Cyhoeddi tenantiaid cyntaf ar gyfer GloWorks - canolfan newydd Llywodraeth Cymru ar gyfer y diwydiannau creadigol ym Mae Caerdydd

Boom Pictures a Sequence, dau gyfranogwr pwysig yn sector y diwydiannau creadigol yng Nghymru, fydd y tenantiaid cyntaf yn GloWorks - canolfan flaenllaw newydd Llywodraeth Cymru ar y glannau yng nghanol Porth Teigr, Bae Caerdydd.

Mae Boom Pictures yn cymryd drosodd y tri llawr uchaf i gartrefu 110 aelod o staff tra bo Sequence yn cymryd drosodd yr ail lawr i letya 50 aelod o staff.

Dywedodd Huw Eurig Davies, un o'r cyd-sylfaenwyr Boom Pictures: "Bydd cael ein lleoli yn y datblygiad newydd cyffrous yma yn ddi-os yn hwb pellach i greadigrwydd a llwyddiant hirdymor ein cwmni".

Dywedodd Paul Thomas, Cyfarwyddwr Gwerthiannau a Marchnata Sequence: "Rydyn ni'n rhagweld y bydd symud yn ein helpu i dyfu'r busnes ac yn gyfle i greu mwy o swyddi a denu'r dalent orau yn yr ardal".

Mae GloWorks yn cynnig lle i fusnesau creadigol a busnesau cychwynnol gydweithio a chreu cyfleoedd swyddi newydd i dalent ifanc yng Nghymru. 

Darllenwch fwy

Da Vinci'n Demons yn dychwelyd

Mae Da Vinci's Demons wedi dychwelyd a dechreuodd ffilmio ar 23 Mehefin yng Nghymru. 

Mae'r ddrama teledu ddeallus o UDA yn stori ffuglennol am fywyd cynnar Leonardo da Vinci.  Caiff y sioe ei datblygu a'i chynhyrchu ar y cyd â BBC Worldwide a'i ffilmio mewn lleoliadau yn Abertawe, Castell-nedd Port Talbot a Pharc Margam. 

Cafodd pennod olaf yr ail gyfres ei darlledu yn y DU am y tro cyntaf yn Amgueddfa Genedlaethol Cymru ar 3 Mehefin 2014.

Dywedodd Jane Tranter, Pennaeth Adjacent Productions: "Y tîm cynhyrchu hynod dalentog o Gymru sy'n bennaf cyfrifol am lwyddiant rhyngwladol Da Vinci's Demons gan iddo ein helpu ni i greu cyfres ddrama o'r radd flaenaf ar gyfer cynulleidfa ryngwladol. 

"Mae'r gefnogaeth a roddwyd i Da Vinci's Demons gan Lywodraeth Cymru a busnesau lleol wedi bod yn allweddol i lwyddiant parhaus y sioe ac mae'n bleser o'r mwyaf i mi ein bod yn dychwelyd am drydedd gyfres. Mae hyn yn profi yn wir fod buddsoddi mewn talent yn fuddsoddiad yn y dyfodol".
Cefnogir y sioe gan dîm sector Diwydiannau Creadigol Llywodraeth Cymru. 

Take Down fydd y ffilm gyntaf i gael ei hariannu drwy Gyllideb Buddsoddi yn y Cyfryngau Cymru gwerth £30m

Mae Pinewood Studios wedi datgelu'r ffilm nodwedd gyntaf i gael buddsoddiad drwy Gyllideb Buddsoddi yn y Cyfryngau newydd Llywodraeth Cymru, gwerth £30m.

Mae'r ffilm nodwedd, y mae Ed Westwick (Gossip girl), Jeremy Sumpter (Peter Pan, Soul Surfer) a Phoebe Tonkin (The Vampire Diaries) yn actio ynddi, yn mynd rhagddi yn sgil cael ei hariannu drwy Gyllideb Buddsoddi yn y Cyfryngau Llywodraeth Cymru.

Mae'r stori sydd wedi'i ffilmio yng Nghymru ac ar Ynys Manaw yn canolbwyntio ar grŵp o fyfyrwyr mewn ysgol breswyl i blant cyfoethog trafferthus.  Maent yn penderfynu mynd i'r afael â materion eu hunain ar ôl i ddihirod gymryd pawb ar y campws yn wystlon.

Mae Cyllideb Buddsoddi yn y Cyfryngau Llywodraeth Cymru, gwerth £30m ar gael i gynyrchiadau ffilm a theledu deallus sy'n gymwys yn y DU, drwy Pinewood Pictures, cyfrwng buddsoddi mewn ffilm a theledu Pinewoods. Mae'n ofynnol i gynyrchiadau sy'n gymwys yn y DU ffilmio 50% o'u prif ffotograffiaeth yng Nghymru. 

Darllenwch fwy

Hawlfraint yn eich Hurtio, Nodau Masnach yn eich Mwydro?

Hyfforddiant ar-lein AM DDIM i fusnesau.

Mae'r Swyddfa Eiddo Deallusol wedi datblygu pedwar modiwl ar-lein i fusnesau er mwyn eu helpu i nodi eu hasedau eiddo deallusol a rhoi rhywfaint o wybodaeth sylfaenol iddynt am sut mae eu hamddiffyn.  Maent yn cwmpasu:

• nodau masnach
• patentau
• dyluniadau cofrestredig
• hawlfraint

Rhagor o wybodaeth am sut y gallwch gael hyfforddiant am ddim.

Y Darlithoedd Gwneud yn Gwneud hi eto

Mae'r Darlithoedd Gwneud a gynhaliwyd yn Aberteifi dros bedwar diwrnod wedi rhagori ar ddisgwyliadau unwaith yn rhagor.  Teithiodd 150 o bobl o bob cwr o'r byd yn cynnwys Awstralia, UDA, yr Almaen, yr Ariannin a'r Iseldiroedd i orllewin Cymru.  Disgrifiodd cyfranogwyr y digwyddiad, a gefnogir gan Lywodraeth Cymru, fel y "digwyddiad gorau i mi erioed fod iddo", "digwyddiad hollol drawsnewidiol" ac "anhygoel".

Dywedodd David Hieatt, un o Gyd-sylfaenwyr Darlithoedd Gwneud: "Peidiwch byth â bychanu digwyddiadau bach.  Yn enwedig digwyddiadau bach o'r radd flaenaf".

Ac mae'r ffaith bod y Darlithoedd Gwneud yn dod yn gynyddol sefydledig nid dim ond yng Nghymru, ond ledled y byd yn UDA ac Awstralia yn profi mai dyna yw'r digwyddiadau hyn. 

Y Dylathon

Marathon darllen yn ddi-baid am 36 awr yw'r Dylathon lle bydd sêr enwog yn darllen gwaith Dylan Thomas yn fyw ar lwyfan yn Theatr y Grand Abertawe rhwng 11am ddydd Sul 26ain ac 11pm ddydd Llun 27ain Hydref.

Bydd cymysgedd o sêr yn cynnwys Michael Sheen, Rob Brydon, Ruth Jones, David Emanuel, Ruth Madoc, Greta Scacchi, Melanie Walters, Sian Phillips, Mal Pope a Jonathan Pryce yn perfformio'r holl gerddi, straeon byrion, llythyrau a darllediadau enwog yn cynnwys Dan y Wenallt ('Under Milkwood').

Bydd enwau cyfarwydd o'r cyfryngau, ffilm, theatr, gwleidyddiaeth, llenyddiaeth, cerddoriaeth a chwaraeon ynghyd â phlant ysgol lleol, corau o Gymru a grwpiau ieuenctid a chymunedol yn ymuno â nhw.

Bydd y Dylathon yn creu etifeddiaeth barhaol i bobl ifanc yng Nghymru.