Teithiau masnach

Er bod dulliau cyfathrebu modern yn ei gwneud yn haws ac yn rhwyddach meithrin cysylltiadau dros y byd, byddai’r rhan fwyaf o bobl yn cytuno ei bod yn well cynnal busnes wyneb yn wyneb pryd bynnag y bo modd.

Gallwn ni eich helpu chi i gyrraedd eich marchnad. Mae ein rhaglen ni o deithiau masnach yn gyfle i chi gynnal trafodaethau gwerthfawr a dylanwadol iawn gyda darpar gwsmeriaid.

Os ydych chi’n awyddus i sefydlu cysylltiadau â chwsmeriaid yn y Dwyrain Canol, pam nad ymunwch chi ag un o’n teithiau masnach neu sioeau arddangos yno:

• Taith fasnach i GITEX, Dubai, yr Emiraethau Arabaidd Unedig – 11-17 Hydref 2014

• Taith fasnach i’r Big 5, Dubai, yr Emiraethau Arabaidd Unedig – 15-21 Tachwedd 2014

• Taith fasnach i Dubai, yr Emiraethau Arabaidd Unedig – 15-21 Tachwedd 2014

• Taith fasnach i Arab Health, yr Emiraethau Arabaidd Unedig – 24-30 Ionawr 2015

• Taith fasnach i Qatar ac Oman – 7-13 Chwefror, 2015 

• Taith fasnach i Gulf Food, Dubai, yr Emiraethau Arabaidd Unedig – 19-22 Chwefror, 2015 

Darllenwch ragor am ein rhaglen o deithiau masnach ac arddangosfeydd. 

Oman: 

Olew a nwy yw sylfaen economi Oman ond mae’r wlad yn prysur ddatblygu diwydiannau eraill newydd hefyd, gan gynnwys cynhyrchion olew (petrogemegion/mhetalau), porthladdoedd a logisteg, pysgodfeydd a thwristiaeth fodern a ffyniannus. Mae Prydain wedi bod yn masnachu gydag Oman ers dros 350 o flynyddoedd ac mae nwyddau a gwasanaethau o Brydain yn adnabyddus a phoblogaidd yno. Caiff safonau Prydeinig eu defnyddio a’u derbyn yn eang hefyd, felly mae Oman yn farchnad werth chweil i allforwyr o Gymru.

Kuwait:

Mae economi Kuwait yn ddibynnol iawn ar refeniw olew ond bydd Gynllun Datblygu Kuwait yn lleihau’r ddibyniaeth honno. Cyhoeddwyd y cynllun yn 2009 a’i nod yw trawsnewid Kuwait o wlad ddibynnol ar olew i ganolfan fasnachol ac ariannol bwysig. Buddsoddwyd mewn amrywiaeth o sectorau economaidd, yn enwedig adeiladu, addysg a hyfforddiant, yr amgylchedd, awyrennau, gofal iechyd, amddiffyn a diogelwch a manwerthu. Mae cwmnïau o Brydain yn uchel eu parch am eu sgiliau ymgynghori, technoleg, hyfforddiant a’u gwaith caleda c mae gan Kuwait berthynas dda gyda Phrydain ers tro byd. Mae Kuwait yn farchnad ddynamig ac agored i allforwyr o Gymru.

Os hoffech ymchwilio ymhellach i’r marchnadoedd hyn, cysylltwch â’n tîm masnach ni. Gallwn ddarparu cefnogaeth wedi’i deilwra i’ch cwmni chi, boed ar gyfer canfod y llwybr gorau i dorri trwodd i farchnadoedd Asia, nodi’r cyfleoedd yn y marchnadoedd hynny neu ymweld â’r gwledydd ar un o’n teithiau masnach ni.

Seminarau Allforio

Er mwyn eich helpu chi i baratoi ar gyfer marchnadoedd tramor, rydyn ni’n cynnal seminarau rheolaidd am gyfleoedd y farchnad a phrosesau allforio. Mae’r seminarau hyn yn ddefnyddiol ar gyfer casglu gwybodaeth am y materion allforio diweddaraf ond maen nhw hefyd yn gyfle i rwydweithio â busnesau o’r un anian. Daeth dros 50 o gwmnïau o bob rhan o Gymru i seminar a gynhalion ni ar gyfleoedd busnes yr Emiraethau Arabaidd Unedig yn ddiweddar.

Rydyn ni’n datblygu ein rhaglen o seminarau allforio ar gyfer yr hydref nesaf - cadwch lygad am y manylion yng nghylchlythyr nesaf Allforio Cymru.
Mae nifer o sefydliadau eraill yn cynnal seminarau ledled Cymru i gwmnïau sy’n allforio. Dyma rai ohonynt:
Mae Cymdeithas Cwmnïau Allforio Gorllewin Cymru yn rhoi cymorth i allforwyr ar draws y De. Maen nhw’n cynnal seminarau rheolaidd ar amryw o faterion perthnasol.
Mae Centre for Business yn cynnal cyrsiau ymarferol i gwmnïau ar y gwahanol gamau yn y broses allforio.
Cyngor Busnes Tsieina a Phrydain yw prif sefydliad y Deyrnas Unedig ar gyfer hyrwyddo masnach a buddsoddi yn Tsieina. Maen nhw’n cynnal seminarau a gweithdai cymorth i gwmnïau sy’n edrych ar y farchnad yn Tsieina, gan gynnwys gweithdai cymorth rheolaidd yng Nghymru.
Mae Siambr Fasnach Gorllewin Caer a Gogledd Cymru yn rhoi cefnogaeth i allforwyr o bob rhan o’r Gogledd. Maen nhw’n cynnal cyrsiau ar amryw o bynciau yn ymwneud ag allforio.