Llywodraeth Cymru yn helpu Fox 21 Television Studios i adfywio Dragon Studios

Mae Llywodraeth Cymru wedi sicrhau llwyddiant mawr arall ar gyfer y diwydiant teledu a ffilm yng Nghymru drwy helpu Fox 21 Television Studios i ennill prydles Dragon Studios ym Mhencoed, sydd wedi bod yn wag am beth amser.

Croesawodd Edwina Hart y penderfyniad gan Fox 21 Television Studios i ddefnyddio'r stiwdio i gynhyrchu The Bastard Executioner, eu cyfres hanesyddol fawr ddiweddaraf gan Kurt Sutter, crëwr Sons of Anarchy. Darllen mwy.

Y llun - Edwina Hart, Gweinidog yr Economi, yn Dragon Studios, Pencoed, lle mae The Bastard Executioner yn cael ei wneud, gyda Giles Masters, Dylunydd Cynhyrchu a Paris Barclay, Cynhyrchydd Gweithredol.

Dirprwy Weinidog yn hedfan baner Cymru yn ystod Wythnos Ffilm a Theledu’r DU Yn ddiweddar, roedd y Dirprwy Weinidog Diwylliant, Chwaraeon a Thwristiaeth, Ken Skates, yn hedfan baner Cymru yn ystod Wythnos Ffilm a Theledu’r DU yn Los Angeles. Ei nod oedd hybu ein sector diwydiannau creadigol, sy’n ffynnu ar hyn o bryd, a denu rhagor o gynyrchiadau rhyngwladol o’r radd flaenaf i Gymru. Cymru yw canolbwynt y sector diwydiannau creadigol y tu allan i Lundain erbyn hyn yn sgil llwyddiannau rhyngwladol diweddar sy’n cynnwys Da Vinci’s Demons a The Bastard Executioner.  Darllenwch ragor.

Their Finest hour and a Half yn sicrhau budd economaidd sylweddol ar ôl ffilmio am saith wythnos yng Nghymru Mae Their Finest Hour and a Half – y ffilm ddiweddaraf i gael ei chefnogi gan Gyllideb Buddsoddi yn y Cyfryngau gwerth £30 miliwn Llywodraeth Cymru – newydd orffen ffilmio yng Nghymru, gan sicrhau budd economaidd sylweddol. Cafodd pum deg y cant o'r ffilmio ei wneud mewn lleoliadau yn Abertawe a de orllewin Cymru dros y saith wythnos ddiwethaf, gan gynnwys Theatr y Grand Abertawe a Neuadd y Ddinas, a gafodd eu newid i'r Weinyddiaeth Gwybodaeth a Whitehall, ynghyd â nifer o lefydd yn Sir Benfro, gan gynnwys Trecŵn, Freshwater West, Harbwr Porthgain, Sinema'r Palace yn Hwlffordd a'r Cresselly Arms yng Nghei Cresswell. Darllen mwy. Y llun: Cyngor Sir Penfro

Trampires ac Animortal Studios yn adfywio ac yn creu 90 o swyddi newydd Mae Prif Weinidog Cymru, Carwyn Jones, wedi ymweld â stiwdio animeiddio uwch dechnoleg modern newydd ym Mhen-y-bont ar Ogwr. Mae'r gwaith ffilmio wedi dechrau ar ffilm animeiddiedig ‘stop motion’ hyd llawn newydd o'r enw 'Chuck Steel: Night of the Trampires', a fydd yn creu 90 o swyddi newydd. Darllen mwy.

Llywodraeth Cymru a Microsoft yn lansio peilot Greenshoots yng Nghymru Bydd prosiect peilot sydd â'r nod o gefnogi datblygwyr gemau newydd yng Nghymru yn rhoi grant o £25,000 i bedwar cwmni llwyddiannus er mwyn iddynt lunio gemau newydd – a chael arweiniad arbenigol gan Microsoft. Mae hyn yn dilyn partneriaeth rhwng Llywodraeth Cymru a Microsoft i lansio fersiwn Gymraeg o brosiect datblygu gemau Greenshoots Microsoft i ddatblygwyr newydd. Darllen mwy.

Cynlluniau West Coast Group ar gyfer ehangu yn dod â swyddi newydd Amlinellodd West Coast Group, sy'n arbenigo mewn datblygu gemau a meddalwedd, eu cynlluniau ar gyfer ehangu wrth i'w stiwdos newydd yn Aberystwyth gael eu hagor yn swyddogol gan y Gweinidog Economi, Edwina Hart. Mae'r Grŵp, sy'n cynnwys West Coast Games a West Coast Software, yn darparu portffolio amrywiol o brosiectau, o ddatblygu gemau rhyngweithiol newydd i greu meddalwedd ar gyfer rhaglenni diwydiannol. Darllen mwy.

Gŵyl y Dyn Gwyrdd yn ennill Gŵyl Orau Prydain yng Ngwobrau Cerddoriaeth Fyw 2015 Enillodd Gŵyl y Dyn Gwyrdd wobr o fri yn Noson Wobrwyo Busnes Cerddoriaeth Fyw neithiwr, sef y Wobr am yr Ŵyl Orau. Cafodd y wobr ei dyfarnu gan banel o arbenigwyr amlwg, gan gynnwys artistiaid uchel eu proffil, asiantiaid a rheolwyr artistiaid. Gan longyfarch trefnwyr yr ŵyl, dywedodd Edwina Hart, Gweinidog yr Economi: "Mae hyn yn dipyn o gamp, ac mae'n llawn haeddiannol. Gwŷl y Dyn Gwyrdd yw'r ŵyl celfyddydau a cherddoriaeth gyfoes fwyaf yng Nghymru, ac rwyf yn falch bod Llywodraeth Cymru yn darparu cefnogaeth gan ei fod yn helpu i hyrwyddo diwylliant Cymreig a'n diwydiannau creadigol deinamig i gynulleidfa ryngwladol gan hybu twristiaeth ar yr un pryd." Darllen mwy.

Dathlu diwydiannau creadigol ffyniannus Cymru yn BAFTA Cymru Cafodd diwydiannau creadigol ffyniannus Cymru eu dathlu yng Nghaerdydd yn ddiweddar yng ngwobrau mawreddog BAFTA Cymru. Wedi eu cynnal yng Nghanolfan Mileniwm Cymru, cafodd rhagoriaeth mewn ffilm a theledu Cymru ei hanrhydeddu gan BAFTA Cymru. Mae'r Diwydiannau Creadigol yn flaenoriaeth i Lywodraeth Cymru ac erbyn hyn mae'n un o'r sectorau sy'n tyfu gyflymaf yng Nghymru. Mae ystadegau diweddar yn dangos bod nifer y bobl sy'n gweithio yn y diwydiant hwn wedi codi 52% rhwng 2005 a 2014, gyda bron i 50,000 o bobl yn gweithio yn y sector erbyn hyn. Darllen mwy.

Y Prif Weinidog yn cyhoeddi cyllid o £115 miliwn i hybu arloesedd Mae Carwyn Jones, Prif Weinidog Cymru, wedi cyhoeddi pecyn gwerth £115 miliwn i hybu arloesedd a fydd yn arwain at gannoedd o gynnyrch a swyddi uchel eu safon newydd ledled Cymru. Gyda chefnogaeth gan Gronfa Datblygu Rhanbarthol Ewrop a buddsoddiad o'r sector preifat, mae Llywodraeth Cymru yn lansio dau brosiect arloesi newydd: SMART Cymru a SMART Arbenigedd. Darllen mwy.

Lady Chatterley’s Lover: Drama hyd llawn sydd wedi’i ffilmio yng Nghymru yn cael ei dangos am y tro cyntaf Wedi ei ffilmio yn erbyn cefndir atyniadol cefn gwlad Cymru, ac yn cynnwys cast a chriw o safon uchel iawn, roedd Lady Chatterley’s Lover yn llwyddiant ysgubol pan gafodd ei dangos ar BBC1 am y tro cyntaf. Yn seiliedig ar nofel enwog DH Lawrence am berthynas sy’n croesi ffiniau dosbarth, mae Lady Chatterley’s Lover yn un enghraifft o lwyddiant y diwydiannau creadigol yng Nghymru, yn ôl Gweinidog yr Economi, Gwyddoniaeth a Thrafnidiaeth, Edwina Hart.  Darllen mwy. Llun - drwy garedigrwydd Hartswood Films a Joss Barratt

Taith Fasnach Gymreig i San Francisco Arfordir Gorllewinol Unol Daleithiau America oedd canolbwynt taith fasnach ddiweddaraf Llywodraeth Cymru, a fu'n arwain dirprwyaeth o 10 cwmni Cymreig o'r sbectrwm diwydiannau creadigol a thechnoleg gwybodaeth i San Francisco. Trefnwyd y daith pum diwrnod rhwng 27 Medi a Hydref 2 yn benodol i gyd-fynd â'r Global Mobile Internet Conference, cynhadledd symudol fwyaf Silicon Valley, sy'n denu miloedd o ymwelwyr o dros 60 o wledydd. Darllen mwy.

Cynllun yr Ysgolion Creadigol Arweiniol – Dysgu Creadigol drwy'r Celfyddydau

Bydd y cynllun hwn a ddarperir ar y cyd rhwng Llywodraeth Cymru a Chyngor Celfyddydau Cymru yn sicrhau gwelliant gwirioneddol yn y ffordd y mae'r sectorau celfyddydau, creadigol ac addysg yn cydweithio i ddarparu manteision pwysig i ddysgwyr a'u hysgolion.  Mae'r cynllun, sy'n rhan o'r cynllun pum mlynedd ar gyfer Dysgu Creadigol drwy'r Celfyddydau, yn gobeithio rhoi dysgu creadigol a'r celfyddydau wrth galon dysgu mewn ysgolion i wella cyrhaeddiad drwy greadigrwydd; cynyddu a gwella profiadau a chyfleoedd sy'n ymwneud â'r celfyddydau mewn ysgolion; cyflawni'r tair blaenoriaeth addysg: gwella llythrennedd, rhifedd a lleihau effaith anfantais; cefnogi athrawon ac ymarferwyr y celfyddydau i ddatblygu eu sgiliau.

Mae 131 o ysgolion o bob cwr o Gymru wedi cael eu dewis i gymryd rhan yn y rownd gyntaf, ac yn ystod y cynllun pum mlynedd bydd y cynllun ar gael i tua un ym mhob tri o ysgolion Cymru. Darllenwch fwy am y cynllun yma.

Prif swyddfa Cymru Milk VFX yn agor yn Gloworks

Bu agoriad swyddogol prif swyddfa Cymru Milk VFX yn Gloworks ar 22 Medi. Diolch i gyllid Llywodraeth Cymru, ynghyd ag argaeledd lleoliad addas yn Gloworks, mae'r cwmni effeithiau gweledol uchel ei broffil hwn o Lundain wedi agor swyddfa yng Nghaerdydd. Maent wedi gweithio ar gynyrchiadau llwyddiannus megis Poltergeist, Hercules, 24: Live Another Day, Sherlock, Dr. Who a Jonathan Strange & Mr Norrell, drama BBC TV. Nawr bod y cwmni hwn wedi eu lleoli yn Gloworks, mae'r adeilad yn llawn. Darllenwch fwy am Milk VFX.

Busnesau sy’n chwilio am gyngor i gysylltu â BOSS

Mae gwasanaeth cymorth busnes newydd ar-lein wedi’i lansio gan Lywodraeth Cymru i sicrhau bod pob entrepreneur a busnes yn gallu cael mynediad i gymorth Busnes Cymru unrhyw amser ac unrhyw bryd.

Nod y Gwasanaeth Cymorth Busnes Ar-lein (BOSS) yw gweddnewid cefnogaeth ar-lein ac ategu dysgu wyneb wrth wyneb. Darllen mwy. 

Penodi panel arbennig i yrru rhaglen entrepreneuriaeth wedi'i seilio ar arloesedd byd-eang yn ei blaen

Mae Edwina Hart, y Gweinidog Economi, wedi penodi tîm amlddisgyblaethol sy'n cynnwys unigolion dylanwadol a llwyddiannus i yrru Rhaglen Datblygu Entrepreneuriaeth Rhanbarthol (REAP) Sefydliad Technoleg Massachusetts i Gymru yn ei blaen.

Cafodd Cymru ei dewis y llynedd i gymryd rhan yn y rhaglen, sy'n fenter byd-eang wedi ei dylunio i helpu rhanbarthau gyflymu twf economaidd a chreu swyddi drwy entrepreneuriaeth wedi ei seilio ar arloesedd. Darllen mwy.

Llywodraeth Cymru yn ymateb i Ystadegau’r Farchnad Lafur

Mae’r Prif Weinidog, Carwyn Jones, wedi gwneud sylwadau am Ystadegau diweddaraf y Farchnad Lafur: “Fel llywodraeth sy’n gefnogol i fusnesau, mae ein polisïau’n golygu bod Cymru yn parhau i berfformio’n well na gweddill y DU i gynyddu cyflogaeth a lleihau lefelau anweithgarwch economaidd.

Dros y 12 mis diwethaf mae cyflogaeth yng Nghymru wedi cynyddu ar gyfradd gyflymach na bron ym mhob man arall yn y DU ac mae bellach yn sefyll ar lefel sy’n uwch nag erioed o’r blaen. Mae anweithgarwch economaidd yng Nghymru hefyd yn agos i lefel is nag erioed - i lawr 40,000 dros y flwyddyn, o’i gymharu â gostyngiad o 13,000 yn unig ar draws y DU gyfan dros yr un amser. Mae diweithdra yng Nghymru hefyd wedi gostwng dros y chwarter a’r flwyddyn.”

Cynllun Rhyddhad Adwerthu Cymru yn cael ei ymestyn a’i wella i helpu masnachwyr

Mae Gweinidog yr Economi, Edwina Hart, wedi cyhoeddi bod Llywodraeth Cymru wedi ymestyn a gwella cynllun Rhyddhad Adwerthu Cymru ar gyfer 2015-16 gan helpu busnesau manwerthu i gwtogi hyd at £1500 ar eu bil ardrethi.

Y llynedd, fe wnaeth dros 10,500 o adwerthwyr yng Nghymru elwa o’r cynllun gan iddo dynnu hyd at £1,000 oddi ar filiau ardrethi blynyddol. Darllen mwy.

Cynnydd Llywodraeth Cymru o 60% mewn busnes allforio newydd

Mae cwmnïau sydd wedi derbyn nawdd Llywodraeth Cymru wedi gweld gwerth £52 miliwn o fusnes allforio newydd. Mae hwn yn gynnydd o bron 60% ers y llynedd a hwn yw’r cynnydd mwyaf a welwyd yn y pum mlynedd diwethaf. Darllen mwy.

Mae Ewrop yn bwysig i Gymru - Beth all yr Undeb Ewropeaidd wneud ar gyfer y Diwydiannau Creadigol yng Nghymru? – Caernarfon, 12 Tachwedd 2015

Wedi ei drefnu gan Creative Europe, mae'r digwyddiad am ddim hwn yn rhoi'r cyfle i chi gael gwybodaeth am sut gall amrywiaeth o raglenni'r Undeb Ewropeaidd a gwasanaethau cefnogi fod o fudd i'ch sefydliad.

Ymhlith y rhai a fydd yn bresennol bydd cynrychiolwyr o Erasmus+, Horizon 2020, Interreg, Celfyddydau Rhyngwladol Cymru, Rhwydwaith Menter Ewrop, Europe Direct, Swyddfa’r Comisiwn Ewropeaidd yng Nghymru a Swyddfa Cyllid Ewropeaidd Cymru.

Rhagor o wybodaeth.

ExploreExport – Caerdydd, 12 Tachwedd 2015

Mae ExploreExport yn dychwelyd i Stadiwm SWALEC Caerdydd i adeiladu ar lwyddiant y llynedd - gan gynnig mwy o farchnadoedd, seminarau newydd a mwy o arddangoswyr.

Mae mwy o wybodaeth am y marchnadoedd, rhaglen y seminarau a chyfle i gofrestru ar gyfer y digwyddiad ar gael yma.

Gŵyl Lyfrau Rhyngwladol Guadalajara (FiL), Mecsico, 28 Tachwedd – 5 Rhagfyr 2015

Mae FiL, un o'r digwyddiadau diwylliannol rhyngwladol mwyaf, ac un o'r mwyaf yn y diwydiannau creadigol, yn cael ei gynnal yn Jalisco, Mecsico bob blwyddyn.  Mae disgwyl i fwy nag un filiwn o westeion i fod yn bresennol yn FiL eleni, gan gynnwys dros 300 o gyfarwyddwyr hawliau, 3,000 o newyddiadurwyr a sefydliadau cyfryngau, a 30,000 o gyhoeddwyr.  Dyma'r lle perffaith i feithrin cysylltiadau â chyd-gynhyrchwyr posib, trwyddedwyr, cynhyrchwyr hawliau, comisiynwyr, dosbarthwyr cynnwys ac arbenigwyr Eiddo Deallusol a fyddai'n gallu eich helpu i allgludo eich gwaith, ynghyd â sicrhau lleoliadau a chyfleoedd cydweithio rhagorol. 

Eleni, y DU yw'r wlad anrhydeddus yn FiL, ac mae gan Gymru gyfle i fod yng nghanol popeth wedi i Dalaith Jalisco a Chymru lofnodi Memorandwm Cyd-ddealltwriaeth a phartneriaeth strategol.

Bydd dirprwyon yn cymryd rhan fel rhan o dderbyniad, gweithdai ac arddangosfeydd diwydiannau creadigol yn ystod FiL, er mwyn rhoi llygad y byd ar Gymru. 

Mae Llywodraeth Cymru yn cynnig nifer cyfyngedig o lefydd i gwmnïau ac unigolion o Gymru i fod yn bresennol yn y digwyddiad rhyngwladol hwn. Mae'r llefydd yn gyfyngedig iawn, felly darllenwch fwy yma a chofrestru yma cyn gynted â phosib. 

Cynhadledd Datblygwyr Gemau – San Francisco, Unol Daleithiau America, 13 – 19 Mawrth 2016

Mae Llywodraeth Cymru yn gwahodd busnesau Cymru i gymryd rhan mewn taith fasnach i'r Gynhadledd Datblygwyr Gemau yn San Francisco.

Y gost i ganiatáu i gwmnïau Cymreig gymryd rhan yw tua £1,080. Bydd Llywodraeth Cymru yn darparu cefnogaeth i dalu am y costau ychwanegol ar gyfer un dirprwy fesul cwmni, a bydd y gefnogaeth hefyd yn cynnwys cyngor ar brosiect cyn y daith, digwyddiad briffio cyn y daith, taith yno ac yn ôl mewn awyren, trosglwyddiadau o fewn y farchnad, llety am chwe noson, y cyfle i fod yn bresennol mewn sesiwn briffio / derbyniad o fewn y farchnad, trwydded expo sylfaenol i'r Gynhadledd.

Bydd gennych chi'r cyfle i arddangos eich gwaith a sicrhau busnesau newydd yn y cynulliad blynyddol mwyaf o ddatblygwyr gemau fideo proffesiynol, gan ganolbwyntio ar ddysgu, meithrin ysbrydoliaeth a rhwydweithio. Bydd eich busnes yn cael ei gyflwyno i amrywiaeth o gyfleoedd, gan gynnwys cyfalafwyr menter a phrif arbenigwyr y farchnad.

Mae mwy o wybodaeth a chyfle i chi fynegi eich diddordeb yma.

Cenedl Hyblyg 2  - Chwarae Teg

Gan adeiladu ar lwyddiant y prosiect Cenedl Hyblyg cyntaf, pan gymerodd 2,900 o ferched ran ynddo, mae Chwarae Teg nawr yn chwilio am fwy o ferched sydd am gael y cyfle i gymryd rhan mewn rhaglen datblygu gyrfa sy'n uchel ei pharch ac wedi hen ennill ei phlwyf.

Rhagor o wybodaeth.

Dilynwch ni ar @WG_economy

Gallwch gael y diweddaraf am Adran Economi, Gwyddoniaeth a Thrafnidiaeth Llywodraeth Cymru ac ymgysylltu â ni drwy ein dilyn ar Twitter.