Ymestyn rhaglen Cyflymu Cymru i gyrraedd mwy o eiddo

Bydd mwy na 42,000 o eiddo ychwanegol yn gallu elwa ar ddarpariaeth rhaglen Cyflymu Cymru wrth iddi gael ei hymestyn.

Mae Cyflymu Cymru eisoes wedi gwneud cynnydd mawr ac mae tua 480,000 o eiddo bellach yn gallu manteisio ar gysylltiad band eang cyflymach. Mae’r cam diweddaraf hwn o’r rhaglen wedi cael cymorth cyllid gan Lywodraeth Cymru, Cronfa Datblygu Rhanbarthol Ewrop a Llywodraeth y DU.

Darllen rhagor

Cyfleusterau gwych yn rhoi ‘Dragon’ ar flaen y gad Mae buddsoddiad i greu cyfleuster ôl-gynhyrchu, adfer a digido ffilmiau yn mynd rhagddo gyda chymorth gwerth £200,500 gan Gronfa Twf Economaidd Llywodraeth Cymru. Bydd yn creu swyddi o safon ar gyfer graddedigion Cymru. Bydd y prosiect, sy’n werth cyfanswm o £445,000, gan gwmni Dragon yn creu cyfanswm o 13 o swyddi ac yn diogelu 7 arall gan greu cyfleuster unigryw ar gyfer ffilm a theledu. Darllen rhagor

Cysylltu castell â thechnoleg fodern Mae Cyflymu Cymru yn cysylltu Castell Aberteifi â’r byd, a thrwy hynny’n gwella profiad ymwelwyr, yn ôl Prif Weinidog Cymru, Carwyn Jones. Roedd y Prif Weinidog yn ailagor y castell eiconig yn swyddogol, yn sgil gwaith ailwampio mawr, a chlywodd sut mae cael mynediad i fand eang cyflym drwy gynllun Cyflymu Cymru yn gwneud gwahaniaeth mawr. Darllen rhagor

Arbenigwyr diogelwch cyfrifiadurol o Gaerdydd yn agor swyddfa yn Awstralia Mae cwmni o Gaerdydd sy’n ehangu, diolch i  £135,000 o gyllid busnes gan Lywodraeth Cymru, yn creu 13 o swyddi newydd arbenigol. Mae NetConsulting, cwmni TG ymgynghorol sy’n arbenigo mewn darparu atebion diogelwch cyfrifiadurol a thechnoleg gwybodaeth i fusnesau a llywodraethau, wedi agor swyddfa yn Awstralia – ac mae’n ehangu ei weithgareddau yng Nghaerdydd i ateb y galw rhyngwladol am ei wasanaethau. Darllen rhagor Llun - Paul Thomas, Rheolwr Gyfarwyddwr NetConsulting, ynghyd â Jonathan Ryan, Pennaeth Marchnata a Rachel Bonney, Gwerthu a Marchnata yn eu swyddfa yng Nghaerdydd.

Cyswllt band eang cyflym iawn i RAF Y Fali Gyda chymorth rhaglen Cyflymu Cymru, RAF Y Fali ar Ynys Môn yw’r lle diweddaraf yng Nghymru i elwa ar fand eang cyflym iawn. Mae staff Y Fali eisoes yn gyfarwydd â theithio’n gyflym iawn yn yr awyr a bydd modd iddynt bellach fanteisio ar gyswllt band eang cyflym iawn. Gall dros 425,000 o safleoedd eraill yng Nghymru bellach dderbyn gwell cyflymderau rhyngrwyd o ganlyniad i Cyflymu Cymru, sy’n bartneriaeth rhwng Llywodraeth Cymru a BT. Darllen rhagor

36 o swyddi newydd mewn canolfan datblygu meddalwedd newydd i Gwmbrân Mae canolfan newydd sy’n arbenigo mewn awtomeiddio prosesau robotaidd yn cael ei sefydlu yng Nghwmbrân gan greu 36 o swyddi newydd, gyda chymorth gan Lywodraeth Cymru. Darllen rhagor

Llywodraeth Cymru a Microsoft yn lansio peilot Greenshoots yng Nghymru Bydd prosiect peilot i gefnogi datblygwyr gemau newydd yng Nghymru yn rhoi grant o hyd at £25,000 i bedwar cwmni i greu teitlau newydd – a chael cyngor arbenigol gan Microsoft. Daw hyn yn sgil sefydlu partneriaeth rhwng Llywodraeth Cymru a Microsoft i lansio fersiwn Gymreig o Greenshoots, sef prosiect datblygu gemau ar gyfer cwmnïau newydd. Darllen rhagor

Cymru’n cryfhau ei safle o fewn y diwydiant gemau ym Mhrydain, sy’n werth £1 biliwn Mae cwmnïau sy'n cynhyrchu gemau, chwaraewyr gemau ac arweinwyr o fewn y diwydiant yng Nghaerdydd heddiw ar gyfer Sioe Datblygu Gemau Cymru, wrth i Gymru gryfhau ei safle yn y diwydiant cyffrous hwn. Mae Caerdydd eisoes yn datblygu’n ganolfan newydd lwyddiannus ar gyfer cynhyrchu gemau fideo, ac mae Llywodraeth Cymru’n awyddus i gefnogi’r diwydiant hwn sydd â’r potensial i greu swyddi da. Darllen rhagor

Llawer o Drafod yn ‘Digidol 2015’ Daeth ‘Digidol 2015’ i ben ar ôl deuddydd o drafod, ysbrydoli, cydweithio a rhannu sgiliau. Daeth dros 2,000 o sefydliadau ac academyddion o bob cwr o’r byd, ynghyd â chwmnïau cynhenid newydd arloesol at ei gilydd yn y Celtic Manor i glywed y diweddaraf am y byd digidol a sut y mae tueddiadau fel dadansoddi data a chymhwyso, y Rhyngwyd Pethau, diogelwch cyfrifiadurol a’r Cwmwl yn dylanwadu ar y byd o’n cwmpas.  Darllen rhagor Llun - ‘Tad’ Tomb Raider, Ian Livingstone CBE, yn annerch

Goreuon Digidol Cymru Ydych chi'n nabod pobl eithriadol yn y byd Digidol? Pobl sy’n cyflawni pethau rhyfeddol ac yn gwneud gwahaniaeth go iawn? Os ydych, dyma'ch cyfle i'w cofrestru ar gyfer Gwobrau Dewi Sant – gwobrau anrhydeddus a roddir gan Lywodraeth Cymru i unigolion a thimau rhagorol sy'n haeddu cydnabyddiaeth genedlaethol. Rydym yn awyddus bod pobl llwyddiannus y sector Digidol yn cael eu hystyried ar gyfer y Gwobrau Menter ac Arloesedd a Thechnoleg eleni. Hefyd, mae 7 gwobr arall: Dewrder, Diwylliant, Dinasyddiaeth, Gwobr Ryngwladol, Chwaraeon a Gwobr i Berson Ifanc yn ogystal â Gwobr Arbennig y Prif Weinidog. Dyma’r amser i fynd amdani - gallwch enwebu hyd at 27ain Hydref 2015 ar-lein yma.

Canolfan Economi Ddigidol Newydd Abertawe yn mynd ag ymchwil i'r cam nesaf

Bydd Coleg Gwyddoniaeth Prifysgol Abertawe'n dod yn gartref i ganolfan ymchwil economi ddigidol newydd sy'n werth dros £7M. Nod y ganolfan fydd arloesi mewn ffordd a a fydd yn cael effaith wirioneddol ar y byd.

Mae’r Ganolfan CHERISH-DE newydd (hynny yw, Canolfan Herio Amgylcheddau Dynol ac Effaith Ymchwil ar gyfer Economi Ddigidol Gynaliadwy ac Iach) wedi derbyn cyllid gwerth £3.8M gan y Llywodraeth, ar gost economaidd lawn, trwy'r Cyngor Ymchwil Peirianneg a Gwyddorau Ffisegol (EPSRC), gyda buddsoddiad gwerth £3.8M mewn cyfraniadau diwydiannol a chyfraniadau defnyddwyr ymchwil gan bartneriaid.

Darllen rhagor

HS2 yn trafod busnes a chwmnïau Cymru

Mae High Speed Two Ltd a chynrychiolwyr o Lywodraeth Cymru wedi cwrdd â thros 100 o fusnesau o Gymru i drafod sut y dylent ymgeisio am gontractau gwerth tua £10 biliwn i adeiladu prosiect seilwaith mwyaf Prydain – sef High Speed Two (HS2).

Bydd y digwyddiad, sy’n cael ei gynnal gan Lywodraeth Cymru, yn gyfle gwych i gwmnïau ddysgu mwy am broses gaffael HS2. Bydd hyn yn sicrhau bod gan y cwmnïau’r holl wybodaeth sydd ei hangen arnyn nhw i gynnig am y cyfleoedd a fydd yn codi o fewn y gadwyn gyflenwi.

Darllen rhagor 

Gwasanaeth newydd i ddarparu “technoleg siarad” i bobl â phroblemau lleferydd

Mae’r Dirprwy Weinidog Iechyd Vaughan Gething wedi cyhoeddi y caiff gwasanaeth newydd Cymru gyfan ei sefydlu i ddarparu offer cyfathrebu technoleg uwch i bobl â phroblemau lleferydd a chyfathrebu difrifol.

Yr amcangyfrif yw bod 15,500 o bobl yng Nghymru yn dioddef problemau lleferydd a chyfathrebu difrifol a allai elwa ar ryw fath o offer cyfathrebu. Mae angen offer cyfathrebu technoleg uwch ar o leiaf 1,540 o’r rhain, a gall offer o’r fath fod yn ddrud iawn.

Darllen rhagor

Cwmni uwch dechnoleg o Gas-gwent yn sicrhau cytundebau â chleientiaid o bob cwr o’r byd

Mae SOMNIUM® Technologies o Gas-gwent – cwmni uwch dechnoleg sy’n anelu’n uchel – wedi cael ei ddewis i gynorthwyo rhai o brif werthwyr lled-ddargludyddion y byd gyda’u cenhedlaeth newydd o offer datblygu meddalwedd wedi’i fewnblannu.

Darllen rhagor

Buddsoddiad o £6.7m mewn system TG newydd i integreiddio’r GIG a gwasanaethau cymdeithasol yng Nghymru

Bydd miliynau o bunnoedd yn cael eu buddsoddi mewn system TG newydd i integreiddio iechyd a gofal cymdeithasol yng Nghymru, cyhoeddodd y Gweinidog Iechyd a Gwasanaethau Cymdeithasol Mark Drakeford.

Mae Llywodraeth Cymru yn buddsoddi £6.7m i ddatblygu System Gwybodaeth Gofal Cymunedol (CCIS) newydd, a fydd yn caniatáu rhannu gwybodaeth rhwng gwahanol wasanaethau iechyd a gwasanaethau cymdeithasol ar unwaith, gan helpu i gynnig gofal a chymorth gwell i bobl ledled Cymru.

Darllen rhagor

Hwb ariannol i gwmnïau Technolegau Meddygol sy'n datblygu cynnyrch y genhedlaeth nesaf

Mae chwech o gwmnïau Technolegau Meddygol bach neu newydd yng Nghymru wedi cael eu dewis ar gyfer cyllid Ymchwil a Datblygu gwerth £600,000 gan Innovate UK. Bydd y cyllid yn eu helpu i ddatblygu a masnachu'r genhedlaeth nesaf o ddyfeisiadau a chynnyrch yn y maes technolegau meddygol.

Mae'r cyhoeddiad yn cyd-fynd ag ymweliad Dr Ruth McKernan, Prif Weithredwr newydd Innovate UK, â Chaerdydd i ddod i wybod mwy am y maes arloesi yng Nghymru.  Yn ystod ei hymweliad bu’n cyfarfod ag unigolion allweddol, gan gynnwys Edwina Hart,  Gweinidog yr Economi, Gwyddoniaeth a Thrafnidiaeth, yr Ysgrifennydd Parhaol, a Phrif Gynghorydd Gwyddonol Cymru.

Darllen rhagor

Hybu arloesi ym maes cymhwysedd digidol

Cafodd athrawon o bob rhan o Gymru glywed gan rai o unigolion mwyaf blaengar a blaenllaw y byd digidol mewn cynhadledd yng Nghaerdydd

Roedd trydedd gynhadledd genedlaethol Llywodraeth Cymru ar Ddysgu Digidol yn gyfle i ganolbwyntio ar rannu arferion da ym maes cymhwysedd digidol a chreu cysylltiadau rhwng ymarferwyr addysgu proffesiynol sydd eisoes yn defnyddio platfformau ac adnoddau digidol a’r rhai sy’n awyddus i ddechrau gwneud hynny er mwyn gwella eu harferion addysgu.

Darllen rhagor

Gwefan newydd yn dangos y gwahaniaethau rhwng cyfreithiau Cymru a gweddill y DU

Mae gwefan newydd wedi cael ei lansio i helpu pobl i ddeall sut mae cyfreithiau yng Nghymru yn dechrau dargyfeirio o gyfreithiau gweddill y DU. Gall y Cynulliad Cenedlaethol basio cyfreithiau i Gymru mewn 20 maes datganoledig megis iechyd, addysg, amaethyddiaeth, trafnidiaeth, tai, yr amgylchedd a mwy.

Mae’r gwaith ar wefan Cyfraith Cymru wedi cael ei arwain gan Gwnsler Cyffredinol Cymru, Theodore Huckle QC, i godi ymwybyddiaeth o'r nifer cynyddol o gyfreithiau sy'n cael eu pasio gan y Cynulliad Cenedlaethol a’u gwneud gan Weinidogion Cymru.

Darllen rhagor a mynd i'r wefan.

Cyhoeddi Economi Cymru: mewn rhifau

Mae Economi Cymru yn perfformio’n eithaf da dros y tymor canolig o’i chymharu â llawer o rannau eraill o’r DU ac mae’n gwella lles dinasyddion yng Nghymru yn sylweddol, yn ôl gwefan newydd sy’n cael ei lansio heddiw.

Mae ‘Economi Cymru: mewn rhifau’ yn rhoi darlun eang, manwl a hwylus o economi Cymru a chanlyniadau economaidd yng Nghymru.  Mae’n rhoi darlun llawn am y tro cyntaf o berfformiad economaidd ar gyfer wyth dangosydd allweddol – gan eu cymharu â rhannau eraill o’r DU a hynny dros gyfnod o amser.

Darllen rhagor

Dydd Mawrth Digidol

Mae Dydd Mawrth Digidol yn gymuned rwydweithio sy'n cyfarfod ar y dydd Mawrth cyntaf o bob mis – fel arfer yng Ngwesty'r Celtic Manor, Casnewydd – i gyfnewid gwybodaeth, trafod a chynnal busnes yn seiliedig ar y thema ddigidol.

Gallwch gael rhagor o wybodaeth a chofrestru eich diddordeb yma.

Dilynwch ni: @WG_economy

Nawr gallwch gael y diweddaraf am Adran Economi, Gwyddoniaeth a Thrafnidiaeth Llywodraeth Cymru ac ymgysylltu â hi drwy ein dilyn ni ar Twitter.