Safle Tirlenwi Withyhedge: diweddariad wythnosol 07.06.24.

Natural Resources Wales sent this bulletin at 07-06-2024 02:15 PM BST

Cyflwyniad

Dyma’r chweched rhifyn o’n diweddariad wythnosol, sy'n rhoi'r wybodaeth ddiweddaraf am y camau sy'n cael eu cymryd i fynd i'r afael â phroblemau arogleuon ar safle tirlenwi Withyhedge yn Sir Benfro.

Rydych chi'n derbyn hwn gan eich bod wedi dweud yn flaenorol eich bod am dderbyn diweddariadau ar y mater hwn, neu eich bod wedi tanysgrifio.

Diweddariad safle

Mae swyddogion CNC wedi ymweld â’r safle tirlenwi yr wythnos hon fel rhan o’n gwaith rheoleiddio parhaus. Mae ein presenoldeb ar y safle yn ein helpu i benderfynnu a oes angen cymryd camau gorfodi pellach, gan ystyried yr holl opsiynau sydd ar gael i ni o dan y rheoliadau.

Yn dilyn yr archwiliad nwy llawn a gynhaliwyd gennym bythefnos yn ôl, rydym wedi hysbysu gweithredwr y safle, RML, am gamau pellach sydd eu hangen i wella’r system rheoli nwy. Mae adolygiad manwl o'r system yn mynd rhagddo yn dilyn yr archwiliad.

Yr wythnos ddiwethaf cyhoeddodd RML ddiweddariad manwl ar y gwaith a wnaed ar y safle hyd yma.

Isod mae rhai ffotograffau diweddar o sut olwg sydd ar y safle tirlenwi ar hyn o bryd - fe’u tynnwyd gan swyddogion CNC yn ystod ymweliadau safle

Cyn ac ar ôl y gwaith capio yng nghell 8 dros y misoedd diwethaf.

Progression of capping works throughout cells 6 and 7

Cyn ac ar ôl y gwaith capio yng nghell 8 dros y misoedd diwethaf.

Delwedd CNC o lori â llawr symudol yn cludo clai i'r safle ar 31 Mai.

Monitro ansawdd aer

Mae’r Tîm Rheoli Digwyddiad amlasiantaethol – sy’n cynnwys cynrychiolwyr o Cyfoeth Naturiol Cymru (CNC), Cyngor Sir Penfro (CSP), Iechyd Cyhoeddus Cymru (ICC) a Bwrdd Iechyd Prifysgol Hywel Dda – wedi bod yn adolygu’r Strategaeth Monitro Ansawdd Aer yr wythnos hon ar gyfer Safle Tirlenwi Withyhedge a ddatblygwyd gan y Grŵp Ansawdd Aer (GAA).

Mae’r Grŵp Ansawdd Aer (GAA) yn cael ei gadeirio gan CSP ac mae ganddo gynrychiolwyr o CNC ac ICC. Prif ddiben y GAA yw casglu data monitro ansawdd aer a chynhyrchu asesiad iechyd cyhoeddus i'w ystyried.

Mae'r ddogfen yn nodi ble, pryd a sut y dylid monitro ansawdd aer er mwyn sicrhau bod y data monitro a gesglir yn galluogi ICC i gynhyrchu asesiad iechyd cyhoeddus.

Mae'r strategaeth fonitro yn adlewyrchu’r lleoliadau y mae cwynion wedi'u derbyn amdanynt, a lle mae aelodau'r cyhoedd yn debygol o fod. Mae'n defnyddio cyfuniad o offer monitro statig a symudol, gan gynnwys monitor statig, defnydd parhaus o diwbiau tryledu a monitro dadansoddwr Jerome.

Mae ICC wedi datgan eu bod yn falch o nodi bod y gwaith capio ar y safle wedi’i gwblhau. Nid yw cyngor Iechyd Cyhoeddus Cymru i’r bobl yn yr ardal sy’n dioddef yr arogleuon wedi newid.

Gall cau ffenestri a drysau pan fydd arogleuon yn bresennol, neu pan fydd y gwynt yn chwythu o'r safle tirlenwi tuag at eich cartref, helpu i atal arogleuon rhag dod i mewn.
Cofiwch beidio â rhwystro ffenestri neu fentiau yn gyfan gwbl; mae hyn oherwydd eu bod yn darparu aer i awyrellu poptai neu wresogyddion a gallant helpu i reoli lleithder.
Unwaith y bydd yr arogl yn yr awyr agored wedi mynd, bydd agor ffenestri a drysau yn helpu i gael gwared ar unrhyw arogleuon sy'n weddill y tu mewn.

Cais i amrywio trwydded

Rydym ni (CNC) wedi derbyn cais i amrywio trwydded oddi wrth RML mewn perthynas â safle tirlenwi Withyhedge.

Mae'r cais amrywio yn cynnwys diwygiadau arfaethedig i lefelau adfer ac addasiadau i raglenni monitro ar gyfer dŵr daear, dŵr wyneb a thrwytholch. Bydd y cais hwn yn cael ei adolygu gan ein tîm Caniatáu Gosodiadau.

Oherwydd diddordeb mawr y cyhoedd yn y safle hwn, rydym wedi ymrwymo i gynnal ymgynghoriad cyhoeddus fel rhan o'r broses benderfynu.

Asesu arogleuon

Mae swyddogion o CNC a CSP wedi parhau ag asesiadau arogl o amgylch Safle Tirlenwi Withyhedge yr wythnos hon.

Yn ystod yr wythnosau diwethaf, mae'r timau o'r ddau sefydliad wedi cofnodi gostyngiadau o ran yr arogleuon sy’n dod o'r safle tirlenwi - a hynny o ran cryfder yr arogleuon a pha mor amal y’u cofnodir. Maent hefyd wedi cofnodi arogleuon yr aseswyd eu bod yn tarddu o ffynonellau eraill. Bu gostyngiad yn nifer y cwynion am arogleuon a dderbyniwyd o’r cymunedau lleol. Fodd bynnag, mae CNC a CSP yn cydnabod bod yna adegau o hyd lle mae cwynion am arogleuon yn cynyddu, yn enwedig dros benwythnosau, ac maent yn defnyddio gwybodaeth i gynnal asesiadau wedi’u targedu.

Gwybodaeth am safle tirlenwi Withyhedge

Ar ein tudalen ‘adrodd arogl’ gallwch hefyd ddod o hyd i safle wybodaeth lle mae’r holl ddiweddariadau ar gael mewn trefn gronolegol. Mae hyn yn rhoi trosolwg cyflawn i chi o'n hymateb amlasiantaethol i'r broblem arogleuon yn y safle tirlenwi hyd yma.

Adrodd arogl

Os ydych chi'n arogli arogl cryf y credwch ei fod yn dod o Safle Tirlenwi Withyhedge, rhowch wybod i ni pan fyddwch chi'n ei brofi.

Mae adrodd ar arogleuon yn parhau i’n helpu i greu darlun o pryd a ble y mae arogleuon yn gyffredin yn y gymuned. Maent hefyd yn ein helpu i asesu effeithiau’r camau adferol a gymerwyd gan y gweithredwr hyd yn hyn, a llywio ein hymateb i hynny.

Rhowch wybod am arogl trwy ein ffurflen bwrpasol neu drwy ffonio 0300 065 3000.

Cadwch mewn cyswllt gyda ni

Gwasanaethau i danysgrifwyr

Rheoli eich tanysgrifiad | Dad-danysgrifio | Cymorth | Hysbysiad Preifatrwydd