Mae rhoi'r gorau i dderbyn gwastraff wedi galluogi gweithredwr y safle i gapio'r rhan sy'n weddill o'r gell weithredol (Cell 8).

Nid oedd yr Hysbysiad Gorfodi Rheoliad 36 diweddar yn cwmpasu’r ardal hon. Mae CNC yn cydnabod y gwaith ychwanegol hwn, sy'n golygu bod yr holl adneuon gwastraff o fewn y safle tirlenwi bellach wedi'u hamgáu ac o dan echdynnu nwy.

Mae ein swyddogion wedi cynnal archwiliad helaeth o'r system casglu a rheoli nwy ar y safle yr wythnos hon.

Ar hyn o bryd mae'r gweithredwr yn gwneud gwelliannau i'w allu i ddefnyddio nwy. Hwn yw’r prif fesur rheoli ar gyfer rheoli gollyngiadau arolglau ffo o'r safle. Mae hyn yn cynnwys derbyn, gosod a chomisiynu injan nwy fwy.

Nid yw nwy yn cael ei ddefnyddio ar hyn o bryd i gynhyrchu trydan tra bod y gwelliannau hyn ar y gweill. Fodd bynnag, mae nwy yn cael ei drin (yn unol â thrwydded Rheoliadau Trwyddedu Amgylcheddol y safle) trwy ffagl ddaear y safle.

Mae rhai meysydd i'w gwella wedi'u nodi a byddant yn cael eu ffurfioli mewn cynllun gwella, unwaith y bydd ein hasesiad cydymffurfio wedi'i gwblhau.

Mae’r holl bartneriaid sy’n ymwneud â mynd i’r afael â’r broblem arogleuon yn Withyhedge - Cyfoeth Naturiol Cymru (CNC), Cyngor Sir Penfro (CSP), Iechyd Cyhoeddus Cymru (ICC) a Bwrdd Iechyd Prifysgol Hywel Dda - yn deall faint o straen mae’r broblem barhaus hon o ran arogleuon yn ei achosi i bobl sy'n byw ac yn gweithio yn y cymunedau yr effeithir arnynt. Rydym yn cydnabod bod pobl yn profi mwy o bryder ac effeithiau ar eu lles, yn ogystal ag adrodd am symptomau iechyd corfforol ac mae hyn yn peri pryder mawr i ni.

Mae ein Cell Ansawdd Aer, grŵp aml-asiantaeth a gadeirir gan CSP, ar hyn o bryd yn adolygu'r adroddiad monitro ansawdd aer diweddaraf gan Geotechnology ac mae swyddogion CSP yn cysylltu'n uniongyrchol â'r trigolion yr effeithir arnynt. Bydd y Gell Ansawdd Aer yn sicrhau bod y data ar gael i'r cyhoedd cyn gynted â phosibl.

Mae’r grŵp hwn hefyd yn datblygu rhaglen o fonitro ansawdd aer annibynnol ychwanegol, a fydd yn cael ei harwain gan CSP gyda chymorth CNC. Bydd mwy o fanylion yn cael eu rhannu pan fydd y cynllun wedi'i gwblhau.

Mae cyngor ICC yn parhau i fod yr un fath â’r cyngor ers dechrau mis Mawrth - mae'n bosibl y gallai arogleuon ac allyriadau o'r safle fod yn niweidiol i iechyd, ond mae angen mwy o ddata er mwyn bod yn sicr. Rydym yn parhau i gynghori pobl i gadw drysau a ffenestri ar gau pan fydd yr arogleuon yn bresennol, ac i ofyn am gyngor meddygol os yw pobl yn teimlo'n sâl.

• Mae arogleuon yn fwy tebygol yn y nos ac yn oriau mân y bore pan fydd y tywydd yn dawel ac yn llonydd.
• Gall cau ffenestri a drysau gyda'r nos ac, os gallwch chi, eu hagor yn y bore unwaith y bydd unrhyw arogl y tu allan wedi lleihau, helpu.
• Mae rhagolygon y tywydd yn rhagweld cyfeiriad y gwynt a gallant eich helpu i benderfynu a ydych am agor neu gau ffenestri a drysau i leihau arogleuon yn eich cartref.
• Os yw'r gwynt yn dod i'ch tŷ o gyfeiriad y safle tirlenwi rydych ‘yng nghyfeiriad y gwynt'. Gall cau drysau a ffenestri helpu.
• Os yw'r gwynt yn chwythu i unrhyw gyfeiriad arall, mae'n syniad da agor drysau a ffenestri, os gallwch chi, i helpu i glirio unrhyw arogleuon.
• Rhowch wybod am arogleuon cyn gynted ag y byddwch yn sylwi arnynt i CNC, gan ddefnyddio'r ffurflen ar-lein hon.

• Os oes gennych symptomau, neu unrhyw bryderon iechyd, cysylltwch â GIG 111, fferyllydd neu'ch meddyg teulu (neu 999 os bydd argyfwng).

C. Sut alla i leihau arogleuon yn fy nghartref?

Os yw'r safle tirlenwi yn rhyddhau nwy a bod y gwynt yn chwythu tuag at eich tŷ, nid oes ffordd hawdd o atal neu osgoi arogleuon yn eich tŷ. Gall cau ffenestri a drysau pan fydd arogleuon cas yn bresennol, neu pan fydd y gwynt yn chwythu o'r safle tirlenwi tuag at eich cartref, helpu i atal arogleuon rhag dod i mewn. Ond, PEIDIWCH â rhwystro ffenestri neu fentiau'n gyfan gwbl; mae hyn oherwydd eu bod yn darparu aer i awyru offer coginio a gwresogi ac i reoli lleithder.

Unwaith y bydd arogl y tu allan wedi diflannu, bydd agor ffenestri a drysau yn helpu i gael gwared ar yr arogleuon y tu mewn.

C. Sut alla i ddweud pryd y gallai'r tywydd effeithio ar arogleuon yn fy nghartref, a beth alla i ei wneud?

Mae gwefan y Swyddfa Dywydd yn darparu rhagolygon tywydd ar gyfer cyflymder a chyfeiriad y gwynt (o ba gyfeiriad y bydd y gwynt).

O dan Reoliadau Trwyddedu Amgylcheddol (Cymru a Lloegr) 2016, rydym yn gwneud gwaith rheoleiddio a gorfodi.

Dyma rai enghreifftiau o'r termau a glywir amlaf a'r hyn y maent yn ei olygu mewn perthynas â'r gwaith yr ydym yn ei wneud yn Safle Tirlenwi Withyhedge.

Gwaith rheoleiddio – archwiliadau a gynhelir ar safleoedd gyda Thrwyddedau Amgylcheddol i asesu cydymffurfiaeth ag amodau’r trwyddedau. Mae'r canlyniadau'n cael eu cofnodi mewn Adroddiadau Asesu Cydymffurfiaeth, ac fel arfer maent ar gael ar ein Cofrestr Gyhoeddus. Lle gall fod camau cyfreithiol ychwanegol, efallai y cânt eu dal yn ôl er mwyn peidio â pheri anfantais i’r achosion.

Diffyg cydymffurfio â thrwyddedau – pan fydd gweithredwr yn methu â chydymffurfio ag amod trwydded, mae’n cyflawni trosedd o dan Reoliadau Trwyddedu Amgylcheddol (Cymru a Lloegr) 2016. Mae'r achosion hyn o dorri amodau trwydded yn cael eu cofnodi yn yr Adroddiad Asesu Cydymffurfiaeth gyda manylion y camau gweithredu y mae'n ofynnol i’r gweithredwr eu cymryd er mwyn cydymffurfio eto. Lle mae trosedd wedi'i chyflawni, byddwn fel arfer yn ystyried rhoi rhyw fath o sancsiwn, yn ogystal â chymryd unrhyw gamau ataliol neu adferol eraill sy'n angenrheidiol i amddiffyn yr amgylchedd neu bobl.

Ymatebion amddiffynnol – gall hyn fod yn gyngor ac arweiniad, neu gyfarwyddyd uniongyrchol i weithredwr, ond mae hefyd yn cynnwys Hysbysiadau. Ar gyfer achosion o ddiffyg cydymffurfio â thrwyddedau, Hysbysiadau Gorfodi Rheoliad 36 y Rheoliadau Trwyddedu Amgylcheddol yw'r rhain fel arfer.

Hysbysiadau Gorfodi Rheoliad 36 - defnyddir y rhain pan fo amod trwydded wedi'i dorri, yn cael ei dorri, neu'n debygol o gael ei dorri. Rhaid i'r Hysbysiad amlinellu natur y drosedd/troseddau, a nodi'r camau sydd eu hangen i'w gywiro a chydymffurfio eto. Mae hawl gan dderbynnydd Hysbysiad Rheoliad 36 i apelio yn ei erbyn. Mae methu â chydymffurfio â Hysbysiad Rheoliad 36 yn drosedd ar wahân ac ychwanegol o dan y Rheoliadau Trwyddedu Amgylcheddol.

Yn achos Safle Tirlenwi Withyhedge, nid yw'r ddeddfwriaeth yn caniatáu i CNC gynnwys cam yn yr Hysbysiadau a gyhoeddir sy'n nodi 'stopio’r arogleuon'. Rhaid i'r camau a osodwn fod yn glir, yn benodol, yn gyraeddadwy, ac yn rhesymol. Maent yn nodi mewn trefn y gwaith yr oeddem yn gofyn i'r gweithredwr ei wneud i gadw, casglu a rheoli nwy tirlenwi, ffynhonnell neu achos arogleuon oddi ar y safle.

Nid yw'r adroddiadau parhaus am arogleuon yn y cyffiniau yn golygu, o reidrwydd, fod y gweithredwr wedi methu â chydymffurfio â gofynion yr Hysbysiadau a gyhoeddwyd. Mae ein hasesiad o gydymffurfiaeth â'r Hysbysiadau yn parhau.

Nid yw asesiad parhaus o Hysbysiadau Gorfodi Rheoliad 36 blaenorol, na diffyg cydymffurfio â hwy, yn atal y defnydd o Hysbysiadau pellach.

Camau gorfodi neu sancsiynau eraill – yr ymatebion troseddol safonol sydd ar gael i ni ar gyfer troseddau o dan y Rheoliadau Trwyddedu Amgylcheddol yw Llythyr Rhybuddio, Rhybudd Ffurfiol ac Erlyniad. Penderfynir ar bob ymateb fesul achos gan ystyried nifer o ffactorau.

Mae torri amodau trwydded yn drosedd o dan y Rheoliadau Trwyddedu Amgylcheddol. Mae yna faterion sy'n cael eu harchwilio ar y safle. Os ystyrir bod achosion o dorri amodau'r drwydded wedi digwydd, gallant fod yn destun cosbau troseddol.