Buddsoddiad gwerth £50 miliwn yn rhoi Cymru wrth galon y diwydiant sy’n arbenigo mewn lled-ddargludyddion cyfansawdd yn Ewrop

Mae Edwina Hart, Gweinidog yr Economi a Gwyddoniaeth, wedi croesawu buddsoddiad gwerth £50 miliwn sy’n rhoi Cymru wrth galon y diwydiant sy’n arbenigo mewn lled-ddargludyddion cyfansawdd yn Ewrop.

Cyhoeddodd y Canghellor George Osborne y byddai Llywodraeth y DU yn gwneud y buddsoddiad hwn, dros y bum mlynedd nesaf, i sefydlu Canolfan Genedlaethol y DU ar gyfer Lled-ddargludyddion Cyfansawdd yn Ne Cymru, fel rhan o’r rhwydwaith o gatapyltiau Ymchwil a Datblygu.

Dywedodd Mrs Hart: “Bydd y cyhoeddiad hwn o gymorth i wireddu ein huchelgais i greu clwstwr o ganolfannau yn Ne Cymru a fydd yn arbenigo yn y diwydiant lled-ddargludyddion cyfansawdd.  Byddant yn gweithio ar raddfa Ewropeaidd ac yn cyrraedd y byd i gyd.  Mae’r datblygiad hwn wir yn dangos hyder ym Mhrifysgolion Cymru, yn ei busnesau lled-ddargludyddion a’i sgiliau.

Mae’n ben llanw dwy flynedd o drafodaethau rhwng Llywodraeth Cymru, Innovate UK, y sector busnes lled-ddargludyddion yn Ne Cymru, Prifysgol Caerdydd a Llywodraeth y DU.” Darllen ymlaen.

Cynhyrchiant Tan Y Castell yn cynyddu gyda chyllid gan Lywodraeth Cymru Mae becws traddodiadol Tan Y Castell o Sir Benfro wedi prynu offer newydd gyda chymorth cefnogaeth arloesedd. Dywedodd Paul Mear, rheolwr gyfarwyddwr y cwmni, o safbwynt datblygu cynnyrch newydd, na fyddai’r cwmni wedi gallu tyfu mor gyflym heb y cyllid arloesedd. “Mae wedi agos drysau newydd i ni ynghylch sut i feddwl am gynhyrchu.” meddai. I ganfod sut y gall cymorth arloesedd Llywodraeth Cymru gynorthwyo eich busnes chi darllenwch yma.

Llywodraeth Cymru’n cynorthwyo i gynnal swyddi Senior Flexonics Mae Senior Flexonics, cwmni peirianneg o Grymlyn, wedi datblygu Oerydd Ailgylchrededig Nwyon Gwacáu gyda chefnogaeth arloesedd Llywodraeth Cymru. Mae hyn hefyd wedi cynorthwyo i sicrhau bod y cwmni a’u swyddi yn aros yn y DU ac mae wedi cyfrannu at newidiadau o ran agwedd yn y sefydliad, sydd wedi rhoi mwy o bwyslais ar arloesedd ac Ymchwil a Datblygu.  Darllenwch ymlaen.

Arloeswyr y dyfodol yng Nghymru Mae Oliver Stokes, disgybl ysgol o Drefynwy wedi curo bron i 16,000 o fyfyrwyr i fod yn enillydd Gwobrau Arloesedd Myfyrwyr 2015. Rhoddwyd canmoliaeth yn y Gwobrau i uned garbonadu gludadwy Oliver ar gyfer poteli diod, gwobrau sy’n cael eu cynnal gan Lywodraeth Cymru a CBAC (Cyd-bwyllgor Addysg Cymru yn flaenorol). Roedd 80 o brosiectau yn cael eu harddangos yn y gwobrau eleni, a bydd nifer o’r rhain yn cynrychioli Cymru yn awr yn The Big Bang Fair yn yr NEC yn Birmingham ym mis Mawrth.  Darllenwch ymlaen.

Pad lansio cyntaf Gogledd Cymru Mae cystadleuaeth Pad Lansio ffotoneg yn cael ei chynnal yng Ngogledd Cymru. Mae cynnig Pad Lansio Innovate UK yn cynnig cyfle cyffrous i ddatblygu’r clwstwr o dechnolegau ffotoneg, electro-optig ac optoelectroneg. Mae Padiau Lansio yn darparu cyllid ar gyfer arloesedd busnesau sy’n cefnogi datblygiad ac atgyfnerthu clystyrau o gwmnïau uwch-dechnoleg bach a chanolig eu maint mewn meysydd themâu a lleoliadau daearyddol penodol. Cynhelir digwyddiad gwybodaeth ar 11 Chwefror 2016 yn y Ganolfan OpTIC, Llanelwy. Darllenwch fwy am hyn a chael gwybodaeth am y broses gwneud cais

Ymchwil yn ysgogi datblygiad cynnyrch gyda chefnogaeth gan Lywodraeth Cymru Mae cwmni Flamgard o Bont-y-pŵl wedi atgyfnerthu ei arbenigedd ymchwil a datblygu mewnol drwy sefydlu labordy ymchwil a datblygu newydd ym mhencadlys y cwmni, gyda chefnogaeth gan gyllid arloesedd Llywodraeth Cymru. Bydd y cyfleuster yn galluogi Flamgard i gynnal profion penodol i brofi llif aer, gostyngiadau pwysedd a mesurau perfformiad eraill yn ymarferol, gan ddefnyddio offer profi penodedig. Dywedodd Steve Edwards, Rheolwr Gyfarwyddwr y cwmni:  “Diolch i SMARTCymru rydym wedi llwyddo i ddatblygu diffoddwr tân o safon uchel ac mae hyn wedi ein cynorthwyo i fod yn un o brif gyflenwyr dyfeisiadau o’r fath yn y diwydiannau prosesau”. I ganfod sut y gallwn gynorthwyo eich cwmni chi darllenwch yma.

Archwiliad iechyd i fusnesau arloesedd Mae gwasanaeth Arloesi SMART Llywodraeth Cymru yn cynnig gwerth tri diwrnod o gyngor am ddim i fusnesau ar ddylunio a gweithgynhyrchu. Mae’r cymorth hwn yn rhan o becyn newydd o gefnogaeth SMART sy’n cael ei chefnogi gan gyllid yr Undeb Ewropeaidd.  Mae Rhys Hughes, o P&A Group wedi elwa o dderbyn y cyngor hwn.  Dywedodd “Byddwn yn defnyddio’r wybodaeth hon yn awr i’n helpu i ddatblygu ein prosesau gweithgynhyrchu ac yn yr wythnosau diwethaf rydym wedi cyflogi unigolyn â chefndir o gynhyrchu a chynllunio i’n cynorthwyo gyda’r gwelliannau sydd eu hangen. I gael gwybodaeth ar sut y gallwn gynorthwyo eich busnes chi darllenwch yma.

Taith Exporting is GREAT yn ymweld â Chymru

Estynnir gwahoddiad i gwmnïau yng Nghymru fynychu cyfres o ddigwyddiadau am ddim er mwyn datblygu eu busnes allforio.

Mae taith Exporting is GREAT, menter ar y cyd rhwng Llywodraeth Cymru a Masnach a Buddsoddi y DU yn ymweld â Chymru rhwng 15 a 26 Chwefror.

Bydd y digwyddiadau, a fydd yn cael eu cynnal mewn deg lleoliad ar hyd a lled y wlad, yn gallu darparu cyfle i’ch busnes gwrdd ag arbenigwyr i drafod cyfleoedd busnes rhyngwladol ac i ofyn am gyngor ar eu marchnadoedd targed drwy gyfres o gyfarfodydd un i un a seminarau - beth bynnag yw eich maint neu sector.  Darllenwch fwy a threfnu eich apwyntiad er mwyn sicrhau bod eich busnes yn gallu cysylltu â’n rhestr gynhwysfawr o gysylltiadau rhyngwladol.

Lansio Cyfeiriadur Busnesau Cymru

Mae Busnes Cymru wedi lansio cyfeiriadur ar-lein newydd o Fusnesau Cymru er mwyn cynorthwyo cwmnïau i hyrwyddo eu hunain i ddarpar gwsmeriaid newydd, a chodi eu proffil.

Gall defnyddwyr wneud chwiliad cyflym am fusnesau yng Nghymru yn ôl eu henw, sector, rhanbarth a hidlwyr eraill ac mae’r broses rhestru a chwilio yn rhwydd.

Gallwch hybu eich nwyddau, gwasanaethau a’ch cymwysterau i fusnesau eraill a darpar gwsmeriaid a galluogi i fusnesau a defnyddwyr eraill ganfod eich busnes chi yma.

Hwb ariannol o £14 miliwn gyda chefnogaeth yr UE i beirianneg uwch yng Nghymru

Mae Llywodraeth Cymru wedi cyhoeddi prosiect newydd gwerth £14 miliwn gyda chefnogaeth yr UE i ddatblygu’r genhedlaeth nesaf o arweinwyr yn sector peirianneg Cymru.

Gyda chefnogaeth ariannol gwerth £8.6 miliwn gan yr UE, bydd Academi Deunyddiau a Gweithgynhyrchu Prifysgol Abertawe yn darparu hyfforddiant mewn sgiliau technegol arbenigol a rheoli sy’n allweddol i’r sector peirianneg uwch a deunyddiau.  Darllenwch ymlaen.

Rhyddhad Ardrethi ar Fusnesau Bach wedi’i ymestyn am flwyddyn gyda £98 miliwn

Bydd Cynllun Rhyddhad Ardrethi Busnesau Bach Llywodraeth Cymru yn cael ei ymestyn am flwyddyn arall, yn ôl Edwina Hart, Gweinidog yr Economi.

Mae’r cynllun £98 miliwn, fydd yn helpu dros dri chwarter o fusnesau yng Nghymru, yn golygu na fydd oddeutu hanner pob busnes cymwys yn talu ardrethi busnes eto yn y flwyddyn ariannol nesaf.  Darllenwch ymlaen.

BioCymru 2016 – 1-2 Mawrth, Canolfan Mileniwm Cymru, Bae Caerdydd

BioCymru yw’r digwyddiad blaenllaw ar gyfer y sector gwyddorau bywyd yng Nghymru sy’n cael ei gynnal gan Lywodraeth Cymru.  Gyda llu o siaradwyr byd-enwog, gweithdai, cynllun partneru a noddwyr, y digwyddiad hwn yw un o’r cynadleddau mwyaf yng Nghymru ar y Gwyddorau Bywyd.

Mae’r thema o gysylltu a chydweithio eleni yn cynnig cyfle unigryw yng Nghymru i ryngweithio gydag unigolion allweddol, arloeswyr, buddsoddwyr, cwmnïau ac academyddion.  Bydd cyfle i chi ymuno mewn trafodaethau amrywiol a rhannu eich syniadau chi a datblygu cysylltiadau newydd gyda thros 600 o fynychwyr Darllenwch ymlaen.

Gŵyl Arloesedd Cymru 2016 – 20 Mehefin - 1 Gorffennaf

Bellach yn ei 3edd flwyddyn, bydd Gŵyl Arloesedd Cymru yn arddangos arloesedd yng Nghymru drwy nifer o ddigwyddiadau, seminarau a gweithdai sy’n cael eu cynnal gan gwmnïau a chan academia.

Bydd yr Ŵyl yn darparu cyfle i arloeswyr rwydweithio gydag arbenigwyr diwydiant ac arddangos eu cynnyrch a’u gwasanaethau i ddarpar gwsmeriaid ac i’r cyhoedd o Gymru a thu hwnt. Darllenwch ymlaen.

Dilynwch ni ar  @WG_innovation

I gael y wybodaeth ddiweddaraf am newyddion Arloesedd a chysylltu â thîm Arloesedd adran yr Economi, Gwyddoniaeth a Thrafnidiaeth, gallwch ein dilyn ar Twitter.