn eich annog i ymateb i'r ymgynghoriad.

Newidiadau i Gynllun y Taliad Sylfaenol 2021

Mae crynodeb o'r ymatebion i'r ymgynghoriad ar Ffermio Cynaliadwy a'n Tir: symleiddio cymorth amaethyddol bellach ar gael. Bydd manylion llawn y newidiadau i BPS yn cael eu darparu yng nghanllaw Ffurflen Cais Sengl 2021. Bydd hwn ar gael yn gynnar yn 2021.

Trosglwyddo Hawliau BPS 2021 bellach ar agor

Gall ffermwyr drosglwyddo’u Hawliau BPS trwy eu gwerthu, eu lesio neu drwy ewyllys. Agorodd cyfnod trosglwyddo 2021 ar 4 Ionawr 2021.

Bydd ffurflenni Trosglwyddo Hawliau ar gael ichi eu llenwi ar-lein ar eich cyfrif RPW Ar-lein. Gall gwerth yr hawliau a ddangosir ar eich cyfrif newid. Rhaid ichi roi gwybod inni cyn canol nos 15 Mai 2021 am unrhyw hawliau sydd wedi’u trosglwyddo er mwyn ichi allu hawlio ar yr hawliau a gewch yn 2021.

Trawsgydymffurfio – 2021

Mae’r rhan fwyaf o reolau ynghylch Trawsgydymffurfio yn parhau’n berthnasol a heb eu newid ers 2020. Mae rhai taflenni ffeithiau wedi’u diwygio ar gyfer 2021 fodd bynnag. Y rheswm am hyn yw newidiadau mewn gofynion ac arferion da, ac egluro rhywfaint o’r geiriad. Mae newidiadau hefyd i’r Safonau Dilysadwy ynghylch Trawsgydymffurfio ar gyfer 2021 mewn perthynas â dosbarthu achosion o dorri Amodau Amaethyddol ac Amgylcheddol Da (GAEC) a Gofynion Rheoli Statudol.

Dylech wirio ac adolygu rheoliadau ynghylch Trawsgydymffurfio yn rheolaidd.

EIDCymru yn 5 mlwydd oed y mis hwn!

EIDCymru yw ein gwasanaeth ar-lein am ddim ar gyfer adrodd symudiadau defaid, geifr a cheirw. Gall ceidwaid adrodd symudiadau ar-lein gan ddefnyddio EIDCymru ar-lein 24 awr y dydd, 7 diwrnod yr wythnos.

Gallwch ddefnyddio EIDCymru i:

• adrodd ar symudiadau mewn perthynas â’ch daliad gan ddefnyddio’r swyddogaethau creu symudiad neu dderbyn symudiad
• gweld y cofnodion ynghylch symudiadau ar gyfer anifeiliaid ar eich daliad
• anfon gwybodaeth yn electronig er mwyn datrys unrhyw broblemau
• cwblhau eich stocrestr flynyddol defaid a geifr ar-lein

Cysylltwch â EIDCymru, neu ffôn 01970 636959, os oes angen rhagor o gymorth arnoch.

Dyddiad cau gosod microsglodion ceffylau: 12 Chwefror 2021 

Daeth y Rheoliadau Adnabod Ceffylau i rym ym mis Chwefror 2019. Maent yn disgrifo cyfrifoldebau ceidwaid, perchnogion neu fridwyr ceffylau. Maent hefyd yn nodi gofyniad i adnabod ceffylau, ebolion, asynnod neu anifeiliaid sy’n perthyn iddynt drwy osod microsglodyn arnynt, yn ogystal â phasbort. Os dymunwch drafod y dyddiad cau hwn, cysylltwch â ni.

Y Gymdeithas Ddefaid Genedlaethol yn helpu aelodau i ddod o hyd i dîm wyna

Mae Rhestr Wyna'r Gymdeithas Ddefaid Genedlaethol (NSA) ar gyfer tymor wyna 2020/2021 bellach ar gael.
Mae'r Rhestr Wyna yn cysylltu aelodau ffermio defaid yr NSA sydd angen cymorth amser wyna gyda myfyrwyr amaethyddol a milfeddygol sy'n chwilio am leoliad profiad gwaith fel rhan o'u hastudiaethau.

Unedau Pesgi Cymeradwy a Gwerthiannau Penodol TB (marchnadoedd oren)

Mae'r Unedau Gorffen Cymeradwy (AFU) bellach yn weithredol. Ym mis Tachwedd 2020 cynhaliwyd marchnad beilot ar gyfer Gwerthiannau Penodol TB. O ganlyniad, o 1 Ionawr 2021, bydd marchnadoedd eraill yn Ardal TB Uchel Cymru yn gallu gwneud cais am gymeradwyaeth i gynnal Arwerthiant Penodol i TB. Bydd hyn am gyfnod o 12 mis ac yn cael ei adolygu wedi hynny.

Ymgynghoriad Papur Gwyn Amaeth yng Nghymru: gweminar

Mae’r Papur Gwyn Amaethyddiaeth yng Nghymru yn disgrifio’r cynlluniau ar gyfer y newid mwyaf mewn polisi amaeth a fu efallai ers degawdau. Rydym yn cynnig dod â’r Cynllun Taliad Sylfaenol (BPS) a chynlluniau amaeth amgylcheddol eraill yr UE i ben a sefydlu cynllun cymorth uniongyrchol sengl yn eu lle. Bydd y newidiadau hyn yn effeithio ar eich ffordd o ffermio ac mae’n bwysig ein bod yn clywed eich barn ar y cynigion. Bydd y digwyddiad yma yn rhoi cyfle i chi ofyn cwestiynau yn uniongyrchol i’r rhai sy’n ymwneud â datblygu’r polisi.

Ymgeisiwch ar gyfer cyllid sgiliau Cyswllt Ffermio

Mae’r cyfnod ar gyfer ymgeisio am gyllid sgiliau Cyswllt Ffermio ar agor nes y 26 Chwefror. Mae cymhorthdal o hyd at 80% ar gael ar gyfer cyrsiau gyda darparwyr hyfforddiant cymeradwy.

Deddfwriaeth Isafswm Cyflog Amaethyddol - Hoffem glywed eich barn

Mae'r Panel Annibynnol Adborth Amaethyddiaeth yn cynghori Gweinidogion Cymru ar yr isafswm cyflog amaethyddol a thelerau ac amodau cyflogaeth gweithwyr yn y sectorau amaeth, garddwriaeth a choedwigaeth. Hoffem glywed eich barn a'ch profiadau o'r isafswm cyflog amaethyddol yng Nghymru. Mae'r Isafswm Cyflog Amaethyddol yn ei bumed flwyddyn. Mae'n bwysig sicrhau ei fod yn parhau i gwrdd ag anghenion diwydiant sy'n esblygu. Rydym wedi comisiynu ADAS i gynnal arolwg ar gyflogaeth amaethyddol yng Nghymru. Bydd yr arolwg ar agor tan 31 Ionawr 2021.

Cynllun Gweithredu Cenedlaethol y DU ar gyfer Defnyddio Plaladdwyr yn Gynaliadwy

Dweud eich dweud ar y ‘Cynllun Gweithredu Cenedlaethol ar gyfer Defnyddio Plaladdwyr yn Gynaliadwy’.
Mae Defra, Llywodraeth Cymru, Llywodraeth yr Alban a Chynulliad Gogledd Iwerddon yn holi barn ar y Cynllun Gweithredu Cenedlaethol ar gyfer Defnyddio Plaladdwyr yn Gynaliadwy. Y nod yw lleihau risgiau ac effaith plaladdwyr i iechyd dynol a’r amgylchedd. Ac ar yr un pryd sicrhau fod plâu a ymwrthedd plaladdwyr yn cael eu rheoli’n effeithiol.

Ymadael â’r UE: adnoddau 

Gan fod Cyfnod Pontio’r DU bellach wedi dod i ben, mae Llywodraeth Cymru yn parhau i ddiweddaru canllawiau ar gyfer busnesau sy’n masnachu â’r UE, a chyda Gogledd Iwerddon. Mae’r wybodaeth ddiweddaraf am y modd y gall eich busnes addasu i’r rheolau masnachu newydd ar gael ar wefan Paratoi Cymru, a hefyd ar Porth Cyfnod Pontio’r UE Busnes Cymru. Cofiwch hefyd ymweld â gwefan https://www.gov.uk/transition sydd bellach yn cynnwys y gwiriwr Brexit a fydd yn rhoi rhestr wedi’i bersonoli o gamau gweithredu ar eich cyfer chi, eich busnes a’ch teulu.

Uned Gymorth Rhwydwaith Gwledig Cymru (UGRGC)

Mae'r UGRGC yn cynorthwyo cyfnewid syniadau rhwng sefydliadau gwledig. Mae ar gael i unrhyw un:

• gyda diddordeb mewn datblygu gwledig
• ymwneud â Chymunedau Gwledig Llywodraeth Cymru – Rhaglen Datblygu Gwledig 2014-2020 a'r cynlluniau y mae'n eu hariannu.

Tîm Cysylltwyr Fferm

Cymorth un-i-un cyfrinachol. Os ydych angen trafod unrhyw beth cysylltwch gyda un o’r swyddogion.