Ddiwedd mis Mai cynhaliodd swyddogion rheoleiddio CNC archwiliad o’r system rheoli nwy tirlenwi yn y safle, sy’n casglu ac yn trin nwy tirlenwi. Mae'r canfyddiadau interim yn dangos bod y system yn cael anawsterau yn dilyn cynnydd yng nghyfaint y nwy tirlenwi sy’n cael ei gasglu.

Mae'r gwelliannau i gapio a gosod seilwaith echdynnu nwy wedi arwain at gynnydd sylweddol yng nghyfaint y nwy sy'n cael ei gasglu. Ar adegau mae hyn wedi arwain at broblemau dibynadwyedd gyda seilwaith trin nwy allweddol.

Bu CNC yn cyfarfod gyda Chyfarwyddwyr a chynrychiolwyr o RML (gweithredwr y safle tirlenwi) yr wythnos ddiwethaf i drafod y canlyniadau interim ynghyd ag opsiynau i gynyddu capasiti a gwytnwch y system rheoli nwy. Mae cyfarfod arall wedi'i drefnu ar gyfer yr wythnos nesaf i drafod ymhellach.

Yr wythnos hon mae CNC wedi dechrau monitro ansawdd aer sefydlog mewn lleoliadau penodol mewn cymunedau o amgylch Safle Tirlenwi Withyhedge. Mae monitorau hydrogen sylffid Jerome yn cael eu defnyddio i gasglu data a fydd yn caniatáu cyfrifo ffigurau cyfartalog 24 awr, yn ogystal â chyfartaleddau 30 munud. Bydd eu lleoliadau yn ddibynnol ar gyfeiriad y prif wynt yn ystod y cyfnod arolygu.

Mae swyddogion Cyngor Sir Penfro (CSP) yn gweithio i sicrhau bod offer Monitro Aer ychwanegol yn ei le mewn lleoliad yn Spittal yn ystod yr wythnos sy’n dechrau ar 1 Gorffennaf 2024. Maent yn cysylltu â'r contractwr monitro i sicrhau bod y safle arfaethedig yn addas ar gyfer yr offer newydd.

Bydd yr offer monitro ychwanegol hwn yn galluogi CSP i ddarparu darlleniadau rheolaidd a fydd yn cael eu rhannu ar wefan CSP ac mewn cyfathrebiadau yn y dyfodol.

Mae Iechyd Cyhoeddus Cymru (ICC) yn croesawu’r bwriad i osod monitorau ansawdd aer sefydlog gan CNC a CSP. Bydd y rhain yn helpu ICC i gael darlun manylach o ansawdd yr aer yn yr ardal o amgylch Withyhedge. 

“Yn y cyfamser, mae ICC yn dal i gynghori y dylai preswylwyr gadw drysau a ffenestri ar gau pan fo’r arogleuon yn bresennol, a cheisio cyngor meddygol os ydynt yn teimlo’n sâl.”

Rydym yn dal i dderbyn adroddiadau arogleuon bron bob dydd ac yn parhau i gynnal asesiadau arogleuon fel rhan o'n hasesiad cydymffurfio rheoleiddio tra bod y broses o dderbyn gwastraff yn cael ei gohirio, a phe bai'r safle tirlenwi yn ailddechrau gwaredu gwastraff.

Caiff yr asesiadau hyn eu llywio gan adroddiadau a gawn gan y cyhoedd ac felly rydym yn annog pobl i barhau i adrodd am arogleuon cyn gynted ag y byddant yn eu profi.  

Rhowch wybod am arogl trwy ein ffurflen bwrpasol neu drwy ffonio 0300 065 3000.