Diweddariad ar Ddiwydiant Twristiaeth Sir Gâr - Mehefin 26

Mae rhaglen newydd ar gyfer cyllid a chymorth busnes bellach ar gael i fusnesau Sir Gâr, wedi'i hariannu gan Lywodraeth Cymru a Llywodraeth y DU. Mae grantiau'n cefnogi busnesau newydd, twf busnes, ymchwil a datblygu, ac ynni adnewyddadwy, ochr yn ochr â Bwrsariaeth Lansio i helpu i dreialu syniadau newydd.
Gall busnesau hefyd gael mynediad at gyngor arbenigol, gweithdai a chymorth un-i-un. Mae'r Gronfa Adnewyddu Canol Trefi yn cynnig hyd at £2,000 i wella blaen siopau.

Mae cymorth pellach yn cynnwys grantiau'r Gronfa Fenter (hyd at £240,000), benthyciadau di-log yng nghanol trefi (£10,000–£1 miliwn), grantiau'r Gronfa Bywiogrwydd (£5,000–£50,000), a chyllid Murluniau i wella mannau cyhoeddus a chynyddu nifer yr ymwelwyr.

Mae canllawiau newydd i ymwelwyr â Chaerfyrddin a  Llanelli wedi'u creu, ac mae 5,000 o gopïau o bob un wedi'u hargraffu a'u rhannu. Nod y canllawiau yw annog ymwelwyr i grwydro canol trefi, cynyddu amser aros a chefnogi gwariant lleol, wrth hyrwyddo gwefannau Darganfod Sir Gâr, Caru Caerfyrddin a Charu Llanelli.

Mae Llwybr Dyffryn Tywi sydd newydd agor eisoes yn gwneud argraff gref, gan ddenu sylw eang yn y cyfryngau ar draws BBC, ITV ac S4C, ac mae wedi ymddangos yn The Times dair gwaith yn ystod yr wythnosau diwethaf. Mae'r llwybr 13 milltir, a agorodd yn swyddogol ym mis Mai, wedi dod yn gyrchfan boblogaidd mewn dim o dro, gan ddenu miloedd o gerddwyr a beicwyr, yn ogystal â bod yn lleoliad ar gyfer Parkrun wythnosol. Bydd digwyddiadau a fydd yn cael eu cynnal yn y dyfodol, gan gynnwys hanner marathon a gŵyl gerdded, yn rhoi hwb pellach i'w apêl a'i effaith ar dwristiaeth.

Beth am roi hwb i'ch busnes drwy fanteisio ar y cyfle hwn i drefnu sesiwn un i un gyda Sarah? Mae slotiau cyfleus o 20 munud ar gael, lle gallwch ddysgu sut i wella eich cynnig, cael asedau marchnata am ddim fel mapiau, lluniau a fideo, a dod yn Llysgennad Twristiaeth Sir Gâr a fydd yn eich helpu i wneud y mwyaf o lwyddiant Llwybr Dyffryn Tywi.

Mae ymgynghoriad bellach ar agor ar gyfer y Cynllun Datblygu Lleol diweddaraf (2018–2033), gan wahodd pobl i roi adborth ar ddiweddariadau allweddol sy'n llunio dyfodol y sir. Mae dogfennau ar gael ar-lein, mewn llyfrgelloedd a Chanolfannau Hwb.

Rydyn ni'n cynnal Diwrnod cenedlaethol y Lluoedd Arfog ym Mharc Gwledig Pen-bre ar 27 Mehefin lle bydd amrywiaeth o arddangosfeydd milwrol a gorymdaith, cerddoriaeth fyw drwy'r dydd, a bydd tîm arddangos parasiwt yr Awyrlu Brenhinol yn galw heibio! Mae'n gyfle i gydnabod gwaith y Lluoedd Arfog ac mae disgwyl i ymwelwyr heidio o bob cwr o'r wlad.