Ymholiadau ynglŷn a derbyn archebion ar gyfer cyfnod y Pasg, mewn llety gwyliau hunangynhwysol
Fel y nodwyd yn y cylchlythyr diwethaf, yn dilyn yr adolygiad diweddaraf o gyfyngiadau coronafeirws, mae Llywodraeth Cymru hefyd wedi cyhoeddi rhai mân newidiadau i'r rheolau presennol. Darllenwch yr hysbysiad i'r wasg am ragor o wybodaeth.
Yng nghynhadledd y wasg ddydd Gwener 19 Chwefror, roedd datganiad y Prif Weinidog yn cynnwys ;
- Cynhelir yr adolygiad nesaf o'r cyfyngiadau yn yr wythnos sy'n dechrau ar 8 Mawrth
- Cawn drafodaethau pellach gyda'r sector twristiaeth ynglŷn â'r hyn a allai fod yn bosibl os bydd sefyllfa iechyd y cyhoedd yn caniatáu
- Cynhelir cyfarfodydd gyda'r tasglu twristiaeth i drafod ailagor yn raddol gan ddechrau gyda llety hunangynhwysol
Bydd Llywodraeth Cymru nawr yn gweithio gyda'r sector ar y posibilrwydd o ailagor llety hunangynhwysol yng Nghymru fel rhan o'r Adolygiad nesaf.
Bydd y penderfyniad terfynol yn dibynnu ar sefyllfa iechyd y cyhoedd bryd hynny ac felly ni allwn roi unrhyw sicrwydd y caniateir i lety hunangynhwysol agor a pha reolau teithio a chartrefi a fydd yn berthnasol . Felly, mae angen i ni atgoffa darparwyr llety bod unrhyw archebion sy'n syrthio y tu hwnt i'r cyfnod adolygu 21 diwrnod presennol (sy'n dod i ben ar 12 Mawrth) ar risg y busnes ar cwsmer ei hun. Ni ellir cymryd unrhyw archebion ar gyfer y cyfnod hyd at 12 Mawrth.
O ran ymholiadau archebu gan Loegr, mae diweddariad Ymateb COVID-19 Lloegr (a gyhoeddwyd gan Lywodraeth y DU ar 22 Chwefror) yn nodi;
- O 29 Mawrth, ni fydd yn ofynnol yn ôl y gyfraith mwyach i bobl Aros gartref. Fodd bynnag, bydd llawer o'r cyfyngiadau symud yn parhau. Oni bai bod eithriad eisoes yn berthnasol, ni fydd yn bosibl cwrdd â phobl o gartrefi eraill dan do a bydd llawer o adeiladau busnes yn aros ar gau. Bydd canllawiau'n nodi y dylai pobl barhau i weithio gartref lle gallant. Dylai pobl barhau i leihau teithio lle bynnag y bo modd, ac ni ddylent fod yn aros oddi cartref dros nos ar hyn o bryd.
- O 12 Ebrill (cynharaf), caniateir aros dros nos oddi cartref yn y wlad hon [Lloegr] a chaniateir llety hunangynhwysol i ailagor - y rhai nad oes angen cyfleusterau ar y cyd i ymdrochi, mynediad/gadael, arlwyo neu gysgu - dim ond aelodau o'r un aelwyd fydd yn cael eu defnyddio.
Cyhoeddwyd diweddariad fframwaith strategol COVID-19 yr Alban ddoe (23 Chwefror) gyda rhagor o fanylion i'w nodi ganol mis Mawrth gan gynnwys y dangosyddion a fydd yn llywio penderfyniadau ar lefelau, a'r drefn ddisgwyliedig o ailagor yr economi a busnesau cyfyngedig. O dan Lefel 4 bresennol, ni chaniateir unrhyw deithio nad yw'n hanfodol i wledydd y tu allan i'r Alban.
Disgwylir i ddiweddariad Gogledd Iwerddon gael ei gyhoeddi ddydd Llun 1 Mawrth
Ochr yn ochr â'r sefyllfa yng Nghymru, mae'n bwysig ystyried y cyfyngiadau sy'n berthnasol yn eu gwledydd priodol, wrth drefnu ymholiadau gan ddarpar westeion.
Cynllun rheoli’r coronafeirws: lefelau rhybudd yng Nghymru (llacio’r cyfyngiadau’n raddol)
Mae cynllun goleuadau traffig Llywodraeth Cymru i reoli’r coronafeirws wedi cael ei ddiwygio i ystyried amrywiolynnau newydd y feirws ac effaith y rhaglen frechu.
Yn y ddogfen wedi'i diweddaru, esbonnir yr hyn sydd wedi newid ers mis Rhagfyr a'r hyn y mae hynny'n ei olygu i wneud penderfyniadau. Mae'r Cynllun Rheoli yn disgrifio'r mesurau i reoli coronafeirws ar 4 Lefel Rhybudd. Mae Cymru ar Lefel Rhybudd pedwar ar hyn o bryd.
Mynnwch yr wybodaeth ddiweddaraf drwy newyddion y diwydiant
Rydyn ni wedi ymrwymo i ddarparu’r cymorth a’r sicrwydd sydd eu hangen ar fusnesau yn ystod y cyfnod anodd, ddigynsail hwn, ac rydyn ni wedi cyhoeddi nifer o fwletinau sy’n gysylltiedig â’r coronafeirws (COVID-19). Mae’r bwletinau ar gael ar dudalen Bwletinau Coronafeirws i’r Diwydiant Twristiaeth (COVID-19).
Mae Busnes Cymru yn rhoi cymorth a chyngor wedi'i deilwra i fusnesau ynglŷn â delio â coronafeirws, o gynllunio ariannol a chynllunio cadwyni cyflenwi i gael cyngor ar faterion staffio. Cynghorir busnesau twristiaeth a rhanddeiliaid yng Nghymru sy'n dymuno cael canllawiau penodol i ymweld â gwefan Busnes Cymru neu ffonio llinell gymorth busnes Cymru ar 03000 6 03000, ac ymweld yn rheolaidd gwefan Iechyd Cyhoeddus Cymru i gael y wybodaeth ddiweddaraf am iechyd y cyhoedd i chi, eich staff a'ch ymwelwyr.
|