Ein gwaith rheoleiddio a gweithgareddau’r safle

Rydym yn ymwybodol bod gan bobl yn y gymuned leol bryderon am safle Kronospan yn y Waun o hyd. Rydym yn parhau i reoleiddio’r safle yn unol â’i drwydded amgylcheddol drwy gyfrwng arolygiadau safle, ymchwiliadau, adolygu data monitro aer a dŵr, ac ymgysylltu parhaus â’r gweithredwr a sefydliadau partner.

Hyd yn hyn yn 2026, mae ein swyddogion wedi cynnal 20 o archwiliadau safle. Caiff yr archwiliadau hyn eu defnyddio i asesu a yw’n cydymffurfio ag amodau’r drwydded, i adolygu gweithrediadau’r safle ac i ymchwilio i bryderon penodol. Yn ogystal â’r archwiliadau hyn, mae swyddogion yn cynnal ymweliadau eraill yn y Waun a chyfarfodydd â Kronospan i gefnogi ein gwaith rheoleiddio. Mae adroddiadau yn ymwneud ag ymweliadau â’r safle i’w gweld ar y gofrestr gyhoeddus.

Rydym wedi mynychu dau gyfarfod cyswllt eleni gyda chynrychiolwyr o Kronospan, Cyngor Tref y Waun, a Chyngor Bwrdeistref Sirol Wrecsam. Mae’r cyfarfodydd hyn yn gyfle i drafod datblygiadau ar y safle, gwaith arfaethedig, pryderon a chwynion gan y gymuned, yn ogystal â pherfformiad amgylcheddol a chydymffurfiaeth.

Ers mis Ionawr 2026, rydym wedi ymateb i dros 40 o ymholiadau gwahanol, gan gynnwys gohebiaeth gan aelodau’r cyhoedd, cynghorwyr, Aelodau’r Senedd, yn ogystal â cheisiadau Rhyddid Gwybodaeth.

Rydym yn parhau â’n hymchwiliadau i’r allyriadau o’r boeleri K7 a oedd yn groes i’r drwydded, ynghyd â’r ffrwydrad ddiwedd Ebrill 2026. Mae’r rhain yn ymchwiliadau cymhleth sy’n gofyn asesiad technegol manwl a, lle bo angen, asesiad cyfreithiol hefyd. Mae’r gwaith hwn yn mynd rhagddo ac yn dal i fod yn flaenoriaeth.

Adroddiadau gan y cyhoedd a sut cânt eu defnyddio

Mae adroddiadau gan y cyhoedd yn rhan bwysig o sut rydym yn rheoleiddio’r safle. Rhwng 1 Ionawr a 15 Mai 2026, cawsom 189 o adroddiadau yn cyfeirio at Kronospan.

Pan ddaw adroddiad i mewn, caiff ei gofnodi a’i asesu gan ein timau. Caiff ei ystyried ochr yn ochr ag adroddiadau eraill, data monitro a gwybodaeth sydd gennym am y safle.

Rydyn ni’n atal ac yn lleihau llygredd drwy flaenoriaethu’r digwyddiadau mwyaf difrifol, ar sail y risg i’r amgylchedd, i bobl ac i fywyd gwyllt. Nid oes angen ymweld â’r safle ar gyfer pob adroddiad. Rydyn ni’n defnyddio tystiolaeth, barn arbenigol a data i benderfynu ar y ffordd orau o ymateb.

Dydyn ni ddim yn darparu adborth unigol ar bob adroddiad am ddigwyddiad ond mae pob adroddiad a gawn yn cael ei asesu’n arbenigol. Mae hyn yn sicrhau ein bod yn canolbwyntio ein hadnoddau ar gyflawni gwasanaeth effeithlon i warchod amgylchedd a phobl Cymru.

Sut i roi gwybod a ble i ddod o hyd i ragor o wybodaeth

Os ydych chi’n profi problemau amgylcheddol fel llwch, arogl neu sŵn, gallwch roi gwybod am y rhain gan ddefnyddio ein llwybrau adrodd swyddogol. Gallwch wneud hyn ar-lein neu drwy ffonio ein llinell gymorth digwyddiadau ar 0300 065 3000. Os gallwch roi gwybodaeth glir, fel amser, lleoliad a natur y broblem, mae hynny’n ein helpu i asesu ac ymateb yn effeithiol. Peidiwch â chysylltu â swyddogion unigol yn uniongyrchol.

Mae rhagor o wybodaeth am sut mae adroddiadau’n cael eu hasesu a sut rydym yn rheoleiddio safle Kronospan ar gael ar ein tudalen ‘Sut rydym yn rheoleiddio safle Kronospan’, sy’n egluro’r broses yn fanylach.