Caiff y cyfreithiau coronafeirws eu tynhau ar draws ardal Cyngor Rhondda Cynon Taf yn dilyn cynnydd mawr yn yr achosion o’r feirws, cadarnhaodd y Gweinidog Iechyd Vaughan Gething.
Daw nifer o reolau newydd i rym am 6pm ddydd Iau 17 Medi 2020, mewn ymgais i ddiogelu iechyd pobl a rheoli lledaeniad y feirws yn yr ardal.
- ni fydd pobl yn cael dod i mewn i ardal Cyngor Rhondda Cynon Taf, na gadael yr ardal, heb esgus rhesymol
- bydd rhaid i bawb dros 11 oed wisgo gorchudd wyneb mewn mannau o dan do – fel yng ngweddill Cymru
- dim ond yn yr awyr agored y bydd pobl yn cael cwrdd am y tro. Ni chaiff pobl gwrdd ag aelodau o’u haelwyd estynedig o dan do, na ffurfio aelwyd estynedig chwaith
- bydd rhaid i bob eiddo trwyddedig gau am 11pm.
Bydd y cyfyngiadau newydd hyn yn berthnasol i bawb sy’n byw o fewn ardal Rhondda Cynon Taf.
Fe’u cyflwynir yn dilyn cynnydd cyflym yn nifer yr achosion coronafeirws a gadarnhawyd, am fod pobl yn y sir wedi bod yn cwrdd o dan do, yn anwybyddu’r canllawiau cadw pellter cymdeithasol ac yn dychwelyd o wyliau tramor.
Caiff y cyfyngiadau eu hadolygu’n rheolaidd ond os na fydd nifer yr achosion yn lleihau, bydd Llywodraeth Cymru’n gweithio gyda Chyngor Rhondda Cynon Taf ac Iechyd Cyhoeddus Cymru i ystyried mesurau pellach.
Mae’r ffigurau diweddaraf yn dangos bod y gyfradd achosion newydd dros saith diwrnod yn awr yn 82.1 ym mhob 100,000 o bobl yn Rhondda Cynon Taf. Ddoe, roedd y gyfradd a gafodd brawf positif yn 4.3% – sef y gyfradd uchaf o achosion positif yng Nghymru.
Mae timau olrhain cysylltiadau wedi gallu olrhain tua hanner yr achosion yn ôl i gyfres o glystyrau yn y fwrdeistref. Mae’r gweddill yn gysylltiedig â throsglwyddiad cymunedol.
Mae sawl clwstwr o achosion yn Rhondda Cynon Taf, a dau o’r rhain yn rhai arwyddocaol. Mae un yn gysylltiedig â chlwb rygbi a thafarn yng Nghwm Rhondda isaf a’r llall yn gysylltiedig â thaith clwb i rasys Doncaster, wnaeth alw mewn cyfres o dafarndai ar y ffordd.
Adolygir y mesurau newydd yn rheolaidd. Yr awdurdod lleol a’r heddlu fydd yn gorfodi’r cyfyngiadau newydd.
Darllenwch y cyhoeddiad yn llawn ar llyw.cymru.
Mae canllawiau ar gael gan Lywodraeth Cymru ar gymryd pob mesur rhesymol i leihau'r risg o ddod i gysylltiad a coronafeirws, mae hyn yn cynnwys manylion sy'n ymwneud ag ymwelwyr â llety a busnesau eraill.
Os yw mangreoedd mewn sefyllfa i wneud hynny, mae’n bosibl y byddant am ystyried yr hyn y byddant yn ei wneud o ran derbyn gwesteion o ardaloedd/ranbarthau lle mae nifer uwch o achosion. Bydd gan sawl math o fangre, megis gwestai a darparwyr mathau eraill o lety, ddisgresiwn i wrthod pobl, ac mae’n debyg y bydd ganddynt wybodaeth ymlaen llaw am gyfeiriadau cartref y darpar ymwelwyr.
Ar yr unigolion dan sylw y bydd unrhyw rwymedigaethau cyfreithiol sy’n gysylltiedig ag unigolion sy’n preswylio mewn ardaloedd lle ceir nifer uwch o achosion. Er enghraifft, os gosodir cyfyngiadau drwy’r gyfraith i atal preswylwyr mewn ardal benodol rhag aros yn rhywle dros nos, cyfrifoldeb y preswylwyr hynny fydd cydymffurfio â’r gyfraith. Ni fydd unrhyw rwymedigaeth gyfreithiol ar ddarparwyr llety y tu allan i ardal lle mae cyfyngiadau ar deithio, i wirio a yw gwesteion yn preswylio yn yr ardal honno. Wedi dweud hynny, ni ddylent, o fwriad, ddarparu llety i bobl sy’n gweithredu’n groes i’r gyfraith.
Rydym yn annog pawb sy’n darparu llety i ystyried yr hyn y byddant yn ei wneud o ran gwesteion a allai fod yn dod o ardaloedd lle mae cyfyngiadau ar symud neu o ardaloedd lle mae nifer uchel o achosion. Mae’n bosibl y bydd darparwyr llety am gysylltu â’r holl gwsmeriaid sydd wedi archebu eisoes, i’w hatgoffa am y gyfraith ac i roi cyfle iddynt ganslo neu ohirio eu harcheb.
Argymhellir bod pawb sy’n rheoli mangreoedd yn ystyried yr hyn y byddant yn ei wneud. Argymhellir hefyd eu bod, wrth wneud hynny, yn rhoi’r hawl i unigolion drafod eu hamgylchiadau penodol nhw cyn i’r rheolwyr benderfynu’n derfynol i wrthod mynediad iddynt.
Mynnwch yr wybodaeth ddiweddaraf drwy newyddion y diwydiant
Rydyn ni wedi ymrwymo i ddarparu’r cymorth a’r sicrwydd sydd eu hangen ar fusnesau yn ystod y cyfnod anodd, ddigynsail hwn, ac rydyn ni wedi cyhoeddi nifer o fwletinau sy’n gysylltiedig â’r coronafeirws (COVID-19). Mae’r bwletinau ar gael ar dudalen Bwletinau Coronafeirws i’r Diwydiant Twristiaeth (COVID-19).
Mae Busnes Cymru yn rhoi cymorth a chyngor wedi'i deilwra i fusnesau ynglŷn â delio â coronafeirws, o gynllunio ariannol a chynllunio cadwyni cyflenwi i gael cyngor ar faterion staffio. Cynghorir busnesau twristiaeth a rhanddeiliaid yng Nghymru sy'n dymuno cael canllawiau penodol i ymweld â gwefan Busnes Cymru neu ffonio llinell gymorth busnes Cymru ar 03000 6 03000, ac ymweld yn rheolaidd gwefan Iechyd Cyhoeddus Cymru i gael y wybodaeth ddiweddaraf am iechyd y cyhoedd i chi, eich staff a'ch ymwelwyr.
|