Canolfan Ymwelwyr Ynyslas yw’r lle delfrydol i gychwyn ymweliad â Gwarchodfa Natur Genedlaethol Dyfi, sy’n gartref i’r twyni tywod enwog a’r aber enfawr ger Aberystwyth.

Mae yna arddangosfa newydd yn y ganolfan ymwelwyr ynghylch beth i’w weld yn y warchodfa. Mae’r arddangosfa’n cynnwys dangosfyrddau â darluniau hyfryd am y bywyd gwyllt sy’n byw dan y dŵr oddi ar arfordir Ceredigion, y blodau sy’n tyfu yn y twyni a’r adar sy’n dibynnu ar yr aber. Mae dangosfwrdd rhyngweithiol yn dangos sut caiff twyni eu ffurfio, ac mae gwybodaeth am hanes Ynyslas fel cyfleuster arfau yn ystod yr Ail Ryfel Byd.

Mae tîm y ganolfan ymwelwyr yn cynnig rhaglen o ddigwyddiadau, o deithiau tywys i ddiwrnodau addysg bywyd gwyllt. I gael rhagor o fanylion, ewch i dudalen y ganolfan ymwelwyr ar Facebook neu i’n gwefan (argymhellir i chi archebu ymlaen llaw ar gyfer digwyddiadau).

Mae siop y ganolfan ymwelwyr yn gwerthu llyfrau, cardiau, gwaith celf lleol a theganau. Mae hefyd yn gwerthu diodydd a byrbrydau ysgafn ac mae llefydd i eistedd yn yr awyr agored i fwynhau’r lluniaeth a’r golygfeydd.

Dysgwch fwy am ymweld â Gwarchodfa Natur Genedlaethol Dyfi ar ein gwefan

Ewch i dudalen Canolfan Ymwelwyr Dyfi Ynyslas ar Facebook

Mae gan lawer o’r coetiroedd a’r Gwarchodfeydd Natur Cenedlaethol dan ein gofal gyfleusterau i ymwelwyr ag anableddau. I helpu pobl i gynllunio ymweliad yn haws, fe wnaethom gyhoeddi yn ddiweddar adran newydd ar gyfer ymweliadau hygyrch ar ein gwefan.

Yn ogystal â’n llwybrau heb rwystrau ac sy’n hygyrch i gadeiriau olwyn (llwybrau sydd wedi’u graddio fel rhai hygyrch) mae rhai o’n llwybrau beicio’n addas i ddefnyddwyr beiciau addasol. Rydyn ni wedi cynhyrchu cyfres o ffilmiau i helpu pobl i benderfynu pa mor addas yw rhai o’r llwybrau hyn iddyn nhw a’u cyfarpar cyn ymweld.

Yn y ffilmiau, mae person anabl yn siarad tra byddan nhw’n teithio ar hyd y llwybr gan ddefnyddio’u hoffer eu hunain. Mae pob ffilm yn dangos arwyneb y llwybr, graddiannau i fyny ac i lawr, a rhai rhannau lle gallai fod angen help. Mae’r ffilmiau’n dangos saith llwybr ym mhedwar o’n llefydd (Gwarchodfa Natur Genedlaethol a Choedwig Niwbwrch, Parc Coedwig Coed y Brenin, Coedwig Beddgelert a Pharc Coedwig Afan).

Cewch wybodaeth am lwybrau hygyrch a chyfleusterau hygyrch eraill ar ein gwefan

Gwyliwch y ffilmiau am lwybrau i ddefnyddwyr beiciau addasol ar ein gwefan

Darllenwch y blog am ein gwaith gydag Experience Community i helpu i wella gwybodaeth i ymwelwyr anabl

Mae dau o’r llwybrau cerdded sy’n cychwyn yng Nghanolfan Ymwelwyr Coed y Brenin yn addas ar gyfer ymwelwyr sy’n defnyddio sgwter symudedd oddi ar y ffordd. Mae Llwybr Afon Eden yn mynd at fan picnic ger yr afon ac mae Llwybr Cefndeuddwr yn mynd at olygfan sydd â bwrdd picnic.

Gellir llogi sgwter symudedd Tramper o’r ganolfan ymwelwyr. Nodwch fod yn rhaid archebu hwn ymlaen llaw drwy gysylltu â’r ganolfan ymwelwyr.

Cysylltwch â Chanolfan Ymwelwyr Coed y Brenin ar 01341 440747 neu coedybrenin@cyfoethnaturiolcymru.gov.uk

Mae cyfleusterau ymwelwyr dau o goetiroedd poblogaidd Llywodraeth Cymru bellach yn cael eu rheoli gan sefydliadau eraill.

Yn gynharach eleni, ymgymerodd Forest Holidays â’r cyfrifoldeb dros reoli cyfleusterau ymwelwyr Garwnant ger Merthyr Tudful. Mae Forest Holidays yn adeiladu cabanau gwyliau pren yn y goedwig ac yn bwriadu diweddaru’r ganolfan ymwelwyr a’r caffi. Mae’r maes parcio, y llwybrau a’r caffi ar agor o hyd i ymwelwyr dydd.

I gael y wybodaeth ddiweddaraf am ymweld â Garwnant, ewch i wefan Forest Holidays

I weld y datganiad newyddion am y newid i’r trefniadau rheoli, ewch i’n gwefan ni

Ym mis Mai, llofnododd Cyfoeth Naturiol Cymru a’r Ymddiriedolaeth Genedlaethol gytundeb prydles yn trosglwyddo cyfrifoldebau rheoli Hafod i’r Ymddiriedolaeth Genedlaethol. Bellach mae’r Ymddiriedolaeth yn gofalu am 200 hectar yn Hafod, gan gynnwys y tir helaeth, y gerddi hanesyddol wedi’u hadfer, a’r llwybrau cerdded. Mae Hafod a’r llwybrau cerdded ar agor gydol y flwyddyn ac maent am ddim o hyd i bobl ymweld.

I weld y wybodaeth ddiweddaraf am ymweld â Hafod, ewch i wefan yr Ymddiriedolaeth Genedlaethol

I weld y datganiad newyddion am y newid i’r trefniadau rheoli, ewch i wefan yr Ymddiriedolaeth Genedlaethol

Dyma rywfaint o gynghorion o’r Cod Cefn Gwlad i’ch helpu i chwarae eich rhan yn gofalu am goetiroedd a Gwarchodfeydd Natur Cenedlaethol er mwyn iddynt aros yn iach a phrydferth i bawb eu mwynhau.

Mae llawer o’n llefydd mewn lleoliadau tawel yng nghefn gwlad, ble nad yw gwastraff yn cael ei gasglu’n rheolaidd. Dewch â bag i fynd â’ch sbwriel adref gyda chi fel na chaiff ei adael ar ôl i ddifetha’r olygfa a niweidio bywyd gwyllt.

Mae croeso i’ch ci ymweld hefyd, ond sicrhewch eich bod yn codi ei faw a’i roi yn y bin neu’n mynd ag e adre i atal afiechydon rhag ymledu. Fe allech ddod â chynhwysydd i gario’r bag tra byddwch chi allan. Cadwch eich ci o fewn golwg ac o dan reolaeth fel nad yw’n achosi problem i ymwelwyr neu anifeiliaid eraill.

Dim ond un gwreichionyn mae ei angen i achosi tanau gwyllt dinistriol, felly sicrhewch nad ydych chi’n gadael eich sigaréts yn mudlosgi, a pheidiwch â chynnau tân. Dim ond ble mae arwyddion yn dweud y cewch wneud y dylech chi gynnau barbeciw, ac yna arhoswch tan fydd y lludw’n oer a gwaredwch y gwastraff mewn ffordd gyfrifol. Yn well byth, dewch â phicnic o gartref, yn enwedig mewn tywydd poeth a sych.

Ystyriwch y gymuned leol drwy beidio ag achosi rhwystr ar ffyrdd neu o flaen gatiau wrth barcio. Gwnewch gynllun amgen rhag ofn bydd y maes parcio’n llawn pan fyddwch chi’n cyrraedd.

Darllenwch y Cod Cefn Gwlad i gael rhagor o gyngor i’ch helpu i ofalu am natur tra byddwch yn mwynhau’r awyr agored

Bellach gellir prynu cyfres newydd o nwyddau brand Llwybr Arfordir Cymru ar-lein. Mae’r gyfres ddillad yn cynnwys hwdis, crysau-T a hetiau. Hefyd gallwch brynu llyfrau nodiadau, bagiau cotwm, matiau diod a mygiau.

Mae Llwybr Arfordir Cymru’n dathlu ei ddengmlwyddiant eleni, ac mae’r gyfres arbennig i nodi’r digwyddiad yn cynnwys gwydr peint coffa, sy’n berffaith ar gyfer llymaid bach ar ôl diwrnod o gerdded.

Mae’r cynhyrchion yn defnyddio deunyddiau bioddiraddadwy ac ecogyfeillgar, ac mae pob eitem a brynwch yn helpu i warchod yr awyr agored ac yn cefnogi’r gwaith o gynnal Llwybr Arfordir Cymru.

Ewch i siop Llwybr Arfordir Cymru ar-lein i bori drwy’r gyfres gyfan o nwyddau

Gobeithio bod y cipolwg hwn ar y newyddion o’r llefydd o dan ein gofal ar draws Cymru wedi’ch ysbrydoli i fynd allan i’r awyr agored yr haf hwn. 

Rhowch wybod i ni beth yw eich barn am y cylchlythyr hwn, a rhannwch unrhyw syniadau sydd gyda chi ar gyfer cynnwys yn y dyfodol.

A beth am ei anfon ymlaen at deulu a ffrindiau a hoffai ddarganfod mwy o Gymru hefyd? 

I gael gwybodaeth am ein coetiroedd a’n Gwarchodfeydd Natur Cenedlaethol sydd â chyfleusterau i ymwelwyr, ewch i’n gwefan Ar Grwydr