Rydym yn gwybod bod profiad gwaith cynnar yn gallu chwarae rôl hanfodol wrth helpu pobl ifanc i ddarganfod y llwybr gyrfa gywir, ac mae taith Sianco Emmanuel yn enghraifft wych o sut y gall cyfleoedd ymarferol arwain yn uniongyrchol at gyflogaeth hirdymor. 

Cwblhaodd Sianco leoliad paentio chwe wythnos gyda ni trwy ein rhaglen profiad gwaith Llwybr at Ddyfodol, wedi’i chefnogi gan Lywodraeth y DU drwy Gronfa Ffyniant Cyffredin y Deyrnas Unedig, mewn partneriaeth â’r Cyngor. 

Yn ystod y lleoliad, gwnaeth Sianco wella ei sgiliau paentio a chael gwell dealltwriaeth o beth yw gwaith o ddydd i ddydd ar safle, gan ddysgu’n uniongyrchol oddi wrth y tîm. Wrth fyfyrio ar y cyfle, dywedodd Sianco: 

“Roedd fy chwe wythnos o brofiad gwaith gyda Chyngor Sir Caerfyrddin yn anhygoel. Cefais y cyfle i weithio’n ymarferol gyda gwaith paentio ac addurno go iawn, fel paratoi waliau, cymysgu paent a rhoi cynnig ar wahanol dechnegau gorffen.  Dysgu’n uniongyrchol gan y tîm a gweld sut maen nhw’n rheoli prosiectau go iawn dysgodd cymaint i mi a gwneud i mi deimlo’n barod i ymgymryd â mwy o gyfrifoldeb.” 

Bu Sianco yn gweithio gyda’r Tîm Cynnal a Chadw Eiddo a’i fentor, Adrian Brown, yn ennill profiad ar draws amrywiaeth o adeiladau’r Cyngor ac eiddo preswyl. 

Ym mis Medi 2025, ymunodd â’r Cynllun Prentisiaeth Sgiliau Adeiladu Cyfle, gan ddechrau prentisiaeth mewn paentio ac addurno wrth astudio tuag at ei gymhwyster City & Guilds Lefel 3 yng Ngholeg Sir Gâr – Campws Rhydaman, ochr yn ochr â’i gyflogaeth gyda Chyngor Sir Caerfyrddin. 

 

Rydym yn falch iawn o rannu bod Samara Powell wedi’i phenodi’n Rheolwr Strategaeth a Gwasanaethau Trafnidiaeth. Mae hon yn swydd newydd o fewn yr Isadran Amgylchedd a Seilwaith - stori lwyddiant gwych ac enghraifft ardderchog o sut y gall buddsoddi mewn talent ar ddechrau gyrfa arwain at ddatblygiad hirdymor o fewn y Cyngor. 

Ymunodd Samara â’r Cyngor drwy ein rhaglen graddedigion, ac mae ei phenodiad i’r rôl uwch hon yn adlewyrchu ei hymrwymiad a’i datblygiad personol, yn ogystal â chryfder ein dull o feithrin talent o fewn y Cyngor. Mae ei thaith yn dangos gwerth darparu cyfleoedd graddedig ystyrlon sy’n cefnogi dysgu, cynnydd a datblygu arweinyddiaeth. 

Yn ei swydd newydd fel Rheolwr Strategaeth a Gwasanaethau Trafnidiaeth, bydd Samara yn chwarae rôl allweddol wrth lunio a chyflawni gwasanaethau trafnidiaeth ledled y sir. Mae’r rôl yn darparu arweinyddiaeth strategol ar gyfer trafnidiaeth teithwyr, teithio dysgwyr, seilwaith trafnidiaeth, polisi a chynllunio, gan sicrhau bod gwasanaethau’n cyd-fynd â blaenoriaethau rhanbarthol a chenedlaethol. 

Mae’r swydd yn cynnwys arwain timau amlddisgyblaethol, goruchwylio rhaglenni trafnidiaeth a phrosiectau seilwaith mawr, gweithio’n agos gydag aelodau etholedig a phartneriaid allanol, a helpu i ddarparu trafnidiaeth ddiogel, gynaliadwy a chynhwysol i drigolion a chymunedau ledled Sir Gaerfyrddin. 

Hoffem longyfarch Samara ar ei phenodiad a dymuno pob llwyddiant iddi yn ei rôl newydd. 

Rydym yn falch iawn o rannu bod Llwybr Dyffryn Tywi bellach ar agor, gan nodi carreg filltir bwysig ar gyfer teithio llesol yn Sir Gaerfyrddin. Mae’r prosiect seilwaith mawr hwn wedi trawsnewid hen reilffordd rhwng Caerfyrddin a Llandeilo yn llwybr di-draffig 16 milltir i gerddwyr a beicwyr, drwy galon Dyffryn Tywi. 

Mae’r llwybr yn ddiogel, hygyrch ac yn wastad i raddau helaeth, wedi’i gynllunio ar gyfer pobl o bob oed a gallu. Unwaith ar y llwybr, gall defnyddwyr fwynhau cefn gwlad ddi-dor, bryniau tonnog a golygfeydd tawel ar hyd glannau’r afon drwy gydol y daith. 

Diolch yn fawr iawn i bawb a fu’n rhan o wireddu Llwybr Dyffryn Tywi o gysyniad i realiti. Mae eich cyfraniad wedi darparu ased parhaol o safon uchel a fydd yn cael ei fwynhau gan drigolion ac ymwelwyr am genedlaethau i ddod.