Ysgrifennydd yr Economi yn pennu’r blaenoriaethau cychwynnol  

Mae Ken Skates, Ysgrifennydd y Cabinet dros yr Economi a’r Seilwaith wedi nodi ei flaenoriaethau allweddol.

Wrth siarad yng Nghinio Blynyddol CBI Gogledd Cymru, dywedodd mai un o’i dasgau cyntaf fydd holi busnesau a phartneriaid allweddol am eu barn am ddatblygu strategaeth economaidd newydd i Gymru.  Dywedodd y byddai'n galw ar y gymuned fusnes i gydweithio'n agos ag ef.

Dywedodd y Gweinidog: “Mae’n fraint enfawr i mi gael fy mhenodi yn Ysgrifennydd yr Economi a’r Seilwaith ac rwyf wrth fy modd ac yn frwdfrydig iawn am yr heriau a’r cyfleoedd sydd o’n blaenau. 

Dyfais offer ceffylau gan gwmni yng Nghwmbrân ar garlam mewn marchnadoedd byd-eang

Mae dyfais offer ceffylau gan gwmni technoleg o Gymru, gyda chefnogaeth Llywodraeth Cymru, yn denu sylw byd-eang oddi wrth berchnogion a hyfforddwyr ceffylau rasio drwy allu canfod unrhyw straen neu niwed i gyhyrau coesau ceffylau.

Dim ond ddiwedd 2015 y lansiodd Byerley Technologies o Gwmbrân y Tendon Manager ac eisoes mae wedi denu ymholiadau o Dubai, Awstralia a'r Almaen. Mae’r dechnoleg yn sicrhau bod ceffylau ar eu gorau ar gyfer cystadlu ac mae hefyd yn eu helpu i wella ar ôl anafu.

Bu cefnogaeth Arloesi Llywodraeth Cymru, gyda chefnogaeth arian yr Undeb Ewropeaidd, o gryn help wrth ddatblygu’r Tendon Manager.   Rhagor o wybodaeth.

Ysgrifennydd yr Economi yn dathlu ffigurau swyddi rhagorol

Mewn ymweliad â’r Bathdy Brenhinol, cyhoeddodd Ken Skates, Ysgrifennydd y Cabinet dros yr Economi, fod Llywodraeth Cymru wedi helpu i greu dros 40,000 o swyddi yn 2015/16.

Dengys y ffigurau diweddaraf fod Llywodraeth Cymru wedi helpu i greu 5.3% yn fwy o swyddi yn 2015/16 nag y gwnaeth yn 2014/15, ac yn nhymor diwethaf y Cynulliad (2011 i 2016), fe helpodd i greu cyfanswm o bron i 150,000 o gyfleoedd newydd. Rhagor o wybodaeth.

United Aerospace yn ennill gwobr arobryn gyda chefnogaeth Arloesi Llywodraeth Cymru

Mae nawdd SMARTCymru wedi helpu United Aerospace (sy’n deillio o Rebel.Aero Ltd) i ddatblygu sedd arloesol ar gyfer awyrennau teithiau byr ac ennill Gwobr Crystal Cabin, sy’n wobr arobryn ryngwladol, am ragoriaeth ym maes datblygu tu mewn awyrennau.

Rhagor o wybodaeth am sut gall arian arloesi helpu eich busnes

Datblygiad cynnyrch diagnosis canser Cellpath

Mae CellPath yn cynhyrchu cynnyrch sy’n cael eu defnyddio mewn patholeg cellau wrth wneud diagnosis o ganser. Ar ôl cael arian gan Lywodraeth Cymru, mae wedi datblygu cynnyrch newydd, cyflogi mwy o staff a chynyddu ei drosiant.

Dywedodd Dr Neil Haine, Rheolwr Ymchwil a Datblygu yn CellPath “Mae CellPath Ltd yn eithriadol o ddiolchgar am gefnogaeth arloesi Llywodraeth Cymru. Dyna sydd wedi galluogi’r cwmni i ddatblygu a masnacheiddio cymaint o gynnyrch newydd a fydd yn ei gwneud gymaint yn haws rhoi diagnosis o ganser.”  Rhagor o wybodaeth.

Concrete Canvas yn ennill contract LNG mawr yn Awstralia

Mae Concrete Canvas wedi cael cymorth gan Lywodraeth Cymru ac mae'r cwmni wedi ennill contract mawr gwerth mwy nag US$1M i gyflenwi dros 32,000 metr sgwâr o Concrete Canvas® GCCM (CC) ar gyfer rheoli erydiad i un o brosiectau adnoddau mwyaf Awstralia: gweithfa LNG Wheatstone yng ngorllewin Awstralia.

Rhagor o wybodaeth ynghyd â dysgu sut defnyddiodd y cwmni cymorth arloesi Llywodraeth Cymru ac arian i ddatblygu ei gynnyrch a gwneud y busnes yn fwy cystadleuol.

Cyhoeddi enwau enillwyr Gwobr Mentergarwch y Frenhines

Mae tîm Arloesi Llywodraeth Cymru wedi cefnogi tri o’r pedwar enillydd o Gymru yng Ngwobrau Mentergarwch y Frenhines.

Yn y categori Arloesi, bu Direct Healthcare Ltd a Lumishore Ltd yn llwyddiannus, a llwyddodd Kent Periscopes Ltd i ennill y categori Masnach Ryngwladol.   

Rhoddir y Gwobrau hyn i fusnesau am lwyddiant eithriadol ym maes Masnach Ryngwladol, Arloesi a Datblygu Cynaliadwy. Rhagor o wybodaeth.

Advances Wales, rhifyn 79 allan nawr

Mae gwyddonwyr, peirianwyr a gweithgynhyrchwyr yng Nghymru yn ymateb i’n byd sy’n prysur newid gyda thechnolegau newydd arloesol ac ymchwil sy’n torri tir newydd. Mae’r rhifyn hwn yn cynnwys ystod o ddatblygiadau digidol ac ymchwil a datblygiad technolegau adnewyddadwy sy’n ymateb i’r byd gwyddonol a thechnolegol ac yn parhau i'w siglo.

Mae gwyddonwyr Cymru yn gweithio ar arbrofion gyda'r gorau yn y byd i herio damcaniaethau ffiseg sy’n bodoli’n barod, ac addysgu robotiaid ar ffurf ddynol i ddysgu ac addasu yn y ffordd y byddai plentyn dynol yn ei wneud.  Darllenwch y rhifyn diweddaraf.