Yn dilyn proses o ymgysylltu helaeth ynghylch datblygu cynlluniau mae fersiwn ddrafft derfynol wrthi'n cael ei chyfieithu a'i dylunio cyn iddi gael ei chyflwyno i'w chymeradwyo gan y Gweinidog. Bydd angen i'r cynllun gael ei gymeradwyo gan Lesley Griffiths, Gweinidog yr Amgylchedd, Ynni a Materion Gwledig, cyn iddo gael ei fabwysiadu a'i gyhoeddi.

Gan fod Cynllun Morol Cenedlaethol Cymru yn cynnwys nifer o swyddogaethau nad ydynt wedi'u datganoli i Gymru bydd angen cymeradwyaeth yn ogystal gan Ysgrifennydd Gwladol Llywodraeth y DU ar gyfer Adran yr Amgylchedd, Bwyd a Materion Gwledig (DEFRA). Mae swyddogion Llywodraeth Cymru wedi bod yn trafod â swyddogion polisi y DU gan gynnwys DEFRA gydol y broses o ddatblygu'r cynllun. Bydd y cynllun yn cael ei gymeradwyo'n derfynol yn ystod yr Haf.

Bydd cyfres o ddogfennau ategol yn cyd-fynd â'r cynllun adeg ei gyhoeddi gan gynnwys Adroddiad Crynodeb o Newidiadau, Arfarniad o Gynaliadwyedd, datganiad ar ôl mabwysiadu ac Asesiad o Reoliadau Cynefinoedd. Bydd deunyddiau ategol eraill yn cael eu datblygu maes o law yn ogystal gan gynnwys: Canllawiau Gweithredu a Fframwaith Monitro ac Adrodd.

Daw Cynllun Morol Cenedlaethol cyntaf Cymru i rym ar y diwrnod mabwysiadu. O'r dyddiad hwn bydd unrhyw benderfyniadau gan awdurdodau cyhoeddus a allai effeithio ar faes y cynllun, er enghraifft trwyddedau morol, yn cyfeirio at y cynllun wrth ystyried cais am ddatblygiad.

Rydym wedi cynnal ein trydydd cyfarfod wyneb yn wyneb ag awdurdodau cyhoeddus perthnasol sydd â dyletswyddau mewn perthynas â Chynllun Morol Cenedlaethol Cymru o dan A58 o Ddeddf y Môr a Mynediad i'r Arfordir 2009. Cynhaliwyd cyfarfod o Grŵp y Penderfynwyr Cynllunio Morol ar 10 Gorffennaf a thrafodwyd y canllawiau gweithredu a fyddai'n cyd-fynd â'r Cynllun Morol Cenedlaethol, syniadau o ran gweithredu'r cynllun a chynigion ar gyfer monitro ac adrodd ar gynnydd y Cynllun Morol Cenedlaethol. Gallwch weld crynodeb o'r cyfarfod yma. I gael rhagor o wybodaeth am y grŵp neu os ydych o'r farn y dylai eich sefydliad fod yn aelod ohono ewch i'n gwefan.

Mae contract bellach yn fyw ar GwerthwchiGymru sy'n gwahodd tendrau ar gyfer cefnogi gwaith mapio adnoddau Llywodraeth Cymru. Mae'r gwaith yma yn rhan o waith ehangach y tîm Cynllunio Morol ar gyflwyno dull gofodol o gefnogi gwaith gweithredu'r cynllun. Rydym yn chwilio am sefydliad a fydd yn adolygu dulliau o fapio System Gwybodaeth Ddaearyddol o safbwynt 'cyfyngiadau meddal' a datblygu methodoleg wedi'i theilwra i Gymru ar gyfer adnabod SRA a phennu a chyflwyno cyfyngiadau gofodol perthnasol. Y dyddiad cau yw 5 Awst.

Gwnaeth swyddogion fynychu cyfarfod o Fforwm Morol Môr Iwerddon yn Belfast fis diwethaf. Mae'r fforwm yn cynnwys cynrychiolwyr o Lywodraeth Cymru, Llywodraeth yr Alban, Llywodraeth Gogledd Iwerddon, Llywodraeth Iwerddon, Llywodraeth Ynys Manaw, y Sefydliad Rheoli Morol a Phrifysgolion sy'n cyflawni prosiectau morol ar Fôr Iwerddon. Cynhaliwyd y cyfarfod gan Brifysgol Ulster a chafwyd diweddariadau gan y cynrychiolwyr ynghylch eu cynlluniau gofodol morol a phrosiectau eraill sy'n digwydd ar Fôr Iwerddon. Tra roeddem yn Belfast cawsom gyflwyniad gan Swyddfa Comisiynydd yr Harbwr a rhith-daith o amgylch Harbwr Belfast. Trafodwyd llwyddiannau eu cynlluniau adfywio yn ystod y cyflwyniad hwn.

Bydd pump o borthladdoedd Cymru a Môr Iwerddon yn elwa ar brosiect newydd gwerth €2.6m sy'n cael ei ariannu gan yr Undeb Ewropeaidd (UE) i helpu i'w trawsnewid o fod yn fannau y mae pobl yn pasio drwyddynt yn unig i fod yn fannau allweddol i dwristiaid.Bydd y prosiect yn gwella cyfleoedd twristiaeth, profiadau twristiaid ac yn cefnogi bywoliaeth cymunedau arfordirol bob ochr i Fôr Iwerddon. Mae Eluned Morgan, Gweinidog Cysylltiadau Rhyngwladol Llywodraeth Cymru, wedi cyhoeddi'r newyddion am y Prosiect Porthladdoedd, Ddoe a Heddiw, sy'n rhan o Raglen Gydweithredu Iwerddon Cymru, yn ystod ymweliad â Gweriniaeth Iwerddon. Rhagor o wybodaeth

Mae diwydiant ynni'r llanw yn y Gogledd wedi cael hwb sylweddol heddiw ar ôl i Lywodraeth Cymru fuddsoddi £12.6m o gyllid yr UE yng nghwmni datblygu Minesto ar Ynys Môn. Bydd y cyllid hwn yn cefnogi cam nesaf prosiect arloesol y cwmni lle bydd barcutiaid tanddwr yn cynhyrchu ynni o lif y llanw. Bydd y cyllid hwn yn cefnogi cam nesaf prosiect arloesol y cwmni lle bydd barcutiaid tanddwr yn cynhyrchu ynni o lif y llanw a'r môr. Rhagor o wybodaeth

Bydd Brexit a'n Moroedd yn llywio ein polisi ynghylch pysgodfeydd yn y dyfodol, a hynny wrth i'r DU baratoi i ymadael â'r Undeb Ewropeaidd. Rydym wrthi'n ymgynghori ynghylch y cam cyntaf o ran creu polisi newydd, trefn o reoli a deddfwriaeth. Rydym am glywed eich barn chi am y canlynol:

• rheoli pysgodfeydd
• pysgodfeydd cynaliadwy
• cyfleoedd pysgota
• pysgod cregyn a dyframaethu
• masnach
• twf ac arloesedd
• cynaliadwyedd fflyd
• tystiolaeth 
• cymorth ariannol

Mynegwch eich barn erbyn 21 Awst 2019.

Hoffem glywed eich barn ynghylch mesurau rheoli ar gyfer 14 o rywogaethau goresgynnol estron gan gynnwys cranc manegog Tsieina.

Rydym yn ymgynghori ar y cyd â Llywodraeth y DU ar fesurau rheoli arfaethedig â'r nod: 

• waredu
• rheoli poblogaethau
• atal rhag lledaenu

Mynegwch eich barn erbyn 12 Medi 2019.