Diweddariad ar Ddiwydiant Twristiaeth Sir Gâr - Mehefin 2025

Fis diwethaf cafodd cwrs golff gwallgof 12 twll newydd yn Caban ym Mhentywyn ei ddatgelu gan dîm y Cyngor, ac mae'n sicr o fod yn boblogaidd ymhlith yr hen a'r ifanc. Hefyd mae pobl wedi dechrau mwynhau 4 milltir cyntaf Llwybr Dyffryn Tywi rhwng Abergwili a Nantgaredig. Pan fydd wedi'i orffen, bydd gan gerddwyr, beicwyr, a defnyddwyr cadeiriau olwyn lwybr di-draffig 16.7 milltir rhwng Caerfyrddin a Llandeilo; llwybr ac iddo olygfeydd godidog.

Mae dau gynllun "Pethau Pwysig" dan gefnogaeth Llywodraeth Cymru wedi'u cwblhau, yn Amgueddfa Caerfyrddin a thraeth Llansteffan, gan wella'r ddau atyniad poblogaidd hyn ymhellach, ac mae'r Cyngor unwaith eto wedi bod yn llwyddiannus yn ei geisiadau i wella Parc Gwledig Pen-bre a Canolfan Adar y Gwlyptir Llanelli.

 Ymweliad Ymgyfarwyddo â Llwybr Dyffryn Tywi AM DDIM ar gyfer Busnesau Twristiaeth!

Dysgwch sut gall Llwybr Dyffryn Tywi roi hwb i'ch busnes. Ymunwch â ni am daith feicio dywysedig am ddim ar hyd Llwybr newydd Dyffryn Tywi – darperir beiciau ac e-feiciau gan Actif Sir Gâr.

Dechrau am 10am | Clwb Rygbi Nantgaredig | 11 Gorffennaf

Mae'r diwrnod yn cynnwys:

• Cyflwyniad gan Simon Charles ar ddatblygiad y llwybr
• Lansio Pecyn Cymorth Beicio newydd ar gyfer busnesau twristiaeth
• Sesiynau galw heibio 1 i 1 gyda Thîm Twristiaeth y Cyngor Sir at ddibenion hyrwyddo, busnes a chymorth cyllido.

Mae'r digwyddiad trasig yng nghanol dinas Lerpwl, ynghyd â digwyddiadau tebyg mewn marchnadoedd gaeaf ledled Ewrop, yn ein hatgoffa'n ddifrifol o bwysigrwydd blaenoriaethu diogelwch y cyhoedd yn yr holl ddigwyddiadau cymunedol a digwyddiadau sy'n cael eu trefnu.

Mae'r digwyddiadau hyn yn tynnu sylw at yr angen hanfodol i drefnwyr digwyddiadau roi cynlluniau diogelwch trylwyr a chadarn ar waith. Mae'r bygythiad o ddefnyddio cerbydau yn arfau yn gallu effeithio ar unrhyw leoliad mewn gwirionedd, ac mae cynllunio rhagweithiol yn hanfodol i amddiffyn y rhai sy'n bresennol a staff.

Mae canllawiau cynhwysfawr ar gael drwy'r Grŵp Cynghori ar Ddiogelwch Digwyddiadau i helpu trefnwyr i wneud hynny. Mae'r grŵp hwn yn dwyn ynghyd weithwyr proffesiynol profiadol o'r Cyngor Sir, yr Heddlu, Tân ac Achub, yr Asiantaeth Cefnffyrdd, a'r Gwasanaethau Ambiwlans i gynnig cyngor arbenigol ar reoli traffig, asesiadau risg, a chynllunio digwyddiadau yn gyffredinol. Mae'r Grŵp yn gweithredu mewn modd cefnogol a chydweithredol i sicrhau bod safonau ansawdd a diogelwch yn parhau i wella.

Os ydych chi'n ymwybodol o unrhyw ddigwyddiadau sy'n cael eu cynnal yn eich ardal chi cyn bo hir, dylech chi annog y trefnwyr i gysylltu â'r Grŵp Cynghori drwy anfon e-bost at GCDiogelwchDigwyddiadau@sirgar.gov.uk  cyn gynted â phosibl. Gall cysylltu'n gynnar wneud gwahaniaeth sylweddol wrth sicrhau digwyddiad diogel a llwyddiannus i bawb.

Lledaenwch y gair ar hyd a lled eich cymuned leol gan fod grwpiau, clybiau a sefydliadau lleol yn gallu rhestru eu digwyddiadau AM DDIM ar wefan swyddogol Darganfod Sir Gâr, sy'n amseru perffaith ar gyfer ffeiriau pentref, gwyliau cerddoriaeth, gweithdai, rasys hwyl, a phob dim arall! 

Rhannwch hyn gyda'ch rhwydweithiau ac anogwch drefnwyr digwyddiadau lleol i gymryd rhan!

Beth am annog eich gwesteion i ddysgu am hanes difyr Caerfyrddin gyda'r Llwybr Plac Glas newydd! Mae'r llwybr hwn yn tywys ymwelwyr drwy strydoedd hanesyddol y dref, i'r mannau lle mae placiau sy'n dathlu'r bobl a'r tirnodau sydd wedi llunio Caerfyrddin dros y canrifoedd. O wyddonwyr arloesol fel Dorothea Bate i ffigurau dylanwadol fel David Charles a Syr Richard Steele, mae'r llwybr yn cynnig cipolwg diddorol ar orffennol y dref. Ymysg y prif lefydd y mae Eglwys San Pedr, y Neuadd Sirol, a Chofeb Picton.

Mae tair cronfa newydd ar gael nawr i gefnogi busnesau lleol: Lansio Busnes Sir Gâr gyda £1,000 i entrepreneuriaid newydd gychwyn eu busnes: Cymorth i arddangos nwyddau mewn digwyddiadau lleol a chenedlaethol; a Chymorth Busnes 1 i 1

I gael rhagor o wybodaeth ac i wneud cais, cysylltwch â'r tîm Ymgysylltu â Busnesau

Wrth i'r tywydd cynhesach a sychach gyrraedd Sir Gâr, dyma'r amser perffaith i fwynhau gweithgareddau awyr agored fel barbeciwiau, digwyddiadau cymunedol, neu deithiau cerdded ym myd natur. Ond rhaid bod yn ofalus yn y tywydd sych.

Rydym yn falch o gefnogi Addewid Croeso Cymru – ymrwymiad i ofalu am ein gilydd a'n hamgylchedd. Dyma sut y gallwch helpu:

• Parchu'r Tir: Cadwch at y llwybrau sydd ag arwyddion a pheidiwch â niweidio natur.
• Peidio â Gadael ôl:  Ewch â'ch sbwriel i gyd, yn cynnwys eich gwastraff barbeciw, adref gyda chi.
• Cadw Pethau'n Ddiogel: Gan fod mwy o beryg o danau gwyllt, diffoddwch danau a barbeciwiau'n ddiogel bob tro.

I gael awgrymiadau ynghylch atal tanau gwyllt, ewch i Doethi Danau Gwyllt.

Mae ein Tîm Busnes yn cynnig cyfres o weithdai rhyngweithiol am ddim i gefnogi datblygiad busnesau ledled y sir, gan gynnwys cyrsiau marchnata digidol i helpu busnesau lleol i dyfu ac addasu mewn maes sy'n newid yn gyflym. Ymhlith gweithdai'r dyfodol mae: LinkedIn ar gyfer Twf Busnes: Beth sy'n Newydd ar Instagram?: TikTok ar gyfer Busnes a Deallusrwydd Artiffisial ar gyfer Cyfryngau Cymdeithasol.