Mae Cyfoeth Naturiol Cymru (CNC) yn parhau i fod yn ymrwymedig i sicrhau bod gweithredwr Safle Tirlenwi Withyhedge, sef RML, yn cymryd pob cam angenrheidiol yn y dyfodol i leihau'r risg o allyriadau o'r safle a allai arwain at arogl oddi ar y safle.

Mae CNC wedi derbyn dogfennaeth ddrafft gan RML yn amlinellu gwelliannau arfaethedig i'w gweithdrefnau derbyn gwastraff. Mae'r wybodaeth hon yn cael ei hadolygu gan ein timau rheoleiddio diwydiant, er mwyn sicrhau bod gweithgareddau gwaredu gwastraff yn ailgychwyn mewn ffordd sy’n lleihau'r risg o ragor o broblemau oherwydd aroglau.

Wythnos nesa, cyfarfu CNC ag RML i drafod y gweithdrefnau diwygiedig arfaethedig mewn egwyddor. Bydd sylwadau ar fanylion y ddogfen ddrafft yn cael eu rhannu gydag RML maes o law.

Mae CNC yn cydnabod y gallai ailddechrau derbyn gwastraff achosi pryder i gymunedau yr effeithiwyd arnynt yn flaenorol. Pan fydd gweithrediadau derbyn gwastraff yn ailddechrau, bydd gan CNC bresenoldeb sylweddol ar y safle, a bydd yn monitro arogleuon oddi ar y safle yn rheolaidd i sicrhau cydymffurfiaeth â'r gweithdrefnau diwygiedig a'r drwydded tirlenwi. 

Bydd hyn yn cael ei gefnogi gan bob partner o'r Tîm Rheoli Digwyddiadau (IMT) - Iechyd Cyhoeddus Cymru, Cyngor Sir Penfro a Bwrdd Iechyd Prifysgol Hywel Dda - gyda monitro ansawdd aer ac asesiadau risg iechyd cyhoeddus.

Bydd yr IMT yn ymdrechu i ddarparu gwybodaeth i gymunedau yr effeithir arnynt yn y cyfnod cyn ailagor safleoedd tirlenwi ar gyfer derbyn gwastraff, neu yng nghamau cynnar iawn y newid hwn i weithrediadau'r safle.

Mae dyddiad amodol ar gyfer y sesiwn galw heibio hon wedi'i bennu - dydd Iau 5 Rhagfyr.

Bydd y digwyddiad ar ffurf sesiwn galw heibio rhwng 3pm a 7pm a bydd y ffocws ar weithrediadau'r safle tirlenwi yn y dyfodol, yn enwedig ailgychwyn derbyn gwastraff i'w waredu gan RML (nid oes cadarnhad eto ynghylch pryd y bydd hyn yn digwydd) a mesurau y mae'r cwmni'n eu rhoi ar waith i atal y problemau o ran arogleuon a achoswyd gan y safle ddiwedd y llynedd ac yn gynharach y flwyddyn hon.

Cyn y digwyddiad bydd gwybodaeth yn cael ei rhannu a bydd y sesiwn galw heibio yn gyfle i gynrychiolwyr Cyfoeth Naturiol Cymru, Iechyd Cyhoeddus Cymru, yr Awdurdod Lleol a Bwrdd Iechyd Prifysgol Hywel Dda ateb unrhyw gwestiynau sydd gennych.

Mae Iechyd Cyhoeddus Cymru yn parhau i werthuso data ansawdd aer, er mwyn gwella ein dealltwriaeth o'r potensial ar gyfer niwed i iechyd pobl sy'n byw o amgylch safle tirlenwi Withyhedge.

I weld yr asesiad risg iechyd diweddaraf ewch i wefan Iechyd Cyhoeddus Cymru.