Rhowch groeso i gerddwyr, cynyddwch nifer yr ymwelwyr: Syniadau mis Gorffennaff ar gyfer eich busnes

Helo a chroeso i rifyn cyntaf ein e-fwletin ar gyfer busnesau. 👋🏽

Yn llawn syniadau ymarferol a hawdd eu rhoi ar waith, mae wedi’i gynllunio i’ch helpu i wneud y gorau o’r cyfleoedd a gynigir gan Lwybr Arfordir Cymru a’n Llwybrau Cenedlaethol.

Yn y rhifyn hwn, byddwch yn darganfod pam mae croeso clir yn bwysig, sut y gallai cynnig ail-lenwi dŵr am ddim ddenu mwy o gwsmeriaid drwy eich drysau, a ble i lawrlwytho ein deunyddiau marchnata newydd i bartneriaid am ddim.

Deunyddiau marchnata newydd i bartneriaid!

Efallai eich bod chi’n meddwl bod eich lleoliad ar Lwybr Arfordir Cymru, Llwybr Clawdd Offa neu Llywbr Glyndŵr neu gerllaw, yn amlwg. Ond gyda dros 1,000 milltir o lefydd i’w archwilio, mae’n rhywbeth sy’n werth ei amlygu er mwyn sicrhau nad yw’ch busnes yn cael ei anwybyddu. Gall tynnu sylw at eich lleoliad a’ch agosrwydd at y llwybrau, eich helpu i gyrraedd rhestr ystyried ymwelwyr. Ac mae gennym ni’r union beth i helpu…

Gallwch lawrlwytho am ddim (yn agor yn Sharefile) am ein graffigyn hyrwyddo newydd sbon “Rydym ar Lwybr Arfordir Cymru!”,  “Rydym ar Lwybr Clawdd Offa”, “Rydym ar Llwybr Glyndŵr’ a’i ddefnyddio ar draws eich cyfryngau cymdeithasol, gwefan, deunydd darllen printiedig neu arwyddion. Beth am ei lawrlwytho a gweld sut allwch chi ei ddefnyddio heddiw?

Dangoswch y ffordd i gerddwyr – a dywedwch wrthyn nhw fod croeso iddyn nhw!

Nid yw pob sefydliad yn gwneud i gerddwyr deimlo’n gartrefol, felly gall dangos eu bod yn cael eu croesawu yn eich busnes gael effaith go iawn. Peidiwch byth â thybio bod cerddwyr yn gwybod y gall eu hesgidiau mwdlyd groesi eich trothwy – gwnewch yn siŵr eich bod chi’n dweud wrthyn nhw!

Ymunwch â Refill i gael mwy o gwsmeriaid yn llifo drwy eich drysau

Ymgyrch fyd-eang yw Refill sy’n annog busnesau i chwarae rôl weithredol yn y mudiad ail-lenwi, ailddefnyddio ac ailgylchu. Os ydych chi’n fodlon ac yn gallu cynnig ail-lenwi cynwysyddion dŵr yfed am ddim i bobl sy’n mynd heibio, beth am ymuno â’r cynllun a dod yn orsaf Refill ddilys? Mae cymryd rhan yn rhad ac am ddim ac mae croeso i bob busnes.  P’un a ydych chi’n siop, caffi, cyrchfan dwristaidd neu leoliad hamdden, mae ymuno â’r cynllun yn golygu cael eich cynnwys am ddim ar ap Refill byd-eang a chael sticer ffenestr i ddangos eich bod chi’n rhan o’r rhwydwaith cynaliadwy hwn. Edrychwch ar y canllaw ar gyfer gorsafoedd Refill a gyda chlic neu ddau gallwch gofrestru eich busnes ar gyfer map rhithwir Refill. Mae’n ffordd wych arall o wneud y gorau o fasnach sy’n mynd heibio, a gwella profiad ymwelwyr.

Dolen gyflym ar gyfer mis Gorffennaf

Bydd cannoedd o redwyr yn heidio i’n llwybrau arfordirol y mis hwn, gan gyflwyno cyfle gwych i fusnesau lleol ar hyd y llwybr. Edrychwch ar y dyddiadau a manylion llwybr ar gyfer tri digwyddiad gwych isod ynghyd â syniadau ar sut y gallai eich busnes fanteisio i’r eithaf arnynt:

Gŵyl Love Trails (2–6 Gorffennaf 2026): Wedi’i gynnal ar Benrhyn Gŵyr, mae’r digwyddiad hwn yn cyfuno rhedeg ar lwybrau, cerddoriaeth fyw, DJs ac anturiaethau awyr agored. Gallwch ddilyn y trefnwyr ar Instagram a rhoi sylwadau / rhannu unrhyw negeseuon Love Trails.

Ultra Trail Coastal Rush Cymru (4–5 Gorffennaf 2026): Uwchfarathon 50km ar draws arfordir deheuol godidog Penrhyn Llŷn. Beth bynnag a wnewch, gwnewch yn siŵr bod eich lleoliad a’ch croeso yn glir: “Pob lwc i bawb sy’n cymryd rhan yn y Wales Ultra Coastal Rush! Rydyn ni ar y llwybr ei hun, felly beth am alw heibio i’n gweld ni ar gyfer eich dathliadau ar ôl y ras? Byddem wrth ein bodd yn eich croesawu!”

Uwchfarathonau Arfordirol y Ddraig (18–19 Gorffennaf 2026): Digwyddiadau rhedeg llwybrau epig yn amrywio o 30 i 100 milltir, gan fynd â rhedwyr o fannau fel Bae Rhosili neu Fae Dwnrhefn ar hyd llwybr yr arfordir, gan orffen ym Mae Caerdydd. Dilynwch nhw ar Instagram a gadewch iddyn nhw wybod pa mor agos ydych chi at y llwybr, gan ddwyn sylw at  eich busnes fel lle croesawgar i raswyr blinedig a newynog?

Teithiau Cerdded Prostate Cymru 2026 Ar 27 Mehefin, bydd tîm o godwyr arian yn dechrau her 44 diwrnod o arfordir i arfordir ar hyd Llwybr Clawdd Offa i godi arian ar gyfer Prostate Cymru. Beth am gysylltu â threfnydd y digwyddiad i roi gwybod iddyn nhw ble rydych chi ar eu taith? P’un a ydych chi’n lle i aros, yn siop ar gyfer cyflenwadau hanfodol neu’n gaffi ar gyfer lluniaeth haeddiannol, dangoswch eich cefnogaeth iddyn nhw gyda neges gynnes – a beth am ostyngiad arbennig i’r tîm codi arian os byddan nhw’n ymweld â chi?

Rhannwch eich straeon i gefnogi twf

Efallai eich bod yn fusnes annibynnol, ond nid ydych ar eich pen eich hun o bell ffordd ar eich cenhadaeth i ehangu eich sylfaen cwsmeriaid. Mae rhwydweithiau busnes lleol yn amhrisiadwy, ond ceir cyfleoedd hefyd ar draws ein rhwydwaith llwybrau i unig fasnachwyr gysylltu, dysgu oddi wrth ei gilydd a rhannu llwyddiant. Gall gweld beth sydd wedi gweithio i fusnesau mewn trefi a phentrefi eraill eich ysbrydoli i edrych yn wahanol ar eich marchnata eich hun a rhoi cynnig ar bethau newydd hefyd. Byddem wrth ein bodd yn rhannu eich straeon mewn e-fwletinau yn y dyfodol, felly os ydych chi wedi gwneud rhywbeth yn wahanol neu wedi canfod bod ased penodol yn arbennig o effeithiol, cysylltwch â ni yn wcp@cyfoethnaturiolcymru.gov.uk

Rhannwch eich barn gyda ni

Mae ein e-fwletinau ar gyfer busnesau wedi’u dylunio gyda’ch anghenion chi mewn golwg, ac rydym am sicrhau eu bod mor ddiddorol, ymarferol a defnyddiol â phosibl. Os oes gennych unrhyw syniadau neu awgrymiadau am gynnwys yr hoffech ei weld mewn rhifynnau yn y dyfodol, cysylltwch â’n tîm: wcp@cyfoethnaturiolcymru.gov.uk