Rydym yn deall pryderon cynyddol y rhai sy'n byw neu'n gweithio mewn cymunedau o amgylch y safle. Rydym yn gwneud popeth o fewn ein gallu i sicrhau bod ffocws gweithredwr y safle, Resources Management UK Ltd (RML), yn dal i fod ar fynd i’r afael â’r problemau arogl parhaus. Rydym yn obeithiol y bydd y camau hyn yn arwain at leihad sylweddol mewn allyriadau nwyon tirlenwi ac arogleuon ar ffo erbyn canol mis Mai.

Cynhaliodd swyddogion o'n Tîm Rheoleiddio Diwydiant archwiliad arall yn Safle Tirlenwi Withyhedge ar .

Mae'r Hysbysiad Gorfodi Rheoliad 36 diweddaraf – a gyhoeddwyd ddydd Iau 18 Ebrill – yn amlinellu cyfres o gamau i'w cwblhau erbyn terfynau amser penodedig, fel y dangosir yn y llinell amser uchod.

Mae gweithredwr y safle RML Ltd wedi cwblhau’r camau gweithredu canlynol yr wythnos hon:

• Mae 10 ffynnon nwy tirlenwi wedi'u gosod ledled y gell sydd wedi'i nodi fel ffynhonnell y problemau arogl (Cell 8). Mae'n debygol y bydd pobl yn y cymunedau cyfagos wedi gallu gweld y rig drilio a ddefnyddiwyd i osod y ffynhonnau nwy hyn.
• Mae pump o'r ffynhonnau nwy newydd wedi'u cysylltu â'r system echdynnu nwy tirlenwi ac wrthi'n tynnu nwy tirlenwi. Bydd y pum ffynnon arall yn cael eu cysylltu erbyn diwedd yr wythnos.
• Mae deunydd capio wedi parhau i gael ei ddefnyddio ar draws Cell 8. Bydd y gwaith hwn yn parhau drwy gydol yr wythnos nesaf nes bod y rhan fwyaf o'r gell wedi'i gorchuddio.

Mae CNC yn asesu cynnydd yn erbyn y camau gweithredu yn rheolaidd trwy archwiliadau safle. Rhaid cwblhau pob cam gweithredu erbyn 14 Mai.  Bydd hyn yn gofyn am ymdrech sylweddol gan y cwmni dros y pythefnos nesaf.

Mae Pennaeth Gweithrediadau’r De-orllewin, Huwel Manley, a Rheolwr Gweithrediadau’r De Orllewin, Caroline Drayton, wedi mynychu sawl cyfarfod gyda swyddogion etholedig a chynrychiolwyr cymunedol yr wythnos hon, gan roi’r wybodaeth ddiweddaraf am y camau a gymerwyd gan CNC hyd yma ac i ateb rhai o’r cwestiynau gan y gymuned.

Roedd hyn yn cynnwys sesiwn gynhyrchiol gyda chynrychiolwyr o grŵp ymgyrchu Stop the Stink Withyhedge.

Bydd ein tîm yn parhau i gyfarfod yn rheolaidd ag aelodau'r gymuned a'n partneriaid dros yr wythnosau nesaf.

Mae asesiadau arogl yn parhau i gael eu cynnal yn y gymuned. Maen nhw’n cael eu cynnal yn rheolaidd er mwyn adnabod unrhyw arogleuon o’r safle tirlenwi sy’n llygru neu’n annymunol yn y gymuned, ac maent yn un o ofynion y Drwydded Amgylcheddol.

Mae’n rhaid i’n hasesiadau arogleuon gael eu cynnal mewn modd cyson ac yn unol â’r canllawiau rheoleiddio i sicrhau bod unrhyw gamau rheoleiddio a gymerir mewn ymateb i arogleuon llygrol a ganfyddir yn gadarn.

Mae asesiadau wedi cael eu cynnal pan ddeallir bod arogl ar ei waethaf, a oedd yn fwy diweddar wedi tueddu i fod yn gynnar yn y bore ac yn hwyr gyda'r nos, yn unol â'r adroddiadau digwyddiadau a dderbyniwyd. Fodd bynnag, cynhelir asesiadau ar adegau eraill hefyd gan ein bod yn gwerthfawrogi bod amrywiadau.

Mae arogleuon sy'n gysylltiedig â'r safle tirlenwi yn dal i gael eu canfod mewn ardaloedd o amgylch y safle ac rydym yn annog pobl i barhau i roi gwybod i ni am arogleuon pan fyddant yn bresennol.

Ein blaenoriaeth yw sicrhau bod y gweithredwr yn gweithio'n gyflym i ddatrys y problemau arogleuon sy'n effeithio ar ansawdd bywyd pobl sy'n byw ac yn gweithio yn y cymunedau o amgylch Safle Tirlenwi Withyhedge.

Mae nifer o achosion difrifol o ddiffyg cydymffurfio â thrwyddedau wedi'u nodi ar y safle yn ystod y misoedd diwethaf. O dan Reoliadau Trwyddedu Amgylcheddol (Cymru a Lloegr) 2016 mae’n drosedd i dorri amod trwydded ac o ganlyniad, mae ymchwiliad CNC yn parhau.  Am y rheswm hwn, ychydig iawn o fanylder yr ydym wedi gallu ei rannu’n gyhoeddus.

Tra bod y gwaith brys sydd ei angen ar y gweithredwr yn mynd rhagddo dros y dyddiau a’r wythnosau nesaf, mae’r safle’n parhau i gael ei archwilio a byddwn yn parhau â’n presenoldeb rheoleiddio.

Mae adroddiadau ar arogleuon gan y cyhoedd yn bwysig iawn i helpu i arwain ein gwaith gorfodi. Maen nhw’n helpu i greu darlun o’r adegau pan mae’r broblem arogleuon yn fwyaf cyffredin, yn ein helpu i asesu effeithiau’r camau a gymerwyd hyd yma, ac yn cefnogi gweithgareddau gorfodi yn erbyn gweithredwr y safle.

Rhowch wybod am arogleuon wrth i chi eu profi - nid wedi’r digwyddiad os gwelwch yn dda.

Gofynnwn i chi barhau i roi gwybod am achosion o arogleuon o safleoedd tirlenwi drwy ein ffurflen bwrpasol: https://bit.ly/reportasmellwithyhedge neu drwy ffonio 0300 065 3000.