Cynllun Gweithredu Twristiaeth Bwyd 2015-2020

Fis Ebrill 2015 fe lansiwyd y Cynllun Gweithredu Twristiaeth Bwyd gan y Dirprwy Weinidog  Ffermio a Bwyd, Rebecca Evans a’r Dirprwy Weinidog Diwylliant, Chwaraeon a Thwristiaeth, Ken Skates yng Nghanolfan y Mileniwm, Caerdydd. 

Ar ôl ymgynghori â’r sector twristiaeth bwyd aeth Croeso Cymru ac Is-adran Fwyd yr Adran Cyfoeth Naturiol ati i lunio’r cynllun gweithredu ar y cyd. Ei nod yw ehangu enw da Cymru fel cyrchfan fwy o’r radd flaenaf.

Dyma amcanion y Cynllun: 

• Cynyddu’r cyfleoedd i ymwelwyr ddod i wybod am, a mwynhau, Bwyd a Diod Cymru
• Annog busnesau lletygarwch Cymru i ddefnyddio mwy ar fwyd a diod lleol
• Sicrhau bod mwy o fwyd a diod o Gymru ar werth mewn bwytai a siopau
• Nodi’r bylchau yn yr wybodaeth am fwyd a diod lleol, am sut mae ei gyrchu a’i baratoi

Bydd Llywodraeth Cymru’n parhau i gydweithio â’r sectorau bwyd a thwristiaeth i gyflawni’r camau gweithredu sydd yn y cynllun. Lawrlwythwch eich copi o’r Cynllun Gweithredu Bwyd a Diod.

Rhaglen Recriwtio Ieuenctid CruiseCymru

Mae CruiseCymru’n awyddus i recriwtio pobl 20+oed o bob cwr o Gymru i weithio yn y diwydiant lletygarwch gyda chwmni llongau mordaith 5 seren.  Mae swyddi ar gael fel stiwardiaid, staff gweini bwyd, gweithwyr bar, baristas, chefs de partie a sous chefs. Rhaid ichi feddu ar gymhwyster lefel 3 a phrofiad o weithio mewn sefydliad 4 neu 5 seren. Os oes gennych ddiddordeb, dewch i Ddiwrnod Recriwtio Agored CruiseCymru ym mwyty hyfforddi Friars, Coleg Menai, Bangor rhwng 10am a 3pm ddydd Mercher 1 Gorffennaf 2015.

Bydd cwmni Viking Recruitment yn rhoi cyflwyniad ac yn ateb cwestiynau am bob agwedd ar weithio ar longau mordaith. Cofiwch ddod â CV gyda chi os ydych am gael eich dewis ar gyfer cyfweliad. Nid oes angen cofrestru, dim ond bod yn bresennol ar y dydd.

Lleoedd Arbennig 2015 

Mae’r Ymddiriedolaeth Genedlaethol yn rhedeg eu cystadleuaeth Lleoedd Arbennig eto eleni ond mae pum categori pleidleisio y tro hwn, a bydd ‘llysgennad’ enwog yn hyrwyddo pob un.

Bydd modd bwrw pleidlais ar-lein yng ngham cyntaf y gystadleuaeth, drwy fynd i wefan yr Ymddiriedolaeth Genedlaethol, Wales Online, Facebook neu drwy ddefnyddio’r hashtag #lleoeddarbennig neu #specialplaces ar Twitter ac Instagram. Y dyddiad cau yw 14 Gorffennaf. Gellir llenwi cerdiau pleidleisio ar safleoedd yr Ymddiriedolaeth Genedlaethol a rhai sefydliadu eraill hefyd.

Caiff y rhestr fer ei datgelu ar 20 Gorffennaf a bydd y pleidleisio ar-lein yn ailagor wedyn tan 20 Awst (neu tan 31 Gorffennaf drwy’r post). Cyhoeddir enillydd ‘Lleoedd Arbennig 2015’ ar 7 Awst.

“USP...Cymru yw’r iaith Gymraeg” – Huw Roberts, Gwesty Cymru

Gall y Gymraeg fod yn ffordd hwylus o gynnig profiad arbennig i ymwelwyr a chreu naws am le unigryw i Gymru. Wrth geisio gosod Cymru ar wahân fel cyrchfan gwyliau ym Mhrydain, mae gwerth i’r Gymraeg fel teclyn marchnata ac fel rhan o wasanaeth cwsmer er mwyn cynnig croeso Cymraeg a Chymreig. 

I ddysgu mwy am fanteision y Gymraeg, ac am y cymorth sydd ar gael am ddim i fusnesau gan Gomisiynydd y Gymraeg, ewch i’n gwefan.  E-bostiwch y tîm neu ffoniwch 08456 033221.

Cenedl Hyblyg 2

Mae prosiect Cenedl Hyblyg 2 Chwarae Teg yn addas iawn ar gyfer menywod sy’n gobeithio datblygu’n arweinwyr tîm a dringo’r ysgol i’w swyddi rheoli cyntaf. Mae’r rhaglen gymorth gynhwysfawr hon yn helpu menywod i ddatblygu’r sgiliau a’r hyder sydd eu hangen i ddatblygu’n llwyddiannus yn y gweithle. Mae hefyd yn cynnig cyfle i lunio cynllun gweithredu i gefnogi datblygiad gyrfa ac mae tîm ymroddedig a phrofiadol ar gael i roi cyngor unigol, cymorth ac arweiniad. Mae’r prosiect yn darparu hyfforddiant hefyd i ennill cymhwyster achrededig y Sefydliad Arweinyddiaeth a Rheolaeth.

Mae Cenedl Hyblyg 2 yn cael ei gyllido gan Gronfa Gymdeithasol Ewrop a Llywodraeth Cymru ac yn gweithio gyda menywod cyflogedig yn y naw sector blaenoriaeth yng Nghymru ac mae’r rhaglen yn cael ei chyllido’n llawn ar gyfer y sawl sy’n cymryd rhan.

Am ragor o wybodaeth am y prosiect a sut i wneud cais, ewch i Chwarae Teg.