Araith y Prif Weinidog ar yr Economi

Mae'r Prif Weinidog, Carwyn Jones wedi traddodi araith ar yr economi gan ddweud bod Cymru a'i heconomi "ar i fyny".

Wrth siarad yn Gloworks, a ddisgrifiodd fel "ymgorfforiad o'r hyder newydd yn ein diwydiannau creadigol", pwysleisiodd "hyder ac amrywiaeth cynyddol economi Cymru." 

Dywedodd: "O'r dechrau'n deg, mae'r weinyddiaeth hon wedi bod yn gwbl agored o blaid busnesau ac o blaid twf, gyda strategaeth glir iawn - creu a diogelu'r nifer fwyaf bosibl o swyddi o ansawdd, datblygu diwylliant o entrepreneuriaeth, a sicrhau ein bod ni'n gyrchfan boblogaidd ar gyfer mewnfuddsoddiad o ansawdd uchel.  Mae'r strategaeth honno wedi bod yn llwyddiannus iawn oherwydd yn ystod tymor y llywodraeth hon, rydyn ni wedi creu, diogelu a chefnogi bron i 150,000 o swyddi."

Cydnabu rôl Gweinidog yr Economi, Edwina Hart, gan ddweud iddi weithio'n "ddiflino" yn cyfarfod cwmnïau ar draws y byd i hyrwyddo manteision dod i Gymru, gan lwyddo i sicrhau sawl cytundeb. Bu hefyd yn canmol ymateb cyflym y tîm mewnfuddsoddi a'r amgylchedd hynod gefnogol y mae Llywodraeth Cymru'n ei greu i'r rhai sy'n gwneud penderfyniadau pwysig ynghylch ble yn y byd i fuddsoddi.

Dywedodd y Prif Weinidog: "Un o uchafbwyntiau tymor y Llywodraeth hon i mi'n bersonol oedd y cynnydd mewn hyder economaidd dros y bum mlynedd, wrth ochr ein hyder cynyddol fel cenedl. Rwy'n credu'n gryf bod rhaid i'r ddau beth hyn fynd law yn llaw, a bod yr agwedd gadarnhaol sy’n deillio o hynny yn cael ei chryfhau gan y ddau.

Pwysleisiodd mai'r flaenoriaeth ar gyfer y dyfodol oedd “yr hyder cynyddol rydyn ni’n ei weld ar draws economi Cymru yn troi’n swyddi, dan arweiniad y sector preifat a gyda chefnogaeth y llywodraeth, gan fanteisio ar gryfderau'n gwlad i gystadlu - ac ennill - ar lwyfan y byd."

"Rydyn ni wedi gosod y sylfeini cryfaf posibl - nawr mae'n amser adeiladu. Mae Cymru ar i fyny. Mae busnesau Cymru ar i fyny," meddai.  Darllenwch yr araith yn llawn yma.

£55,000 i greu gemau newydd i Microsoft Mae tri datblygwr gemau yng Nghymru wedi derbyn cyfanswm o £55,000 o grantiau i greu gemau newydd i Microsoft dan fenter a ariennir gan Lywodraeth Cymru. Dojo Arcade a Wales Interactive Ltd, sydd wedi’u lleoli ym Mharc Technoleg Pencoed, a Sky Fish Studios Ltd o Gaerdydd, yw’r cwmnïau cyntaf yng Nghymru i gymryd rhan yn rhaglen Greenshoots Microsoft. Mae Greenshoots yn rhaglen ddeori sydd wedi bod yn rhedeg mewn partneriaeth â Creative England dros y ddwy flynedd ddiwethaf. Mae hi nawr yn cael ei threialu yng Nghymru â chymorth Llywodraeth Cymru.  Rhagor o wybodaeth.

Nawdd gan Lywodraeth Cymru i Syrcas ‘NoFit State’ yn arwain at berfformiad yn Efrog Newydd Syrcas NoFit State o Gymru fydd y syrcas gyfoes gyntaf i berfformio yn St. Ann’s Warehouse yn Efrog Newydd, a hynny oherwydd trefniant nawdd gan Lywodraeth Cymru. Mae’r trefniant nawdd o £24,000, a gyhoeddwyd gan y Dirprwy Weinidog, Ken Skates, yn golygu bod NoFit State yn gallu derbyn gwahoddiad gan St. Ann’s i lwyfannu ei sioe BIANCO am y tro cyntaf yn yr Unol Daleithiau. Hefyd, dyma fydd y tro cyntaf i’r cwmni o Gaerdydd, sy’n dathlu ei ben-blwydd yn 30 yn 2016, ymddangos yn yr Unol Daleithiau.  Rhagor o wybodaeth.

Strydoedd cefn Paris - yn Stiwdios Bae Abertawe Mae’r Prif Weinidog, Carwyn Jones, wedi bod yn ymweld â set The Collection yn Stiwdios Bae Abertawe i weld sgiliau’r criw o Gymru. Mae'r tîm wrthi'n ail-greu strydoedd cefn Paris y tu ôl i'r stiwdio ar Ffordd Fabian. The Collection yw'r ddrama deledu ddiweddaraf o'r safon uchaf i gael ei ffilmio yng Nghymru. Bydd ar gael i aelodau Amazon Prime yn y DU nes ymlaen eleni. Mae wedi cael cymorth gan Stiwdio Pinewood a Chyllideb Buddsoddi yn y Cyfryngau Llywodraeth Cymru sy'n derbyn cyngor gan Pinewood Pictures, ac a chwaraeodd rôl hanfodol wrth ddod â'r gyfres newydd i Gymru.  Rhagor o wybodaeth.

Gwella amrywiaeth yn y diwydiant ffilm a theledu yng Nghymru Mae Diverse Cymru, sy’n hybu cydraddoldeb ledled Cymru, yn gweithio gyda Llywodraeth Cymru i gyflwyno prosiect ymchwil a fydd yn archwilio’r rhwystrau sy’n atal pobl o gefndiroedd amrywiol rhag bod yn rhan o’r diwydiant ffilm a theledu yng Nghymru. Bydd yr elusen yn gweithio gyda gweithwyr proffesiynol yn y diwydiannau creadigol i edrych ar y mater hwn drwy’r prosiect “Amrywiaeth ym maes Ffilm a Theledu”.  Rhagor o wybodaeth.

Ehangu cynlluniau Band Eang Cyflym Iawn Mae dau o gynlluniau Llywodraeth Cymru yn cael eu hehangu er mwyn cynyddu eto fyth nifer y bobl sy’n gallu cael mynediad at fand eang cyflym iawn yng Nghymru.  Bydd newidiadau i Allwedd Band Eang Cymru a’r Cynllun Taleb Gwibgyswllt yn ehangu ar y band eang cyflym iawn sydd ar gael a bydd yn sicrhau bod cyflymderau rhyngrwyd cyflymach ar gael i bob cartref a busnes ledled Cymru.  Rhagor o wybodaeth.

Canolfan Gelfyddydau Pontio, sy’n werth £50 miliwn, i drawsnewid y celfyddydau a diwylliant yng Ngogledd Cymru

Mae Ken Skates, y Dirprwy Weinidog Diwylliant, Chwaraeon a Thwristiaeth, wedi agor canolfan gelfyddydau ac arloesi Pontio yn swyddogol, gan ddweud y bydd y ganolfan yn cael effaith drawsnewidiol ar y celfyddydau a diwylliant ledled Gogledd Cymru.

Mae’r Ganolfan sy’n werth £50 miliwn ym Mhrifysgol Bangor wedi derbyn cymorth o £15 miliwn gan Lywodraeth Cymru a £12.5 miliwn o gyllid yr UE.                                                               

Wedi’i rhannu dros chwe lefel, mae’r ganolfan yn gartref i theatr hyblyg o faint canolig, Theatr Stiwdio sy’n dal hyd at 120 o bobl, sinema ddigidol, Canolfan Arloesi flaenllaw ac amrywiaeth eang o gyfleusterau i fyfyrwyr, gan gynnwys cartref newydd Undeb y Myfyrwyr a nifer o lefydd i ddysgu ac addysgu.  Rhagor o wybodaeth.

Sinema Gyntaf Eisteddfod Genedlaethol Cymru

Mae partneriaeth strategol o sefydliadau ffilm allweddol yng Nghymru wedi dod at ei gilydd i ddarparu profiad ffilm ar Faes yr Eisteddfod am y tro cyntaf yn 2016.

Mae BAFTA Cymru a’r Eisteddfod Genedlaethol yn gwethio mewn partneriaeth â Sgrin Cymru, Canolfan Ffilm Cymru, Chapter, Into Film, Ffilm Cymru Wales, y Gymdeithas Deledu Frenhinol, BFI Net.Work, ITV Cymru Wales, S4C a TAC.  Bydd y cynnig sinema cyntaf ar gael yn yr Eisteddfod Genedlaethol rhwng 30 Gorffennaf a 6 Awst - yr ŵyl ddiwylliannol deithiol fwyaf yn Ewrop.  Rhagor o wybodaeth.

Dathliad Brenhinol ar gyfer Coleg Brenhinol Cymru

Cynhaliwyd digwyddiad gala ym Mhalas Buckingham gan Ei Uchelder Brenhinol Tywysog Cymru, Noddwr Coleg Brenhinol Cerdd a Drama Cymru, i ddathlu llwyddiannau conservatoire cenedlaethol Cymru.

Roedd y noson yn arddangos talent artistiaid ifanc y Coleg ac roedd y gwesteion yn cynnwys rhai o artistiaid enwocaf Cymru fel y Fonesig Shirley Bassey, Bryn Terfel a Michael Sheen.

Dywedodd Ken Skates, y Dirprwy Weinidog Diwylliant, Chwaraeon a Thwristiaeth, “Caiff Coleg Brenhinol Cerdd a Drama Cymru ei gydnabod yn rhyngwladol fel canolfan ragoriaeth ar gyfer cerddoriaeth a drama ac mae Llywodraeth Cymru yn eithriadol o falch o’r sylfaen o sgiliau a thalent y mae wedi’i gyfrannu i ddiwydiannau creadigol Cymru.”  Rhagor o wybodaeth.

Te Prynhawn gyda’r Comisiynydd Teledu Plant

Cynhaliwyd y nesaf yn y gyfres o ddigwyddiadau poblogaidd Cwrdd â’r Comisiynwyr gan Creative Europe Desk UK - Wales a BAFTA Cymru  yn ddiweddar. Daeth cynulleidfa o’r diwydiant i’r Te Prynhawn gyda’r Comisiynwyr Plant i glywed gan Disney, Cartoon Network, CBBC, Cbeebies, Milkshake ac S4C, ac i gyflwyno syniadau.

Roedd dros 60 o gynhyrchwyr, ysgrifenwyr a chyfarwyddwyr yng Nghanolfan Mileniwm Cymru yng Nghaerdydd a 30 arall ar-lein.  Rhagor o wybodaeth.

Cronfa Gemau’r DU yn cynnig hyd at £25,000 o gymorth grant i ddatblygu gêm

P’un ai a ydych chi’n gwmni datblygu gemau cofrestredig, yn fusnes newydd, neu’ch bod chi heb gofrestru eich cwmni’n gyfreithiol â Thŷ’r Cwmnïau eto, gallech chi gael cymorth grant hyd at £25,000 i ddatblygu eich gêm newydd. Y dyddiad cau ar gyfer cyflwyno ceisiadau yw dydd Llun 18fed Ebrill 2016, 12pm. Rhagor o wybodaeth.

Cronfa newydd gwerth £136 miliwn  i helpu busnesau Cymru i dyfu

Cyhoeddodd y Prif Weinidog, Carwyn Jones, gronfa newydd gwerth £136 miliwn gyda chefnogaeth yr Undeb Ewropeaidd i roi mynediad at gyllid i fusnesau Cymru er mwyn helpu i ysgogi eu cynhyrchiant a thwf economi Cymru.

Bydd Cronfa Fusnes Cymru, dan reolaeth Cyllid Cymru, yn cefnogi busnesau bach a chanolig (BBaChau) i ehangu'n gynt drwy ddarparu cyllid ar ffurf benthyciadau a buddsoddiadau ecwiti rhwng £50,000 a £2 filiwn.

Bydd y gronfa hefyd yn rhoi cyllid i fusnesau newydd yn ogystal â chyfalaf risg i greu a thyfu cwmnïau sy'n ymchwilio ac yn arloesi, gan gynnwys cwmnïau deillio, mewn sectorau twf allweddol.  Rhagor o wybodaeth.

Pecyn ariannol £21 miliwn er mwyn ehangu

Mae Gweinidog yr Economi, Edwina Hart, wedi cyhoeddi £21 miliwn o gyllid newydd i helpu Busnesau Bach a Chanolig (BBaChau) i dyfu ac i greu neu ddiogelu rhagor na 1,800 o swyddi.

Caiff yr arian ei ddosbarthu i fusnesau Cymru trwy ddwy o gronfeydd Cyllid Cymru a thrwy gronfa Ad-daladwy newydd Llywodraeth Cymru i BBaChau, gwerth £5 miliwn, sy’n cynnig cyllid ad-daladwy o rhwng £50,000 a £500,000 i helpu BBaChau i dyfu a chreu swyddi. Nod y gronfa yw creu a/neu ddiogelu o leiaf 500 o swyddi.  Rhagor o wybodaeth.

Rhyddhad ardrethi ar gyfer Busnesau Bach wedi’i ymestyn am flwyddyn gyda £98 miliwn o gyllid

Bydd Cynllun Rhyddhad Ardrethi Busnesau Bach Llywodraeth Cymru yn cael ei ymestyn am flwyddyn arall, meddai Edwina Hart, Gweinidog yr Economi.

Mae’r cynllun £98 miliwn, y mae mwy na thri chwarter y safleoedd busnes yng Nghymru wedi elwa ohono, yn golygu na fydd tua hanner yr holl fusnesau cymwys yn gorfod talu ardrethi busnes yn ystod y flwyddyn ariannol nesaf ychwaith.  Rhagor o wybodaeth.

Annog busnesau Cymru i wneud cais am gymorth o ran allforion a thwf

Mae Llywodraeth Cymru yn galw ar fusnesau Cymru sy'n datblygu, ac sydd â photensial mawr o ran twf, i wneud cais am gynllun newydd sy'n darparu cymorth pwrpasol er mwyn helpu eu busnes i dyfu, i hybu allforion ac i greu swyddi newydd.

Mae'r rhaglen cyflymu busnes cyn cychwyn yn agored i fusnesau sy'n gallu amlinellu strategaeth dwf uchelgeisiol gyda'r nod o greu 10 o swyddi a sicrhau trosiant o £2 filiwn yn ystod ei dair blynedd cyntaf. Hefyd bydd ymgeiswyr yn cael cymorth i nodi cyfleoedd yn y farchnad ryngwladol, gyda'r nod o greu 30% o'i refeniw trwy allforio. Rhagor o wybodaeth.

Lansio Cyfeiriadur ar-lein newydd i hyrwyddo busnesau Cymru

Mae Cyfeiriadur ar-lein newydd o Fusnesau Cymru - a lansiwyd gan Busnes Cymru i helpu cwmnïau i hyrwyddo eu nwyddau, eu gwasanaeth a'u henw da - yn boblogaidd iawn, gyda thros 400 o fusnesau wedi cofrestru arno'n barod.

Mae'r adnodd ar-lein yn agored i unrhyw fusnes yng Nghymru a'i nod yw helpu cwmnïau i hyrwyddo eu hunain i gwsmeriaid newydd posibl a chodi eu proffil.  Rhagor o wybodaeth.

Gall defnyddwyr chwilio’n gyflym am fusnes yng Nghymru yn ôl enw, sector, rhanbarth a hidlyddion eraill ac mae rhestru'n broses hawdd, rhad ac am ddim. 

Gŵyl Arloesedd Cymru 2016 - 20 Mehefin - 1 Gorffennaf

Bellach yn ei thrydedd flwyddyn, bydd Gŵyl Arloesedd Cymru yn arddangos arloesedd yng Nghymru drwy nifer o ddigwyddiadau, seminarau a gweithdai sy’n cael eu cynnal gan gwmnïau a chan academia.

Bydd yr Ŵyl yn gyfle i arloeswyr rwydweithio gydag arbenigwyr diwydiant ac arddangos eu cynnyrch a’u gwasanaethau i ddarpar gwsmeriaid ac i’r cyhoedd yng Nghymru a thu hwnt. Rhagor o wybodaeth.

Dilynwch ni ar @WG_economy

Gallwch gael y diweddaraf am Adran Economi, Gwyddoniaeth a Thrafnidiaeth Llywodraeth Cymru a chysylltu â ni drwy ein dilyn ar Twitter.