Mewn ymateb i fwy o gwynion am arogleuon yr wythnos hon, mae ein swyddogion wedi ymweld â Safle Tirlenwi Withyhedge i gasglu rhagor o wybodaeth mewn perthynas â'r system rheoli nwy - system sy'n casglu ac yn trin nwy tirlenwi. Gall unrhyw ollyngiadau nwy tirlenwi achosi arogleuon oddi ar y safle. Mae ein hadroddiad yn dilyn yr archwiliad o'r system rheoli nwy a gynhaliwyd ym mis Mai bron wedi'i gwblhau. Bydd canfyddiadau o arolygiadau pellach yr wythnos hon yn cael eu coladu ochr yn ochr â chanfyddiadau'r archwiliad a byddant yn llywio ein trafodaethau parhaus gyda'r gweithredwr tirlenwi ynghylch rheoli nwy nawr ac yn y dyfodol. Byddwn yn cynnal cyfarfod arall gyda Chyfarwyddwyr RML yr wythnos nesaf.

Rydym wedi gweld cynnydd yn yr adroddiadau am arogleuon cryf yr wythnos hon, yn enwedig gyda'r nos.

Ddydd Mercher 12 Mehefin, cynhaliodd ein swyddogion asesiadau arogleuon rhwng hanner nos a 5am, a gwnaethant hwythau hefyd ganfod arogleuon cryf o nwyon tirlenwi. Buodd y swyddogion hefyd yn casglu data ansawdd aer gan ddefnyddio'r offer monitro Jerome symudol. Mae’r data wedi’i roi i Iechyd Cyhoeddus Cymru i’w gynnwys mewn unrhyw asesiadau risg iechyd y cyhoedd yn y dyfodol.

Bydd allyriadau nwyon tirlenwi yn cynyddu yn ystod tywydd oerach ac amodau llonydd o ran gwynt, fel yr amodau a gafwyd nos Fawrth ac yn gynnar fore Mercher. Gyda llai o wasgaru, mae'r potensial ar gyfer arogl yn achosi niwsans yn fwy. Gallai'r ffactorau hyn fod wedi cyfrannu at yr arogleuon cryfach a brofwyd bryd hynny.

Mae amseroedd a lleoliadau asesiadau arogleuon yn cael eu llywio gan adroddiadau a gawn gan y cyhoedd. Rydym yn annog pobl i barhau i adrodd am arogleuon cyn gynted ag y byddant yn eu profi.

“Mae Iechyd Cyhoeddus Cymru ar fin cwblhau ein hasesiad risg iechyd presennol, yn seiliedig ar ddata monitro ansawdd aer a ddarparwyd gan Geotechnology Ltd, o dan gontract gan RML. Gobeithiwn fod mewn sefyllfa i rannu ein canfyddiadau gyda'r gymuned yn ystod yr wythnos nesaf.

“Yn y cyfamser, ein cyngor iechyd cyhoeddus o hyd yw y dylai preswylwyr gadw drysau a ffenestri ar gau pan fo’r arogleuon yn bresennol, a cheisio cyngor meddygol os ydynt yn teimlo’n sâl.”

Os ydych chi'n arogli arogl cryf y credwch ei fod yn dod o Safle Tirlenwi Withyhedge, rhowch wybod i ni ar yr adeg y byddwch chi'n ei brofi.

Mae adrodd ar arogleuon yn parhau i’n helpu i greu darlun o pryd a ble y mae arogleuon yn gyffredin yn y gymuned. Mae’r adroddiadau hefyd yn ein helpu i asesu effeithiau’r camau adferol a gymerwyd gan y gweithredwr hyd yn hyn, ac i lywio ein hymateb i hynny.

Rhowch wybod am arogl drwy ein ffurflen bwrpasol neu drwy ffonio 0300 065 3000.