Ym mis Chwefror gwnaethom groesawu dau gynorthwyydd newydd i'r tîm, Joanna fel Cynorthwyydd Gweinyddol a Ben fel Cynorthwyydd Cadwraeth (gweler llun i'r chwith).

Bydd Joanna yn cefnogi'r tîm gyda thasgau cyllid a gweinyddol, tra bydd Ben yn cefnogi ochr gadwraeth ac adfer y prosiect.

Rwy'n siŵr y byddwch chi'n ymuno â ni i ddymuno pob lwc iddyn nhw yn eu rolau newydd.

Ar ôl ymweld â Chors Fochno ym mis Tachwedd, aethom allan eto gyda’r ffotograffydd proffesiynol Drew Buckley ym mis Ionawr i gipio lluniau o Warchodfa Natur Genedlaethol (GNG) Cors Caron.

Wrth lwc, roedd y tywydd yn wych ac yn dangos y warchodfa yn ei holl ogoniant. Diolch eto i Drew am ei gymorth a'i amynedd, dyma lond dwrn o'r lluniau i'w dangos i chi, byddwn yn rhannu mwy gyda chi ar ein tudalennau Facebook a Twitter dros yr ychydig fisoedd nesaf.

Fe wnaethom ddathlu Diwrnod Gwlyptiroedd y Byd ar ddydd Sul 2 Chwefror gyda thaith gerdded dywysedig o amgylch Cors Fochno ger Borth (gweler llun chwith), a gweithgareddau cors yng Nghletwr ger Tre’r-ddôl.

Er bod y tywydd ychydig yn llwyd yn y bore, fe wnaeth nifer o bobl ddod allan i'r gors gyda ni, diolch i pawb am ddod.

Yn y prynhawn cawsom sgyrsiau hyfryd iawn am y prosiect gyda phobl leol ac ymwelwyr yng Nghletwr, a llwyddom hefyd i greu ein cors ein hunain gyda chymorth plant lleol (gweler llun isod) #DiwrnodGwlyptiroeddyByd

Ym mis Chwefror dechreuwyd ar y gwaith pwysig o greu cloddiau isel o fawn ar Gors Fochno (gweler y ddelwedd i'r dde). Mae hon yn garreg filltir allweddol i'r prosiect ac mae'r tîm yn falch iawn o ddechrau'r gwaith o'r diwedd.

Mae oddeutu 64,000 metr (64km) o gloddiau mawn i'w hadeiladu a'u creu fel rhan o'r prosiect cyfan, mae 1250 metr wedi'u cwblhau hyd yn hyn, efo rhagor wedi'i cynllunio ar gyfer yr Hydref a Gaeaf.

I ddarganfod mwy am waith cloddio mawn y prosiect ewch i’n tudalen we. I gael diweddariadau rheolaidd, cofiwch ymweld â'n tudalennau Facebook a Twitter.

Ym mis Ionawr cyhoeddodd ein partner Awdurdod Parc Cenedlaethol Eryri (APCE) ei fod wedi sicrhau cyllid i helpu i adfer gorgors Llwytmor a Foel Grach ar y Carneddau yng ngogledd Cymru.

Daw'r cyllid o brosiect Cynllun Rheoli Cynaliadwy (CRhC) Mawndiroedd Cymru, mewn cydweithrediad â'r Ymddiriedolaeth Genedlaethol a Chymdeithas Porwyr Aber a Llanfairfechan.

Mae mawndiroedd yn gweithredu fel storfa garbon enfawr; ond ar gorgorsydd Llwytmor a Foel Grach ar y Carneddau, mae erydiad ar raddfa fawr yn peryglu rhyddhau llawer iawn o garbon i'r atmosffer ac i gyrsiau dŵr.

Gellir dod o hyd i ryw 3500 hectar o gynefinoedd gorgors rhwng copaon y Carneddau yng ngogledd Eryri, gyda gorgorsydd mawr ar lethrau Llwytmor a Foel Grach.

I ddarganfod mwy am y prosiect hwn ewch i'r wefan.