Warws newydd gwerth £4.5m gan Norgine yn rhoi hwb i sector gwyddorau bywyd Cymru

Mae warws newydd, gwerth £4.5m, Norgine wedi agor yn swyddogol, sy’n darparu hwb pwysig arall i’r sector gwyddorau bywyd yng Nghymru.

Bydd Norgine, un o gwmnïau angori Llywodraeth Cymru, yn awr yn ehangu ei waith cynhyrchu ac yn cryfhau dyfodol hirdymor y safle.  Dyma’r cyflogwr fferyllol mwyaf yng Nghymru sy’n cyflogi 328 o staff amser llawn, ac mae’n gweithio’n agos gyda Llywodraeth Cymru i helpu i ysgogi twf economaidd a chreu swyddi yn y sector gwyddorau bywyd yng Nghymru. Darllen mwy.

Magstim yn creu 50 o swyddi wrth iddo dargedu marchnadoedd pwysig yn yr Unol Daleithiau Mae cwmni yn Sir Gaerfyrddin yn cynyddu ei weithlu i 150 gyda chymorth gan Lywodraeth Cymru. Mae Cwmni Magstim, a gefnogir gan becyn cyffredinol o £2.7 miliwn gan Lywodraeth Cymru, yn bwriadu creu bron i 50 o swyddi newydd yn ei ganolfan yn Hendy-gwyn ar Daf dros dair blynedd. Bydd y busnes, sydd ag enw da yn rhyngwladol am gynhyrchu cyfarpar meddygol soffistigedig ar gyfer archwilio a therapi’r ymennydd, yn adeiladu estyniad 13,912 o droedfeddi sgwâr i’w gyfleuster presennol yn Hendy-gwyn ar Daf, ac yn creu 50 o swyddi newydd - gan gynyddu nifer y gweithlu presennol o 100 i 150. Darllen mwy.

Ail fuddsoddiad gan Essentra yn creu 70 o swyddi Mae’r cwmni pecynnu arbenigol sy’n gweithredu ar draws y byd, Essentra plc, unwaith eto yn ehangu yng Nghasnewydd ac yn creu saith deg o swyddi newydd. Mae'r buddsoddiad diweddaraf hwn, gyda chymorth cyllid busnes o £143,000 gan Lywodraeth Cymru, yn golygu y bydd y cwmni’n dyblu maint ei staff wrth iddo gymryd safle cyfagos 225,000 troedfedd sgwâr dan ei adain ym Mharc Imperial, Casnewydd. Darllen mwy.

50 o swyddi’n cael eu creu wrth i Prism Medical UK ehangu Mae pecyn cymorth ariannol o £363,000 gan Lywodraeth Cymru wedi sicrhau dyfodol hirdymor Prism Medical UK. Mae'r cwmni yn awr yn bwriadu ehangu yn y Rhyl a Phen-y-Bont ar Ogwr, gan greu 50 o swyddi newydd a diogelu 135 o swyddi eraill. Darllen mwy.

TrakCel Ltd i greu 20 o swyddi newydd yng Nghaerdydd Bydd y datblygiad gan TrakCel Ltd, cwmni sy’n arloesi ym maes biodechnoleg, yn creu 20 o swyddi newydd ac yn cyflwyno ar lefel fasnachol system olrhain soffistigedig sy’n cael ei defnyddio mewn treialon yn ymwneud â therapïau celloedd a meddygaeth adfywiol. Mae’r cyllid gan Lywodraeth Cymru yn dilyn gwerthusiad llwyddiannus gan GlaxoSmithKline (GSK) o blatfform meddalwedd TrakCel ac o ganlyniad, mae GSK, ynghyd â chwmnïau blaengar eraill yn y diwydiant therapïau celloedd, wedi mabwysiadu’r feddalwedd. Mae’r ehangu hwn wedi cael ei gefnogi gan £125,000 o gyllid busnes gan Lywodraeth Cymru i helpu’r cwmni i uwchraddio o Ymchwil a Datblygu i fasnacheiddio.  Darllen mwy.

Caerdydd yn cael ei henwi’n ‘Ganolfan Rhagoriaeth’ Mae Carwyn Jones, Prif Weinidog Cymru, wedi croesawu’r newyddion bod Caerdydd wedi cael ei henwi’n ‘Ganolfan Rhagoriaeth’ mewn rhwydwaith o ganolfannau i ddatblygu meddygaeth fanwl ledled y DU. Dyma un o chwe chanolfan a enwyd yn y prosiect Precision Medicine Catapult sy’n werth £50m ac a ariennir gan Innovate UK, asiantaeth arloesi Llywodraeth y DU. Mewn consortiwm dan arweiniad Llywodraeth Cymru, GIG Cymru a Phrifysgol Caerdydd, bydd y Ganolfan yn gweithio ar raglenni lleol a chenedlaethol, gan greu timau o arbenigwyr ar draws y rhanbarth  Darllen mwy.

Arbenigedd o Gymru yn cael ei weld yn Medica Aeth un o deithiau masnach Llywodraeth Cymru ag 80 o gynrychiolwyr i Dusseldorf i fynychu ffair fasnach feddygol fwyaf blaenllaw y byd. Mae Medica yn rhoi llwyfan i amrywiaeth o wasanaethau a chynnyrch arloesol a llwyddiannus, ac mae’n un o brif ddigwyddiadau’r byd ar gyfer y sector gwyddorau bywyd yng Nghymru. Mynychwyd y digwyddiad gan bedwar deg a dau o gwmnïau - y nifer mwyaf erioed - gydag un deg naw yn arddangos a dau ddeg tri yn ymweld. Darllen mwy.

Cyffuriau canser newydd i fod ar gael yng Nghymru drwy gytundeb newydd Bydd cytundeb newydd gyda’r cwmni fferyllol Novartis yn galluogi cleifion yng Nghymru i gael gafael ar gyffuriau canser newydd nad ydynt ar gael fel mater o drefn ar hyn o bryd yng Nghymru. Darllen mwy.

Archwiliad iechyd ar gyfer busnesau arloesol Mae SMARTInnovation yn cynnig gwasanaeth ymgynghori tri diwrnod yn rhad ac am ddim i fusnesau ar gyfer cael cyngor dylunio a gweithgynhyrchu. Mae'r cymorth hwn yn rhan o becyn newydd o gymorth SMART a gefnogir gan arian Ewropeaidd. Cael gwybod sut y gall eich busnes gael cymorth.

Arbenigwr byd-eang ar ganser a'r Arglwydd Winston i siarad yn BioCymru 2016 Mae’r arbenigwr byd-eang ar ganser, yr Athro Gordon McVie, Uwch Ymgynghorydd yn y Sefydliad Oncoleg Ewropeaidd yn Milan, wedi cael ei ychwanegu at raglen cynhadledd BioCymru 2016. Mae’r digwyddiad pwysig hwn ar gyfer y sector gwyddorau bywyd yng Nghymru yn dychwelyd i Ganolfan Mileniwm Cymru ar 1-2 Mawrth 2016 dan y thema Cysylltu a Chydweithredu. Cael gwybod mwy.

Contractau gwerth £50m ar gyfer ehangu gwasanaeth Busnes Cymru

Mae gwasanaeth pwysig Llywodraeth Cymru, Busnes Cymru, ar fin ehangu. Y nod yw creu 10,000 o fusnesau newydd, 28,300 o swyddi newydd a darparu cymorth i helpu i ysbrydoli'r genhedlaeth nesaf o entrepreneuriaid ifanc dros y pum mlynedd nesaf. Mae hefyd yn gobeithio cynyddu nifer y nwyddau a gwasanaethau sy’n cael eu hallforio o Gymru, a fydd yn ychwanegu £215 miliwn yn rhagor at Economi Cymru. Darllen mwy.

Cronfa newydd gwerth £39m i roi hwb i gapasiti ymchwil gwyddonol o safon fyd-eang yng Nghymru

Bydd dros chwe deg o gymrodoriaethau ymchwil gwyddonol yn elwa o gronfa newydd gwerth £39m i ehangu capasiti ymchwil gwyddonol Cymru sydd o safon fyd-eang. Cyhoeddwyd hyn gan Edwina Hart, Gweinidog yr Economi, tra oedd yn lansio ail gam Sêr Cymru II ym Mhrifysgol Abertawe.

Cafodd y cam cyntaf ei lansio ym mis Medi 2015 pan ddarparwyd £17m o gyllid gan Lywodraeth Cymru ac Ewrop i ddenu 90 o gymrodyr ymchwil newydd o bob rhan o Ewrop i weithio gydag ymchwilwyr rhagorol yng Nghymru. Darllen mwy.

Apitope i symud i Gymru gyda chymorth Cronfa Gwyddorau Bywyd Cymru

Bydd cwmni cyffuriau sy’n arbenigo mewn datblygu triniaethau ar gyfer clefydau awto-imiwn, ac sydd â’i phencadlys ym Mryste ar hyn o bryd, yn symud i Gymru ar ôl derbyn buddsoddiad o sawl miliwn gan Gronfa Gwyddorau Bywyd Cymru.  Darllen mwy.

Partneriaethau Trosglwyddo Gwybodaeth yn sbarduno arloesedd ac yn cefnogi busnesau i dyfu yng Nghymru

Mae gan y Partneriaethau Trosglwyddo Gwybodaeth, sy’n galluogi cwmnïau i gael gafael ar arbenigedd a sgiliau academaidd i fynd i'r afael â heriau busnes strategol, ran hollbwysig yn ysgogi arloesedd yng Nghymru.

Dyna neges Edwina Hart, Gweinidog yr Economi, pan roddodd anerchiad yn WelshKTP@40 - digwyddiad a oedd yn dathlu pen-blwydd y rhaglen  yn 40 mlynedd yng Nghymru.  Darllen mwy.

£2m o hwb i BBaCh Cymru i ddatblygu atebion pwrpasol ar gyfer heriau’r sector cyhoeddus

Mae arian yn cael ei gynnig i arloeswyr o Gymru trwy gystadleuaeth newydd nid annhebyg i’r Dragons Den fydd yn eu hannog i ddyfeisio atebion strategol i rai o’r problemau mwyaf dyrys sy’n wynebu’r sector cyhoeddus yng Nghymru heddiw.

Bydd Rhaglen Sbarduno Arloesedd newydd y Fenter Ymchwil Busnesau Bach (SBRI) – sy’n cael dros £2m o nawdd gan Lywodraeth Cymru – yn lansio cyfres o gystadlaethau flwyddyn nesaf mewn cydweithrediad ag InnovateUK.  Bydd BBaCh yn cael bidio am gyllid i gynnal gwaith ymchwil a datblygu i ddatblygu atebion technolegol ar gyfer heriau penodol sy’n wynebu’r sector cyhoeddus. Darllen mwy.

Canolfan Arloesi Menter Cymru yn sicrhau buddsoddiad o £250,000

Mae Canolfan Arloesi Menter Cymru yng Nghaerffili wedi sicrhau buddsoddiad gwerth £250,000 i helpu i gefnogi busnesau yng Nghymru sy’n cychwyn.

Bwriad yr arian, a ddarperir gan Ymddiriedolaeth Fairwood, Llywodraeth Cymru, Banc Lloyds a Grŵp WCR, yw rhoi i fusnesau sy’n cychwyn lwybrau strwythuredig at gynaliadwyedd, eu galluogi i greu swyddi a rhoi hwb i economi Cymru.  Darllen mwy.

Cwmnïau yn arddangos technolegau llwyddiannus

Cafodd cwmnïau sydd wedi cael eu dewis ar gyfer y rhestr fel rhan o  UK Medical Technologies Launchpad Innovate, y cyfle i arddangos eu technolegau i ddarpar fuddsoddwyr, mentoriaid, cymheiriaid a chwsmeriaid yn y Venturefest Cymru diweddar.  Roedd hyn yn nodi diwedd rhaglen 6 mis o gymorth cofleidiol i fusnesau a ddarparwyd gan Lywodraeth Cymru, a oedd yn helpu cyfranogwyr i ddatblygu’u busnesau a chael gafael ar fuddsoddiad dilynol.

Cael gwybod sut y maent wedi cael budd o arweiniad a chyngor busnes a sut y maent yn helpu i ddatblygu'r clwstwr Technolegau Meddygol yn Ne Cymru.

Cenedl Hyblyg 2 – cefnogi menywod yn y sector Gwyddorau Bywyd

Rhaglen newydd, a gyhoeddwyd gan Chwarae Teg, yw Cenedl Hyblyg 2 i helpu menywod i ddatblygu’u gyrfaoedd. Mae’r rhaglen wedi’i  hanelu at fenywod sydd am fod yn rheolwyr ac sydd â’r ymroddiad a’r brwdfrydedd i ddatblygu’u gyrfa a menywod sydd efallai eisoes wedi cymryd y cam cyntaf tuag at reoli tîm.  Mae’r rhaglen ar gael i fenywod sy’n gweithio yn y sector Gwyddorau Bywyd a gellir ei theilwra ar gyfer y mathau o heriau y mae rheolwyr am y tro cyntaf yn gallu’u hwynebu ac sy’n unigryw i’r sector hwn.  Cael gwybod mwy.

MRC i arwain yr Uned Ymchwil Dementia gyntaf ac yn ennill Gwobr  Pen-blwydd y Frenhines

Mae’r Prif Weinidog, David Cameron, wedi cyhoeddi y bydd y Sefydliad Ymchwil Dementia (DRI) cenedlaethol cyntaf yn cael ei arwain gan Gyngor Ymchwil Feddygol Prifysgol Caerdydd.  Bydd y Sefydliad Ymchwil Dementia, a fydd yn dod ag arbenigedd gyda’r gorau yn y byd mewn gwyddoniaeth darganfod at ei gilydd, yn derbyn hyd at £150m a bydd yn gwbl weithredol erbyn 2020.

Hefyd, mae Canolfan Genomeg a Geneteg Niwroseiciatrig y Cyngor Ymchwil Feddygol wedi ennill Gwobr Pen-blwydd y Frenhines 2015 am ragoriaeth ym maes ymchwil.  Caiff ei dyfarnu bob dwy flynedd gan y Frenhines i gydnabod sefydliad academaidd neu alwedigaethol, ac mae’n dod o dan system anrhydeddau cenedlaethol y DU.

Time for Medicine yn ennill lle yn sioe arloesi fwyaf y DU

A’r cwmni wedi’i leoli ym Medicentre Caerdydd, cafodd Time for Medicine y gorau ar gystadleuwyr cryf eraill o bob rhan o'r wlad ac ennill lle i arddangos ei gynnyrch yn nigwyddiad arloesi mwyaf y DU ar gyfer sawl sector a gynhaliwyd ym mis Tachwedd.  Roedd y cwmni ymhlith cant a ddewiswyd i arddangos eu harloesedd i dros 3,000 o fynychwyr yn Innovate 2015, yn Llundain.  Darllen mwy.

Nifer y busnesau yng Nghymru yn cynyddu 11%, ers 2011

Mae Edwina Hart, Gweinidog yr Economi, yn annog darpar entrepreneuriaid i gysylltu â Busnes Cymru i'w helpu i droi eu huchelgais fusnes yn realiti - wrth i ffigurau diweddaraf ddangos bod nifer y mentrau busnes sy'n gweithredu yng Nghymru wedi tyfu dros 10% o dan y Llywodraeth bresennol yng Nghaerdydd.

Ar ddechrau’r Wythnos Entrepreneuriaeth Fyd-eang yn ddiweddar, croesawodd y Gweinidog y ffigurau diweddaraf a ddangosai 11% o gynnydd yn nifer y mentrau yn cyflawni busnes yng Nghymru. Darllen mwy.

Hwb Gwyddorau Bywyd Cymru yn lansio’r gystadleuaeth Boost Cymru

Mae’r Hwb yn lansio cystadleuaeth fusnes flynyddol newydd a bydd y peilot yn cael ei lansio ym mis Rhagfyr.  Bydd Boost Cymru yn ysgogi, yn arddangos ac yn cefnogi syniadau twf uchel a thwf cyflym yn y Gwyddorau Bywyd yng Nghymru, gan wneud y cysylltiad rhwng syniadau a masnacheiddio’n realiti. 

Mae’r gystadleuaeth yn cychwyn drwy Fynegi Diddordeb ar-lein. Rhaid i fusnesau fod wedi’u lleoli yng Nghymru ac â syniad perthnasol yn y Gwyddorau Bywyd y bydd yn rhaid ei gyflwyno’n glir mewn neges fideo tri munud. Bydd gan y rowndiau dilynol feini prawf gwahanol ar bob cam dyfarnu, gan gynnwys eiddo deallusol, llwybrau at y farchnad a phroffilio ariannol ymysg pethau eraill.  Bydd yr enillydd yn cael arian a chymorth proffesiynol ymarferol ac, ar hyd y ffordd, bydd pawb a ymgeisiodd yn llwyddiannus yn gallu cael gafael ar weithdai datblygu wedi’u hwyluso, yn ogystal â chymorth gan hyfforddwyr a mentoriaid busnes profiadol.    Cael gwybod mwy.

Cystadleuaeth gofal iechyd Innovate UK:

Cystadleuaeth ymchwil a datblygu diwydiannol cydweithredol rhwng yr India a'r DU: TGCh a gofal iechyd fforddiadwy a thechnoleg glân - Nod y gystadleuaeth yw dod â chwmnïau at ei gilydd (cwmnïau bach a chanolig a/neu gwmnïau mwy), sefydliadau ymchwil, academyddion a chymheiriaid eraill o'r India a’r DU ar gyfer ymchwil a datblygu ar y cyd er mwyn dod o hyd i atebion newydd i heriau economaidd-gymdeithasol mawr, ar ffurf gwasanaethau, prosesau neu gynnyrch arloesol.

Cystadleuaeth pontydd ymchwil ac arloesi rhwng Tsieina a’r DU -  mae Innovate UK, Cynghorau Ymchwil y DU (RCUK) a'r Weinyddiaeth Gwyddoniaeth a Thechnoleg (MoST) ar gyfer Gweriniaeth Pobl Tsieina yn mynd i fuddsoddi hyd at £16 miliwn mewn prosiectau ymchwil a datblygu ar y cyd sy’n cynnig atebion masnachol newydd i heriau pwysig sy’n effeithio ar dwf economaidd-gymdeithasol a datblygiad Tsieina yng nghyswllt ynni, gofal iechyd, trefoli a bwyd-amaeth. Cael gwybod mwy.

Her Fawr Cancer Research UK - gwobrau cynnydd £20M

Gwobrau'r Her Fawr yw’r grantiau ymchwil mwyaf uchelgeisiol yng nghyswllt canser yn y byd, gyda hyd at £20M ar gael mewn cymorth.  Gofynnir am geisiadau gan dimau rhyng-ddisgyblaethol sydd â ffyrdd newydd a chyffrous o ddatrys un o saith Her Fawr, sydd gyda’i gilydd yn cwmpasu rhai o'r cwestiynau pwysicaf ym maes ymchwil canser nad oes ateb iddynt.     Cael gwybod mwy.

Rhyddhad Ardrethi ar Fusnesau Bach wedi’i ymestyn am flwyddyn gyda £98 miliwn

Bydd Cynllun Rhyddhad Ardrethi Busnesau Bach Llywodraeth  Cymru yn cael ei ymestyn am flwyddyn arall, meddai Edwina Hart, Gweinidog yr Economi. 

Mae’r cynllun £98 miliwn, fydd yn helpu dros dri chwarter o fusnesau yng Nghymru, yn golygu na fydd oddeutu hanner pob busnes cymwys yn talu ardrethi busnes eto yn y flwyddyn ariannol nesaf.  Darllen mwy.

Digwyddiadau Hwb Gwyddorau Bywyd Cymru

Hwb Gwyddorau Bywyd Cymru ym Mae Caerdydd yw’r canolbwynt ar gyfer y sector yng Nghymru - gan sbarduno rhyngweithio, arloesedd, rhwydweithio a chydweithio.

Cael gwybod mwy am nifer o ddigwyddiadau sy’n cael eu cynnal yn y sector gan Hwb Gwyddorau Bywyd Cymru.

Dilynwch ni ar @WG_economy

Gallwch gael y diweddaraf am Adran Economi, Gwyddoniaeth a Thrafnidiaeth Llywodraeth Cymru a chysylltu â ni drwy ein dilyn ar Twitter.