Mae swyddogion CNC wedi ymweld â’r safle tirlenwi yr wythnos hon fel rhan o’n gwaith rheoleiddio parhaus.

Mae ffynhonnau nwy a osodwyd yn ystod y gwaith o gapio rhan olaf Cell 8 wedi'u cysylltu â'r rhwydwaith tynnu nwy.

Ein blaenoriaeth erioed fu sicrhau bod y gweithredwr yn cymryd y camau angenrheidiol i ddelio â’r ffynhonnell fwyaf tebygol o arogleuon.

Yn ogystal â chynnal yr asesiadau i bennu cydymffurfiaeth â’n Hysbysiadau Gorfodi, rydym wedi, ac rydym wrthi o hyd, yn casglu’r wybodaeth a’r dystiolaeth y bydd eu hangen arnom ar gyfer unrhyw achos cyfreithiol yn y dyfodol. 

Rydym yn deall y gall pobl fod yn teimlo’n rhwystredig o ran yr amser y mae’n ei gymryd i gwblhau ein prosesau asesu. Fodd bynnag, nid yw'n anarferol i asesiadau o’r fath gymryd cryn dipyn o amser.

Os bernir bod amodau trwydded wedi'u torri, yna gellir mynd ar drywydd cosbau troseddol. Mae methu â chydymffurfio â Hysbysiad yn drosedd ar wahân. O ystyried y risg o danseilio camau cyfreithiol yn y dyfodol, dim ond hyn a hyn o fanylion y gallwn eu rhannu’n gyhoeddus ar hyn o bryd.

Nid yw'r gwaith asesu parhaus o’r ymateb i Hysbysiadau Gorfodi Rheoliad 36 blaenorol yn ein hatal rhag defnyddio Hysbysiadau pellach neu ddulliau rheoleiddio eraill yn Safle Tirlenwi Withyhedge.

Fel rhan o’r dull o fynd i’r afael ar y cyd â’r problemau arogl parhaus yn Withyhedge, cadarnhaodd Cyngor Sir Penfro yr wythnos hon ei fod yn bwrw ymlaen â’i her gyfreithiol yn erbyn gweithredwr y safle, RML.

Gallwch ddarllen mwy yma: Cyngor yn adnewyddu pwysau cyfreithiol ar RML (pembrokeshire.gov.uk)

“Mae Iechyd Cyhoeddus Cymru wedi adolygu'r data monitro ansawdd aer a ddarparwyd i ni ac nid yw ein hasesiad iechyd cyhoeddus cychwynnol o'r data hynny yn rhoi unrhyw reswm i ni newid ein cyngor. Hynny yw, os bydd trigolion yn profi arogleuon o'r safle tirlenwi, gall cau ffenestri a drysau helpu i leihau arogleuon; pan fydd yr arogl wedi mynd heibio, gall agor ffenestri a drysau eto helpu i leihau unrhyw arogleuon y tu mewn i gartrefi. Cofiwch beidio â rhwystro ffenestri neu fentiau yn llwyr; mae hyn oherwydd eu bod yn darparu aer i awyru offer coginio a gwresogi ac i reoli lleithder.

“Yn unol â'r dull amlasiantaethol y cytunwyd arno, mae ein hasesiad yn cael ei rannu â phartneriaid er mwyn helpu i lywio camau gweithredu a chyngor pellach wrth symud ymlaen. Byddwn yn parhau i adolygu'r data monitro sydd ar gael i ni er mwyn cynorthwyo'r asesiad parhaus o risg iechyd yn lleol. 

“Yn y cyfamser, rydym yn cydnabod faint o effaith y mae'r arogleuon o'r safle tirlenwi yn parhau i'w chael ar gymunedau lleol ac yn ailadrodd ein galwad am gamau gweithredu brys i ddatrys y mater hwn cyn gynted â phosibl.”

Mae adroddiadau ar arogleuon yn parhau i’n helpu i greu darlun o pryd a ble y mae arogleuon yn gyffredin yn y gymuned. Maent hefyd yn ein helpu i asesu effeithiau’r camau adferol a gymerwyd gan y gweithredwr hyd yn hyn, a llywio ein hymateb i hynny.

Rhowch wybod am arogleuon ar yr adeg yr ydych yn eu profi.

Gallwch wneud hynny drwy ein ffurflen bwrpasol neu drwy ffonio 0300 065 3000.