|
O fferm deuluol i gastell tylwyth teg
Roeddem yn falch iawn o hwyluso cyfweliad arbennig yn y Daily Mail yn arddangos stori ryfeddol fferm deuluol a ddatblygodd i fod yn atyniad castell i'r perchennog Marian Evans a'i gŵr. Mae'r erthygl yn taflu goleuni ar gyfuniad unigryw Sir Gâr o dreftadaeth, cymeriad a dilysrwydd.
Gyda miliynau o ddarllenwyr ledled y wlad, mae'r erthygl yn gosod Sir Gâr fel cyrchfan sy'n llawn trysorau cudd - lleoedd lle mae hanes a straeon personol yn dod yn fyw. Mae'n cynyddu ymwybyddiaeth, yn rhoi mwy o gymhelliant i ymwelwyr ddod yma, a mwy o resymau i deithwyr ddewis Sir Gâr ar gyfer eu gwyliau nesaf.
Darllenwch y cyfweliad llawn yma…
Oes gennych chi stori ddiddorol am eich busnes ac eisiau cymryd rhan mewn cyfweliadau gyda'r wasg yn y dyfodol?
|
|
Cymorth ariannol i fynychu digwyddiadau'r Hydref a'r Nadolig
 Bydd hi'n gyfnod prysur o ran gwerthu dros y misoedd nesaf ac rydym yn cynnig cymorth ariannol i'r rhai sydd am fynychu unrhyw ddigwyddiadau tymhorol neu ffeiriau blynyddol. Gyda'r nod o gynyddu cyfleoedd masnachu ac yn cael ei ariannu gan Gronfa Ffyniant Gyffredin Llywodraeth y DU, gallwch wneud cais am hyd at £1,000 i fynychu digwyddiadau lleol a chenedlaethol.
|
Dyddiadau Marchnadoedd Stryd Artisan mis Medi
 Mae'r marchnadoedd stryd artisan misol yn ôl ym mis Medi ac yn ymweld â Llanelli (dydd Iau 11 Medi), Rhydaman (dydd Gwener 12 Medi, a Chaerfyrddin (dydd Sadwrn 13 Medi). Maen nhw'n berffaith ar gyfer ymwelwyr sy'n awyddus i brofi bwyd a diod cartref, prynu anrheg unigryw wedi'i gwneud â llaw, neu fwynhau'r awyrgylch bywiog.
Rhowch wybod i'ch gwesteion trwy gynnwys hyn yn eich argymhellion lleol. Ariannwyd gan Gronfa Ffyniant Gyffredin Llywodraeth y DU..
|
|
Hyrwyddo Beth sy' 'mlaen ym mis Medi?
Helpwch eich gwesteion i wneud y gorau o'u hymweliad drwy arddangos y rhestr "be sy' mlaen" ym mis Medi 2025 yn eich busnes. O farchnadoedd lleol i wyliau a sioeau gwledig, mae'n llawn pethau i'w gweld a'u gwneud ym mhob rhan o'r sir.
Arddangoswch y rhestr yn eich derbynfa, mewn pecynnau croeso, neu ar hysbysfyrddau - unrhyw le y bydd gwesteion yn ei gweld.
Gadewch i ni sicrhau bod ymwelwyr yn parhau i grwydro, mwynhau, a dod yn ôl am ragor.
|
Ymgyrchoedd newydd i ddenu ymwelwyr i Sir Gâr
Yr hydref hwn, rydyn ni'n cyflwyno tair ymgyrch newydd gyffrous sydd wedi'u cynllunio i hyrwyddo prydferthwch y sir ac annog ymwelwyr ar adegau llai prysur.
-
Llwybrau Araf Sir Gâr – casgliad o deithiau tri diwrnod ecogyfeillgar sy'n gwahodd ymwelwyr i grwydro'r arfordir, cefn gwlad a threfi mewn modd hamddenol.
-
Gwyliau i Fenywod – Canllaw i anturiaethau gwyllt, eiliadau tawel a phrofiadau creadigol
-
Y Lle Mwyaf Rhamantus yng Nghymru – Dewch i ddathlu priodasau a cherrig milltir cofiadwy yn rhai o leoliadau hudolus sydd â chyflenwyr lleol dibynadwy
Gyda'i gilydd, nod yr ymgyrchoedd hyn yw ymestyn y tymor ymwelwyr, cefnogi busnesau lleol, a hyrwyddo twristiaeth gynaliadwy.
|
Llywodraeth Cymru yn adolygu'r rheol 182 diwrnod ar gyfer llety gwyliau
Mae Llywodraeth Cymru wedi lansio ymgynghoriad (yn cau ar 20 Tachwedd 2025) sy'n cynnig newidiadau allweddol i'r 'rheol 182 diwrnod' ar gyfer llety gwyliau hunanarlwyo. O dan reolau presennol Ebrill 2023, mae'n rhaid i eiddo fod ar gael am 252 diwrnod a'i osod am o leiaf 182 diwrnod i fod yn gymwys ar gyfer cyfraddau annomestig. Byddai'r newidiadau arfaethedig yn caniatáu i ddiwrnodau gosod gael eu cyfrif fel cyfartaledd dros sawl blwyddyn ac yn caniatáu hyd at 14 diwrnod o arosiadau elusennol am ddim i gyfrif tuag at y targed o 182 diwrnod. Mae'r ymgynghoriad hefyd yn ystyried cyfnod gras o 12 mis cyn i'r dreth gyngor uwch ddod i rym.
|
Lluniwch ddyfodol ein trefi – Dyma'ch cyfle i ddweud eich dweud!
Mae Cyngor Sir Caerfyrddin yn eich gwahodd i helpu i lunio dyfodol Caerfyrddin, Llanelli a Rhydaman. Mae cynlluniau creu lleoedd newydd yn cael eu datblygu i adeiladu ar Uwchgynlluniau adfer a grëwyd ar ôl COVID-19, ac mae eich llais yn bwysig. Mae digwyddiadau galw heibio yn cael eu cynnal ar 22 Medi | 27 Hydref (Neuadd Ddinesig San Pedr, Caerfyrddin), 23 Medi | 28 Hydref (Neuadd y Pensiynwyr, Rhydaman), a 24 Medi | 29 Hydref (Rhodfa Stepney, Llanelli), lle gallwch archwilio syniadau, rhannu adborth, a dylanwadu ar sut mae ein trefi yn esblygu. Methu â dod? Cymerwch ran ar-lein drwy dudalennau ymgynghori'r Cyngor Gadewch i ni weithio gyda'n gilydd i greu trefi bywiog, cysylltiedig a chroesawgar ar gyfer y cenedlaethau nesaf.
|
Llwybrau di-draffig
Anogwch eich gwesteion i weld harddwch Sir Gâr drwy fynd ar hyd llwybrau beicio a cherdded di-draffig ledled y sir. Mae fideo newydd yn dangos y llwybrau gorau sy'n ddelfrydol ar gyfer teuluoedd, unigolion, grwpiau o ffrindiau, neu unrhyw un sy'n dwlu ar yr awyr agored. Beth am grwydro Sir Gâr ar eich beic drwy fynd ar hyd llwybrau beicio di-draffig sy'n addas i deuluoedd, anturiaethwyr a'r rhai sy'n dwlu ar natur.
|
|
|
Marchnad Ffermwyr Llanymddyfri yn cyflawni Safon Diwydiant Newydd
Marchnad Ffermwyr Llanymddyfri yw'r cyntaf yng Nghymru i gael ei hachredu fel Marchnad Ffermwyr Go Iawn gan y Farm Retail Association. Mae'r cynllun, a lansiwyd ym mis Ionawr, yn gosod meincnod newydd ar gyfer dilysrwydd, gan sicrhau bod cwsmeriaid yn prynu'n uniongyrchol gan y ffermwyr, tyfwyr a chynhyrchwyr eu hunain.
Mae'r farchnad yn arddangos ystod eang o gynnyrch Cymreig, o gigoedd anifeiliaid sy'n bwydo ar borfa, cawsiau, mêl, ffrwythau a llysiau i ddiodydd artisan, cyffeithiau, cynnyrch wedi'i bobi, blodau a phlanhigion. Mae stondinau bwyd stryd hefyd yn ffynhonnell cynhwysion lleol.
Llongyfarchiadau i bawb sy'n cymryd rhan am y llwyddiant gwych hwn.
|
Peidiwch â gadael hi'n hwyr ar gyfer cynllunio eich digwyddiad
Mae'r ychydig fisoedd nesaf yn rhai prysur wrth i gymunedau drefnu digwyddiadau Calan Gaeaf, nosweithiau Tân Gwyllt, gorymdeithiau Sul y Cofio, digwyddiadau cynnau goleuadau Nadolig a marchnadoedd Nadoligaidd i enwi ond ychydig.
Gan fod angen trwyddedau, hawlenni a chau ffyrdd ar gyfer nifer o'r digwyddiadau, gofynnir i drefnwyr digwyddiadau adael digon o amser i wneud cais am y pethau hyn wrth iddyn nhw gynllunio'u digwyddiadau (hyd at 12 wythnos ar gyfer cau ffyrdd). Cofiwch am ein cynllun parcio am ddim ar gyfer digwyddiadau hefyd.
Mae canllawiau a chyngor gan swyddogion y Cyngor ac aelodau'r Grŵp Cynghori ar Ddiogelwch fel y gwasanaethau Tân, yr Heddlu a'r Ambiwlans ar gael, gyda thempledi newydd wrth law i'ch cynorthwyo i ddarparu gweithgareddau diogel a bywiog. Mae dros 60 o ddigwyddiadau wedi cael cymorth hyd yma yn 2025 felly cysylltwch â ni cyn gynted â phosibl
|
|
|
£10 miliwn ychwanegol i gefnogi busnesau yng Nghymru ar eu taith i fod yn sero net
Wedi'i lansio gyntaf ym mis Mawrth 2023, mae Cynllun Benthyciadau Busnes Gwyrdd Llywodraeth Cymru bellach yn cael ei ymestyn i £20 miliwn ac mae cyllid ar gael tan 2028.
Gyda phroses ymgeisio syml, mae Cynllun Benthyciadau Busnes Gwyrdd yn cefnogi ystod eang o dechnolegau carbon isel ac effeithlonrwydd ynni, gan gynnwys gwresogi, awyru, pympiau gwres, datrysiadau o ran rheoli gwastraff, a gwella adeiladwaith adeiladau
|
|
|
|
|
|
