Gyda'r tymor bridio adar ar ben, mae gwaith cadwraeth hanfodol i helpu i gadw ein twyni tywod yn iach bellach yn ôl ar y gweill mewn gwahanol safleoedd ledled Cymru. O dorri llystyfiant i glirio prysgwydd a thynnu tyweirch i gwympo conwydd, rydyn ni’n gweithio'n galed i sicrhau bod y cynefin twyni tywod a'r bywyd gwyllt sy'n dibynnu arno yn cael yr hwb gorau posibl cyn y Nadolig.

Mae llawer o waith hanfodol ar y gweill ym Merthyr Mawr. Rydyn ni’n creu rhicyn ym mlaen y twyni ac yn crafu i adfer un o laciau hanesyddol y twyni (sydd wedi'i ddifrodi ar ôl cloddio graean yn y gorffennol) a'r twyni o'i gwmpas - cyfanswm arwynebedd o ddau hectar. Bydd 16 ardal fach arall hefyd lle bydd tyweirch yn cael eu tynnu - gan ail-greu cynefin tywod moel hanfodol.

Yng Nghynffig, ym mis Medi cwblhaodd Twyni Byw waith crafu ar 0.5 hectar o laciau twyni i adfer lefelau dŵr ac ail-greu cynefin tywod noeth, sy'n cael ei golli o dwyni tywod Cymru ar raddfa frawychus. Fe wnaethon ni hefyd dorri 13 hectar o laswelltir y twyni i helpu i hybu poblogaeth tegeirian y fign galchog ar y safle. Bydd gwaith pellach yn parhau gyda chlirio prysgwydd sy'n mygu glaswelltir y twyni ac yn bygwth planhigion twyni arbenigol.

Draw yn Niwbwrch rydyn ni wedi bod yn tynnu prysgwydd ym Mhant Mawr - llannerch agored fwyaf y safle - yn ogystal â Ffrydiau, Pant y Fuches a Cherrig Duon. Fe wnaeth contractwyr dynnu cymysgedd o rywogaethau estron goresgynnol fel cotoneaster a rhywogaethau brodorol fel bedw a helyg. Gall prysgwydd ymledu dros laswelltir y twyni yn gyflym ac arwain at ddiflaniad y llaciau llawn tegeirianau, pyllau dŵr croyw a chribau cen prin.

Mae gwaith wedi'i wneud i adfer yr ardal o amgylch Pyllau Ffrydiau (gweler y ddelwedd). Mae hyn wedi adnewyddu'r pyllau oedd wedi gordyfu, wedi datguddio tywod noeth ac wedi creu pwll newydd - mae hyn i gyd yn helpu tafolen y traeth a’r fadfall ddŵr gribog ar y safle, sy’n Rhywogaethau a Warchodir gan Ewrop.

Mae Rheolwr Prosiect Twyni Byw, Kathryn Hewitt, yn darparu rhagor o wybodaeth am y gwaith yn Niwbwrch.

Cadwch lygad ar ein ffrydiau cyfryngau cymdeithasol i gael diweddariadau pellach ar y gwaith.

Mae gwaith gaeaf pwysig prosiect Twyni Byw yn Nhwyni Whiteford yn cynnwys gwaith teneuo yn rhai o glystyrau’r blanhigfa gonwydd (tua 4 hectar) a chwympo blociau o gonwydd (tua 3.5 hectar).

Yma mae Laura Bowen, Swyddog Prosiect a Monitro Twyni Byw yn y De, yn trafod pam mae'r gwaith mor bwysig wrth i'r prosiect fynd ati i adfywio twyni tywod ledled Cymru.

Yn y flwyddyn newydd byddwn hefyd yn gweithio gyda chydweithwyr o dîm coedwigaeth Cyfoeth Naturiol Cymru i gael gwared ar floc o gonwydd sydd wedi'i leoli ar dwyni ar gyrion Coedwig Harlech.

Cymerwch ran yn ein harolwg am effeithiau economaidd-gymdeithasol twyni tywod ac adfer twyni a dywedwch wrthyn ni ba mor bwysig yw'r tirweddau arbennig hyn i chi.

Mae’n broses gyflym a bydden ni’n gwerthfawrogi'ch cyfraniad yn fawr.

Cliciwch ar y ddolen yma er mwyn lenwi'r arolwg os gwelwch yn dda. Gallwch ei lenwi’n gyflym a bydden ni’n gwerthfawrogi'ch cyfraniad yn fawr.

Fe wnaethon ni fwynhau ein slot siarad yng Ngŵyl Rhwng y Coed yn ddiweddar ym Merthyr Mawr. Hoffen ni ddweud diolch enfawr i'r trefnwyr am roi cyfle inni egluro pam mae ein gwaith i helpu twyni tywod ledled Cymru mor bwysig. Gobeithiwn gael ein gwahodd yn ôl rywbryd yn y dyfodol.

Fel rhan o weithdy canol tymor y prosiect, byddwn yn cynnal cyfarfod rhithiol anffurfiol am ddwy awr ddydd Iau 21 Hydref 2021. Bydd hyn yn cynnig cyfle i reolwyr twyni tywod ledled Cymru, y DU ac yn Ewrop yn ehangach rwydweithio'n anffurfiol a rhannu llwyddiannau a heriau gyda’i gilydd.

Os hoffech chi fod yn bresennol, anfonwch e-bost at SoLIFE@cyfoethnaturiolcymru.gov.uk.

Diolch yn fawr i Coast and Country ITV Wales am ddod draw i Forfa Harlech i ffilmio i ddangos sut rydyn ni'n gweithio mewn partneriaeth â Chlwb Golff Brenhinol Dewi Sant i helpu i gadw'r twyni tywod yn iach.

Cafodd y cyflwynydd Rob Shelley sgwrs fanwl am ein prosiect cyn cyfweld hefyd â Trefor Davies, Rheolwr y Clwb Golff.

Cadwch lygad ar ein ffrydiau cyfryngau cymdeithasol i gael gwybod pryd y bydd yr eitem yn cael ei darlledu.