Yn y sylwadau a gyflwynwyd gan randdeiliaid mewn ymateb i ymgynghoriad ar ddrafft yr WNMP (dWNMP), dywedwyd bod angen canllawiau gweithredu manwl a oedd yn wreiddiol yn rhan o'r dWNMP. Fodd bynnag, yn ôl nifer o'r rhanddeiliaid, roedd hyd y canllawiau hynny, a'u cymhlethdod, yn golygu nad oedd polisïau ac amcanion allweddol y Cynllun yn glir.

Fel rhan o'r broses cynllunio morol, rydym wedi creu Porth Cynllunio Morol sy'n galluogi defnyddwyr i weld ac i ddeall tystiolaeth ofodol sy'n ymwneud â Moroedd Cymru. Wrth inni symud yn ein blaenau i fabwysiadu Cynllun Morol Cenedlaethol Cymru, byddwn yn defnyddio'r Porth i gyflwyno'r wybodaeth ddiweddaraf y gall y rheini sy'n gwneud penderfyniadau ei hystyried wrth wneud penderfyniadau cynllunio. Mae rhagor o wybodaeth am y Porth i'w gweld yn y fideo esboniadol.

Ers i'r ymgynghoriad ddod i ben, rydym wedi bod yn gweithio ar gwblhau'r polisïau o fewn y Cynllun a phenderfynu ar ei eiriad gyda mewnbwn wrth amrywiaeth o randdeiliaid. Ar ddiwedd mis Ionawr, cynhaliom gyfarfod i roi adborth i aelodau’r Grŵp Cyfeirio Rhanddeiliaid Cynllunio Morol. Gwnaeth ein rhanddeiliaid groesawu'r drafft newydd a chydnabod y trafodaethau a fu cyn yr ymgynghoriad. Dros yr wythnosau diwethaf, rydym wedi bod yn gweithio gyda Llywodraeth Cymru ac arweinwyr polisi'r DU i gymeradwyo'r polisïau o fewn y Cynllun a bydd hyn yn cael ei gwblhau erbyn diwedd y gwanwyn. Wedyn, byddwn yn paratoi cyngor i Weinidog yr Amgylchedd, Ynni a Materion Gwledig a fydd yn cymeradwyo'r cynllun terfynol.

Gwnaethom gynnal ein hail gyfarfod wyneb yn wyneb â'r awdurdodau cyhoeddus perthnasol a fydd â dyletswyddau mewn perthynas â Chynllun Morol Cenedlaethol Cymru, o dan Adran 58 o Ddeddf y Môr a Mynediad i'r Arfordir (2009). Gwnaeth y ‘Grŵp Penderfynwyr Cynllunio Morol’ gwrdd ar 6 Chwefror, a thrafod canllawiau ar weithredu’r cynllun ac edrych yn fanwl ar y gwaith o ddatblygu astudiaethau achos. Bydd yr astudiaethau achos hyn yn rhoi enghreifftiau ymarferol o'r hyn y gallai'r gwaith o weithredu Cynllun Morol Cenedlaethol Cymru ei olygu ar gyfer penderfynwyr a datblygwyr. Cynhelir y cyfarfod nesaf ar 10 Gorffennaf. Am ragor o wybodaeth am y grŵp neu os ydych yn credu y dylai eich sefydliad fod yn aelod, ewch i'n tudalennau gwe.

Mae Llywodraeth Cymru am wybod eich barn chi am sut y dylwn ddiweddaru canllawiau rheoli a gwarchod yr amgylchedd hanesyddol morol. Mae'r amgylchedd hanesyddol morol yn cynnwys asedau treftadaeth; llongddrylliadau, cynhanes sydd dan y dŵr ac archeoleg arfordirol a rhynglanwol. Mae Rheoli Amgylchedd Hanesyddol Morol Cymru yn esbonio sut y mae Llywodraeth Cymru yn ymdrin â threftadaeth dan y môr ac mae'n cynnig canllawiau ar yr arferion gorau i'w ddiogelu a'i reoli. Gwnewch yn siŵr eich bod yn dweud eich dweud erbyn 3 Mehefin 2019.

Rydym yn edrych ar Strategaeth Gymesur yr Asesiad o'r Effaith Amgylcheddol y Sefydliad Rheoli ac Asesu Amgylcheddol mewn ymateb i ddatblygu agenda polisi a nodir yn y dWNMP. Mae'r gwaith hwn wedi cynnwys gweithdy i edrych ar sicrhau bod dull cymesur yn ymwreiddio wrth weithredu Cynllun Morol Cenedlaethol Cymru. Elfen allweddol o'r dull hwn fydd parhau i gydweithio gyda defnyddwyr a rhanddeiliaid y cynllun a byddwn yn edrych ar sut i wneud hyn dros y misoedd nesaf, er enghraifft drwy brosiect Rheoli Adnoddau Naturiol Morol yn Gynaliadwy a ariennir gan EMFF. Darllenwch fwy am Strategaeth Gymesur yr Asesiad o'r Effaith Amgylcheddol yma.

Gan symud tuag at gyflwyno Cynllun Morol Cenedlaethol Cymru, rydym yn parhau i adeiladu ar ein gwaith ymgysylltu trawsffiniol. Gwnaeth cynrychiolwyr Llywodraeth Cymru fynychu gweithdai'r Sefydliad Rheoli Morol ar gyfer De-orllewin a Gogledd-orllewin Lloegr yn ystod mis Chwefror. Mae'r cynlluniau hyn yn rhannu ffin â chynllun Cymru ac mae'n bwysig ein bod yn cydweithio yn yr ardaloedd aberol hyn.

Wrth i'r DU baratoi i ymadael âr UE, mae'n gyfnod o newid ac ansicrwydd mawr i'r diwydiant pysgota. Rydym wedi creu bwletin i roi'r newyddion diweddaraf i randdeiliaid ar ba gymorth sydd ar gael, i helpu i baratoi eich busnes a helpu ichi ddeall goblygiadau Brexit i'r diwydiant pysgota yng Nghymru. Cofrestrwch yma.