Maethu yn Llanelli

Rydyn ni'n falch o gyhoeddi lansiad ein hymgyrch newydd, Maethu yn Llanelli, sydd â'r neges graidd: Gofalwyr maeth lleol i blant lleol. Dechreuwch eich siwrnai.

Mae Maethu yn Llanelli yn ymgyrch bwrpasol mewn ymateb i'r niferoedd cynyddol o blant a phobl ifanc mewn gofal maeth yn Sir Gâr sy'n dod o Lanelli.

Mae data diweddar yn dangos bod 76% o blant a phobl ifanc mewn gofal maeth yn Sir Gâr ar hyn o bryd yn dod o Lanelli (2023-2024). Ond mae llawer o blant a phobl ifanc yn cael eu lleoli y tu allan i'w tref enedigol oherwydd prinder gofalwyr maeth lleol.

Un pryder cyffredin sydd gan ddarpar ofalwyr maeth yw a yw eu cartref neu eu sgiliau yn addas. Fel rhan o'n hymgyrch Maethu yn Llanelli, rydyn ni'n mynd i'r afael â chamsyniadau cyffredin fel y rhain sy'n aml yn atal darpar ofalwyr maeth rhag gwneud ymholiadau.

Y gwir yw, mae llai yn eich rhwystro rhag maethu nag y mae llawer o bobl yn sylweddoli.

Does dim angen i chi fod yn berchen ar eich cartref; gallwch chi faethu os ydych chi'n rhentu, cyn belled â bod eich sefyllfa fyw yn sefydlog. Does dim angen i chi fod yn briod na chael eich plant eich hun. Gallwch chi faethu fel person sengl, fel rhan o gwpl, neu fel teulu.

Yr hyn sy'n hanfodol yw bod gennych chi ystafell wely sbâr a'ch bod chi'n gallu darparu amgylchedd diogel, cefnogol a gofalgar i blentyn neu berson ifanc.

Un pryder cyffredin arall sydd gan ddarpar ofalwyr maeth yw a yw eu ffordd o fyw yn ddigon hyblyg. Fel rhan o'n hymgyrch Maethu yn Llanelli, rydyn ni'n parhau i fynd i'r afael â chamsyniadau cyffredin fel hyn sy'n aml yn atal darpar ofalwyr maeth rhag gwneud ymholiadau.

Mae llawer o bobl yn cymryd yn ganiataol bod yn rhaid iddyn nhw fod gartref yn llawn amser, cael llawer o amser sbâr, neu wneud newidiadau mawr i'w bywydau bob dydd er mwyn maethu. Ond dyw hynny ddim yn wir bob amser. Rydyn ni'n cefnogi amrywiaeth eang o ofalwyr maeth. Mae rhai yn gweithio'n llawn amser, eraill yn gweithio'n rhan-amser, ac mae llawer yn cydbwyso cyfrifoldebau eraill ochr yn ochr â maethu.

Mae gwahanol fathau o faethu i gyd-fynd â gwahanol ffyrdd o fyw, o faethu tymor byr a thymor hir i fathau mwy arbenigol o faethu. Mae rhai gofalwyr maeth yn darparu seibiannau byr, tra bod eraill yn cefnogi plant a phobl ifanc yn fwy rheolaidd. Mae pob rôl yn helpu i sicrhau bod plant a phobl ifanc mewn gofal maeth yn Sir Gâr yn teimlo'n ddiogel a'u bod yn cael eu cefnogi.

Un o'r pryderon mwyaf cyffredin sydd gan ddarpar ofalwyr maeth yw a fydden nhw'n cael digon o gymorth, yn emosiynol ac yn ariannol. Fel rhan o'n hymgyrch Maethu yn Llanelli, rydyn ni'n parhau i fynd i'r afael â chamsyniadau cyffredin fel hyn sy'n aml yn atal darpar ofalwyr maeth rhag gwneud ymholiadau.

Rydyn ni'n darparu system gymorth gref i ofalwyr maeth, gan gydnabod eu bod nhw'n chwarae rhan hanfodol ym mywydau plant a phobl ifanc mewn gofal maeth yn Sir Gâr. Mae'r cymorth hwn yn dechrau gyda hyfforddiant cyn cymeradwyo, fel Sgiliau i Faethu, ac mae'n parhau gyda chyfleoedd dysgu a datblygu.

Rydyn ni'n darparu cymorth ariannol wedi'i deilwra i anghenion penodol y plentyn neu'r person ifanc a lefel y gofal sydd ei angen. Yn unol â'n fframwaith taliadau maethu newydd, mae gofalwyr maeth yn derbyn pecyn sy'n amrywio o £351 i £942 yr wythnos.