|
Momentwm Ymgyrch Twristiaeth yn Parhau
Mae ein hymgyrch dwristiaeth "Miri'r Merched" yn mynd o nerth i nerth. Bellach mae wedi denu dros 7.5 miliwn o argraffiadau digidol a chyflawni mwy na 300,000 o ymweliadau â'n gwefan, sy'n golygu mai hon yw un o'n hymgyrchoedd mwyaf llwyddiannus.
Rydym yn falch iawn o rannu dolen i erthygl Miri'r Merched a ymddangosodd yn The Guardian Online yr wythnos hon yn dilyn ymweliad diweddar gan y wasg, gan gyrraedd cynulleidfa o 18.4 miliwn o ddarllenwyr digidol misol. Rydym hefyd wedi derbyn adborth cadarnhaol iawn gan y Daily Mail, a wnaeth ymweld wythnos diwethaf, gyda'r dyddiadau cyhoeddi i'w cadarnhau. Yn ogystal mae gweithgarwch dylanwadwr cysylltiedig â'r ymweliadau hyn, gan Llio Angharad, wedi bod yn llwyddiannus iawn, gan ddenu dros 250,000 ar Instagram yn unig.
Mae'r gwaith hwn yn cael ei gefnogi gan Gronfa Ffyniant Gyffredin Llywodraeth y DU, ac mae'r momentwm yn parhau gyda gweithgareddau pellach gan y wasg a dylanwadwyr wedi'u cynllunio.
|
|
Cynllun llysgenhadon busnesau twristiaeth yn ennill momentwm
Mae'r Cynllun Llysgenhadon Busnesau Twristiaeth, a ariennir gan Gronfa Ffyniant Gyffredin Llywodraeth y DU, wedi dechrau'n dda. Mae sawl busnes lleol eisoes wedi cofrestru, gan integreiddio'r cwrs Llysgenhadon i sefydlu a hyfforddiant staff, a derbyn cymorth un-i-un pwrpasol gan gyflenwr blaenllaw y diwydiant.
Mae busnesau sy'n cymryd rhan hyd yn hyn yn cynnwys:
- Rheilffordd Gwili (wedi cwblhau)
- Gardd Fotaneg Genedlaethol Cymru (wedi cwblhau)
- Tŷ Mawr Brechfa (wedi cofrestru)
- Amgueddfa Wlân Cymru (wedi cofrestru)
- Diod (wedi cofrestru)
- Y Cawdor (aros i gofrestru)
Gyda 10 lle ar gael yn y cynllun peilot, mae 3 lle ar ôl. Peidiwch â cholli'r cyfle hwn i gryfhau eich tîm, gwella profiadau ymwelwyr, ac arddangos diwylliant, treftadaeth a lletygarwch Sir Gâr.
|
Arddangosfa Briodasau gyntaf Sir Gâr yn llwyddiant ysgubol
Wedi'i threfnu gan dîm Datblygu Twristiaeth Cyngor Sir Gâr, denodd Arddangosfa Briodasau gyntaf Sir Gâr, a gynhaliwyd yng Ngardd Fotaneg Genedlaethol Cymru, fwy na 100 o weithwyr proffesiynol ym maes priodasau ynghyd o bob cwr o'r sir. Cymerodd lleoliadau, darparwyr llety, cyflenwyr, cofrestryddion a dathlwyr ran, gan arddangos cryfder, creadigrwydd ac amrywiaeth y sector priodasau lleol.
Roedd yr Arddangosfa, a oedd yn cynnwys dros 35 o arddangoswyr ochr yn ochr â chyflwyniadau ysbrydoledig a gweithdai digidol ymarferol, yn annog cydweithio, sbarduno partneriaethau newydd, a rhannu syniadau newydd ar gyfer twf yn y dyfodol. Roedd y digwyddiad hefyd yn cyd-daro â lansiad cyfeirlyfr priodasau newydd Sir Gâr ac ymgyrch yn hyrwyddo'r sir fel "y lle mwyaf rhamantus yng Nghymru." Mae'r ymgyrch sydd wedi'i thargedu, a lansiwyd cyn y Nadolig, yn cael ei chynnal dros gyfnodau rhamantus allweddol gan gynnwys Santes Dwynwen a Dydd Sant Ffolant, gan gefnogi busnesau lleol a chadarnhau Sir Gâr fel cyrchfan briodas o'r radd flaenaf.
|
Hysbysu eich digwyddiadau a'ch gweithdai ar Darganfod Sir Gâr!
Gyda Hanner Tymor Chwefror a Dydd Gŵyl Dewi yn prysur agosáu, dyma'r amser perffaith i fusnesau twristiaeth restru eich digwyddiadau a'ch gweithdai ar Darganfod Sir Gâr. Drwy ychwanegu eich gweithgareddau at blatfform twristiaeth swyddogol y sir, gallwch wneud y mwyaf o gyfleoedd cyhoeddusrwydd, cynyddu archebion ymwelwyr, a chael sylw ar y cyfryngau cymdeithasol trwy sianeli Cyngor Sir Gâr.
P'un ai’n weithdai teuluol, yn deithiau tywys neu’n brofiadau arbennig, mae pob rhestr yn helpu i arddangos y gorau o'r hyn sydd gan Sir Gâr i'w gynnig ac yn sicrhau bod eich busnes yn cyrraedd pobl leol ac ymwelwyr sy'n cynllunio eu gweithgareddau hanner tymor a Dydd Gŵyl Dewi.
Cofiwch ychwanegu eich digwyddiadau heddiw a manteisiwch i'r eithaf ar y cyfleoedd hyrwyddo allweddol hyn!
Ac er mwyn cyrraedd hyd yn oed mwy o bobl, cofiwch ychwanegu eich digwyddiad at CroesoCymru.com i fanteisio ar hyrwyddiad ychwanegol ar lefel genedlaethol.
|
|
|
Dylanwadwyr yn ymweld â rhan newydd o Lwybr Dyffryn Tywi
Mae'r rhan newydd o Lwybr Dyffryn Tywi, o Lanarthne i Landeilo, wedi cael canmoliaeth uchel yn ystod ymweliad gan ddylanwadwyr yn ddiweddar. Bu'r blogwyr teithio This Girl Walks a Wales on My Doorstep yn ymweld â'r llwybr, gan rannu eu profiad â'u dilynwyr a denu dros 20,000 o bobl.
Roedd y ddau ddylanwadwr yn llawn canmoliaeth o'r golygfeydd, hygyrchedd, a'r profiad yn gyffredinol, ac mae llawer o ddilynwyr eisoes yn mynegi cyffro. Mae disgwyl i Lwybr Dyffryn Tywi agor yn llawn yn ddiweddarach eleni, ac mae ymwelwyr yn awyddus i fynd ar hyd y llwybr newydd hardd hwn.
Mae'r ymweliad hwn yn tynnu sylw at broffil cynyddol profiadau cerdded ac awyr agored Sir Gâr, gan gyflwyno tirweddau'r sir i gynulleidfa eang o gerddwyr brwd a selogion teithio.
|
Rhowch hwb i'ch busnes twristiaeth gydag AI!
Newyddion cyffrous i fusnesau twristiaeth: Mae modd bellach gofrestru ar gyfer cyrsiau AI Croeso Cymru!
Wedi'i gynllunio i fod yn ymarferol ac yn hygyrch, bydd y cwrs "AI Ymarferol: Cwrs Offer Syml i Gefnogi Eich Busnes Twristiaeth" yn eich helpu i wybod sut y gall AI wella marchnata, ymgysylltu â chwsmeriaid, ac effeithlonrwydd gweithredol.
Peidiwch â cholli'r cyfle hwn i ddiogelu eich busnes twristiaeth yn y dyfodol gyda'r offer digidol diweddaraf.
|
|
|
|
|
|
