TenantiDenant Digidol Mawrth 26

A oes gennych chi gwestiynau am eich Lwfans Cyflogaeth a Chymorth yn symud i Gredyd Cynhwysol?

Bydd Cyngor ar Bopeth yn ein canolfannau Hwb yng Nghaerfyrddin, Rhydaman a Llanelli dros yr wythnosau nesaf i ateb eich cwestiynau.

Dewch draw rhwng 9.30am a 2.30pm ar:

• Dydd Llun, 2 Mawrth – Hwb Caerfyrddin
• Dydd Mawrth, 10 Mawrth – Hwb Rhydaman
• Dydd Mercher, 18 Mawrth – Hwb Llanelli

Bydd ymgynghorwyr Hwb hefyd ar gael i helpu gydag unrhyw geisiadau Hawliwch yr Hyn sy'n Ddyledus i Chi. 

Mae dewis addysg cyfrwng Cymraeg yn agor drysau - nid yn unig yn addysgol, ond yn academaidd, yn ddiwylliannol ac yn broffesiynol. Mae ysgolion cyfrwng Cymraeg ac ysgolion dwyieithog ar draws Sir Gaerfyrddin yn barod i gefnogi pob teulu, p'un a yw'r Gymraeg yn cael ei siarad yn y cartref neu beidio.

Mae Cyngor Sir Caerfyrddin wedi ymrwymo i gynyddu cyfleoedd ar gyfer addysg cyfrwng Cymraeg o dan Gynllun Strategol y Gymraeg mewn Addysg. Mae'r cynllun hwn yn helpu mwy o ddysgwyr i symud ymlaen yn hyderus drwy addysg cyfrwng Cymraeg, o'r blynyddoedd cynnar i ôl-16, gan gyfrannu at y nod cenedlaethol o 1 miliwn o siaradwyr Cymraeg erbyn 2050.

Pam dewis addysg cyfrwng Cymraeg?

• Sgiliau dwyieithog rhugl – Mae plant yn dod yn hyderus yn y Gymraeg a'r Saesneg.
• Deilliannau dysgu cryfach – Mae dysgwyr dwyieithog yn aml yn dangos sgiliau datrys problemau, cyfathrebu a gwybyddol gwell.
• Barod i'r dyfodol – mae sgiliau Cymraeg yn cael eu gwerthfawrogi fwyfwy mewn addysg, gofal iechyd, gwasanaethau cyhoeddus a busnes.
• Cysylltiad diwylliannol – Mae plant yn tyfu i fyny yn gysylltiedig â threftadaeth, traddodiadau a chymuned Cymru.

Mae addysg cyfrwng Cymraeg yn rhoi'r modd i blant lwyddo'n academaidd, yn broffesiynol ac yn bersonol, a hynny wrth feithrin cysylltiad gydol oes â'n diwylliant a'n cymuned.

Gallwch chi weld opsiynau addysg cyfrwng Cymraeg a sut i wneud cais am le yma:

Ar 16 - 17 Chwefror, cwblhaodd William leoliad profiad gwaith deuddydd gyda thîm tai Cyngor Sir Caerfyrddin, gan gael cipolwg ymarferol ar waith plymio, gwaith coed a chynnal a chadw eiddo.

Ar ôl mynychu sesiwn sefydlu Iechyd a Diogelwch yng Nghillefwr, treuliodd William ei ddiwrnod cyntaf ar y safle gyda'r tîm plymio. Buodd yn cefnogi gwaith ar draws pum lleoliad, gan gynorthwyo gyda symud toiledau cyn gosod lloriau newydd, cario offer a dysgu pwysigrwydd dilyn gweithdrefnau Iechyd a Diogelwch.

Ar ei ail ddiwrnod, gweithiodd William ochr yn ochr â'r tîm gwaith coed, gan helpu i osod silffoedd, symud drysau a pharatoi ardaloedd ar gyfer gwaith gwella. Arsylwodd dasgau'n agos, trosglwyddo offer a dysgu mwy am weithio'n effeithlon fel rhan o dîm.

Mae William wedi mynegi diddordeb cryf mewn dilyn gyrfa mewn plymio ac mae'n gobeithio gwneud cais am brentisiaeth pan fydd yn gorffen yr ysgol i ennill profiad ymarferol a chymhwyster cydnabyddedig. Dangosodd ddiddordeb hefyd mewn dychwelyd yn ystod gwyliau ysgol yn y dyfodol i gael rhagor o brofiad.

Yn ystod ei leoliad, datblygodd William well dealltwriaeth o'r rôl hanfodol y mae'r adran dai yn ei chwarae wrth reoli tua 9,000 o gartrefi a pharatoi eiddo gwag i'w hailosod i helpu i atal digartrefedd.

Y tîm eiddo gwag: “Dywedodd Lee, Ben ac Ashley ei fod wedi gwneud yn dda dros y 2 ddiwrnod. Roedd yn awyddus i fod yn rhan o bopeth yr oeddent yn ei wneud ac yn dangos parodrwydd i ddysgu. Mae'n dda gweld rhywun o'i oedran yn dangos brwdfrydedd dros y gwaith.”

Mae darparu cyfleoedd fel hyn yn helpu i ysbrydoli pobl ifanc a chefnogi datblygiad ein gweithlu yn y dyfodol.