Croeso

Dyma ail rifyn y cylchlythyr i gadw'ch bys ar byls y datblygiadau diweddaraf a ninnau ar drothwy mabwysiadu a gweithredu Cynllun Morol Cenedlaethol cyntaf Cymru (CMCC). Wrth inni gaboli'r cynllun i'w gyhoeddi yn 2019, rydyn ni am wneud yn siŵr ein bod yn cynnwys barn rhanddeiliaid, felly da chi, cysylltwch â ni neu rannwch y cylchlythyr hon â'ch rhwydweithiau. Fe welwch y manylion cysylltu wrth droed y cylchlythyr.

Trafodaethau dros yr haf

Mae wedi bod yn brysur arnom yn ystod wythnosau'r haf wrth inni fynd ati i gyfarfod ag aelodau'r Grŵp Cyfeirio Rhanddeiliaid Cynllunio Morol i drafod nifer o'r meysydd allweddol yng Nghynllun Morol Cenedlaethol Cymru. Cynhaliwyd gweithdai yng Nghyffordd Llandudno ar 4 a 5 Gorffennaf i edrych ar y themâu allweddol a ddaeth i'r amlwg ar ôl yr ymgynghoriad, a chynhaliwyd gweithdy ar 1 Awst i edrych ar gynllunio morol o safbwynt Rheoli Adnoddau Naturiol yn Gynaliadwy a'r Dull Gweithredu sy'n seiliedig ar Ecosystemau.

Yr wythnos ddiwethaf, cynhaliwyd gweithdy i edrych yn fanylach ar yr Ardaloedd Adnoddau Strategol a nodir yn y cynllun ac ar y cysylltiad rhyngddyn nhw a'r themâu allweddol. Aed ati hefyd yn ystod y cyfarfodydd i edrych ar ffurf a chynnwys y Cynllun Morol, ar y dystiolaeth sydd ar gael ar gyfer cynllunio morol ac ar Dwf Glas. Mae gwaith yn cael ei wneud hefyd ar y cyd â rhanddeiliaid ar sut i fynd ati i fonitro ac i adrodd. Mae'r cyfraniadau gwerthfawr hyn gan randdeiliaid yn ein helpu wrth inni fynd ati i ystyried y camau nesaf. Byddwn yn rhoi golwg gyffredinol ar y ffordd ymlaen yn y cylchlythyr nesaf.

Ailwampio Cynllun Morol Cenedlaethol Cymru

At ei gilydd, roedd y rheini a ymatebodd i'r ymgynghoriad ar y Cynllun Morol, a ddaeth i ben ym mis Mawrth 2018, yn croesawu’r Cynllun, gan gynnwys ei fformat. Yn y sylwadau a gyflwynwyd gan randdeiliaid mewn ymateb i ddrafft cyntaf y Cynllun, dywedwyd bod angen canllawiau gweithredu manwl, felly aeth swyddogion ati i gynnwys canllawiau o'r fath yn fersiwn ddrafft y Cynllun Morol. Fodd bynnag, yn ôl nifer o'r rhanddeiliaid,  roedd hyd y canllawiau hynny, a'u cymhlethdod, yn golygu nad oedd polisïau ac amcanion allweddol y Cynllun mor glir ag o'r blaen.

Rydym wedi bod yn cydweithio â rhanddeiliaid dros yr haf i fireinio fersiwn ddrafft y Cynllun cyn iddo gael ei fabwysiadu, er mwyn ei gwtogi a'i wneud yn haws i'w ddefnyddio. Mae'n fwriad gennym newid ffurf y Cynllun drafft er mwyn tynnu'r canllawiau gweithredu manwl a'r dystiolaeth sy'n sail iddynt o gorff y testun a'u cynnwys mewn fframwaith ategol.

Bydd y Cynllun craidd yn fyrrach ac yn canolbwyntio ar y weledigaeth, yr amcanion a'r polisïau, gan ymateb i sylwadau gan randdeiliaid ar yr angen i'w gwneud yn haws i ddefnyddwyr ddod o hyd i'r wybodaeth allweddol. Bydd y canllawiau gweithredu manwl sydd yn y Cynllun drafft ar hyn o bryd yn cael eu cynnwys mewn cyfres o ganllawiau ategol. Bydd hynny'n caniatáu inni ddiweddaru'r canllawiau mewn da bryd ac ymateb wrth i amgylchiadau newid. Bydd o gymorth hefyd wrth ystyried y dystiolaeth ddiweddaraf ar Borth Cynllunio Morol Cymru cyn mynd ati i wneud penderfyniadau.

Y Porth Cynllunio Morol

Fel rhan o'r broses cynllunio morol, rydym wedi creu Porth Cynllunio Morol sy'n galluogi defnyddwyr i weld ac i ddeall tystiolaeth ofodol sy'n ymwneud â Moroedd Cymru. Wrth inni symud yn ein blaenau i fabwysiadu Cynllun Morol Cenedlaethol Cymru, byddwn yn defnyddio'r Porth i gyflwyno'r wybodaeth ddiweddaraf y gall y rheini sy'n gwneud penderfyniadau ei hystyried wrth wneud penderfyniadau cynllunio. Mae rhagor o wybodaeth am y Porth i'w gweld yn y fideo esboniadol.

Cyfarfod gydag Awdurdodau Cyhoeddus Perthnasol

O dan adran 58 o Ddeddf y Môr a Mynediad i’r Arfordir (2009), bydd gan Awdurdodau Cyhoeddus penodol ddyletswyddau mewn perthynas â Chynllun Morol Cenedlaethol Cymru unwaith y bydd yn cael ei fabwysiadu yn 2019. Bydd yn rhaid i'r awdurdodau hynny sydd â swyddogaethau rheoleiddio (awdurdodi neu orfodi) wneud penderfyniadau yn unol â'r dogfennau polisi morol perthnasol (Cynllun Morol Cenedlaethol Cymru a'r Datganiad Polisi Morol).

Er mwyn helpu Awdurdodau Cyhoeddus perthnasol i ddeall eu rôl yn hyn o beth, cynhaliwyd cyfres o gyflwyniadau gweminar dros y ffôn yn ystod mis Awst, a bydd cyfarfod dilynol yn cael ei gynnal ddiwedd mis Medi / ddechrau mis Hydref. Mae'r llythyr sy'n estyn gwahoddiad i'r cyfarfod hwnnw i'w weld yma. Gallwch gysylltu â ni drwy'r blwch post isod os ydych yn meddwl bod eich sefydliad chi'n gwneud penderfyniadau sy'n gysylltiedig â'r Cynllun Morol ac yr hoffech gael rhagor o wybodaeth.

Gweithio ar draws ffiniau

Cyfrannodd cynrychiolwyr ar ran Llywodraeth Cymru at y Gweithdy 'Across the Sands of Dee' a drefnwyd gan Fforwm Arfordir Gogledd Orllewin Lloegr ar gyfer y Sefydliad Rheoli Morol ar 21 Awst. Buont yn siarad hefyd am hynt y gwaith ar Gynllun Morol Cenedlaethol Cymru. Cymerodd Rachel Mulholland a Lucie Skates (Cyfoeth Naturiol Cymru) ran mewn sesiynau ar oblygiadau trawsffiniol enghreifftiau o bolisïau sydd wrthi'n cael eu datblygu yng Nghynllun Morol Gogledd-orllewin Lloegr ac ar gysylltu a thrafod â rhanddeiliaid ar draws ffiniau.

Rydym yn parhau i ddatblygu'n ffordd o weithio ar draws ffiniau ar y môr ac ar y tir. Cyflwynwyd adborth cadarnhaol am Gynllun Morol Cenedlaethol Cymru gan y rheini a oedd yn bresennol yn y gweithdy, a hynny oherwydd ei fod yn cydnabod materion trawsffiniol, a chroesawyd y berthynas waith dda rhwng Llywodraeth Cymru a chynllunwyr morol y Sefydliad Rheoli Morol.    

Polisi ar echdynnu petrolewm yng Nghymru

Yn dilyn Deddf Cymru 2017, Gweinidogion Cymru, yn lle Awdurdod Olew a Nwy'r DU, fydd yn gyfrifol o 1 Hydref 2018 ymlaen am roi trwyddedau i echdynnu petrolewm ar y tir. Rydym yn awyddus ichi ddweud eich dweud am ein polisi drafft ar echdynnu petrolewm yng Nghymru ac am y dystiolaeth a fu'n sail i'r polisi drafft hwnnw. Mae gennych tan 25 Medi i gyflwyno'ch ymateb.

Cysylltwch a ni

Os oes gennych gwestiynau am y bwletin hwn neu am unrhyw beth arall, cysylltwch â ni trwy'r blwch negeseuon e-bost neu ewch i'n gwefannau:

marineplanning@llyw.cymru

https://beta.llyw.cymru/y-mor-a-physgodfeydd

Rydym wrthi'n adeiladu'r wefan wrth inni symud i system newydd. Os hoffech fwy o wybodaeth am unrhyw beth arall, cysylltwch â'r tîm.