Yn ystod yr hydref, cynhaliwyd ein sesiwn ymgysylltu gyntaf gydag awdurdodau cyhoeddus perthnasol a fydd â dyletswyddau mewn perthynas â WNMP dan Adran 58 Deddf y Môr a Mynediad i’r Arfordir (2009). Er mwyn helpu’r Awdurdodau Cyhoeddus perthnasol hyn i ddeall eu rôl rydym wedi sefydlu’r Grŵp Gwneuthurwyr Penderfyniadau ar gyfer Cynllunio Morol. Bydd y grŵp yn cyfarfod am yr eildro ym mis Chwefror ac yn trafod canllawiau ar gyfer gweithredu cynlluniau ac astudiaethau achos - a fydd yn rhoi enghreifftiau ymarferol er mwyn helpu’r broses o wneud penderfyniadau mewn perthynas â’r WNMP. Am ragor o wybodaeth am y grŵp neu os ydych yn credu y dylai eich sefydliad fod yn aelod ewch i’n tudalennau gwe.

O gofio’r adborth ar yr WNMP drafft, penderfynwyd cynnull Gweithgor Technegol er mwyn ystyried y Polisi Môr-lynnoedd llanw a chanlyniadau’r Arfarniad Cynaliadwyedd ac Asesiad Rheoleiddio Cynefinoedd. Fe wnaeth y grŵp gyfarfod am y tro cyntaf ym mis Medi ac mae wedi cwrdd sawl tro ers hynny ac wedi bod yn ein helpu i bwyso a mesur y gwahanol ddewisiadau ar gyfer y polisi Ynni Carbon Isel yn WNMP. Diolch i’r grŵp am eu holl waith caled a byddwn yn derbyn eu sylwadau terfynol yn ystod yr wythnos nesaf er mwyn ein helpu i lywio polisi ELC yn yr WNMP.

Mae’r is-grŵp ar gyfer monitro ac adrodd yn chwilio am aelodau newydd, yn enwedig o’r sectorau ynni, diwydiant a Chyrff Anllywodraethol. Mae’r grŵp yn cyfarfod bob rhyw ychydig fisoedd ac mae rhai o’i dasgau’n cynnwys darparu cyfraniadau gan randdeiliaid mewn perthynas â monitro ac adrodd ar WNMP ar ôl ei fabwysiadu. Cysylltwch â Rebecca am ragor o wybodaeth.  

Mae Llywodraeth Cymru wedi dyfarnu £24,500 i Fforwm Arfordir Sir Benfro (PCF) er mwyn ariannu’n rhannol eu Prosiect Mapio Gweithgarwch Cymru. Bydd y prosiect yn mapio’r gweithgarwch cyfredol yn nyfroedd y De-orllewin a bydd yn brosiect cydweithredol ar gyfer rhanddeiliaid wedi’i ddatblygu a’i reoli gan Gyngor Partneriaeth Cymru. Bydd y data diweddaraf a dulliau newydd ar gyfer deall y capasiti cario ac effeithiau ar safleoedd penodedig, yn helpu i fynd i’r afael ag anghenion allweddol o ran tystiolaeth a nodwyd yn y WNMP drafft. Am ragor o wybodaeth am y prosiect neu i gymryd rhan cysylltwch â Paul neu Alec.

Mae’r Fframwaith Rheoli Rhwydwaith Ardaloedd Morol Gwarchodedig 2018 - 2023 a’r Cynllun Gweithredu ar gyfer Rheoli Rhwydwaith MPA 2018-2019 wedi’u cyhoeddi. Mae MPAs yn ystyriaeth bwysig wrth wneud cynlluniau morol. Roedd y Fframwaith a’r Cynllun Gweithredu’n nodi am y tro cyntaf yr holl wybodaeth sy’n berthnasol i faterion rheoli’r rhwydwaith MPAs ledled Cymru ar gyfer cynnal a gwella ei gyflwr. Mae Adran 4.1 yn tynnu sylw at bwysigrwydd cynllunio strategol fel rhan o’r gwaith o reoli ein rhwydwaith o MPAs.

Rydym yn cynnal prosiect er mwyn ystyried arferion cynllunio mewn perthynas ag ardaloedd trawsffiniol wrth ddisgwyl y WNMP cyntaf. Mae cyfarfodydd a gweithdai diweddar â rhanddeiliaid wedi ystyried y ffordd orau y gallwn gefnogi’r gwaith o reoli ardaloedd trawsffiniol a lleihau unrhyw ansicrwydd yn ffiniau ardal y Cynllun Morol. Mae’r prosiect yn adeiladu ar y gwaith ymgysylltu hwnnw a bydd yn sail i’r gwaith cydweithredu a rheoli trawsffiniol.

Bydd y Sefydliad Rheoli Morol (MMO) yn cynnal cyfres o weithdai wyneb yn wyneb a digwyddiadau ymgysylltu ar-lein ar y broses o ddatblygu nifer o’u cynlluniau. Mae’r cynlluniau ar gyfer y de-orllewin a’r gogledd-orllewin yn rhannu ffin â WNMP. Bydd yr ymgysylltu’n canolbwyntio ar; polisïau drafft o ddewis, testun i gefnogi’r fersiwn ddrafft ar gyfer polisïau gan gynnwys gweithredu; a’r camau nesaf o safbwynt cynllunio morol. Bydd yr ymgysylltu ar-lein ar gael tan 28 Chwefror. Rydym yn cydweithio’n agos â’r MMO er mwyn rhannu arferion da a deall yr hyn y mae cynllunio morol yn ei olygu.

Ar 15 Ionawr, mynychodd aelodau’r tîm Cynllunio Morol Fforwm Forwrol Môr Iwerddon a gynhelir bob dwy flynedd yn Adeilad y Pierhead, adeilad eiconig Cynulliad Cenedlaethol Cymru. Dyma’r tro cyntaf i’r Fforwm gael ei gynnal yng Nghaerdydd ac roedd yn wych gweld pa brosiectau cyffrous eraill sydd ar waith ym Môr Iwerddon. Roedd yr agenda’n cynnwys effeithiau Newid Hinsawdd ar ein harfordir, y wybodaeth ddiweddaraf am gynllunio morol ac ardaloedd morol a ddiogelir. Os nad oedd modd i chi fynychu’r gynhadledd, mae’r cyflwyniadau ar gael ar y wefan.